Aysel Zeynalova: “Aztəminatlı ailələr övladlarını pulsuz tibbi müayinədən keçirir və müayinədən keçən uşağın səhhətində hər hansı bir dəyişiklik varsa, dərhal valideynə məlumat verilir”
2017-ci ilin yanvar-iyun ayları ərzində Ədliyyə Nazirliyinin rayon (şəhər) qeydiyyat şöbələri tərəfindən Bakı şəhərində 14 713 doğulmuş körpə qeydə alınıb. Bakı Şəhər Statistika İdarəsinin yaydığı məlumata əsasən, bu göstərici əhalinin hər min nəfərinə hesabı ilə 13,2 təşkil edib. Doğulanların 168-i əkiz, 4-ü isə üçəmdir. Doğulan körpələrin 7701 nəfəri, yəni 52,3 %-i oğlan, 7012 nəfəri, yəni 47,7 %-i isə qız uşağıdır.
İlin əvvəlindən Bakı şəhərində 6529 ölüm halı qeydə alınıb və əhalinin hər 1000 nəfərinə ölüm səviyyəsi ötən illə müqayisədə 6-dan 5,9-a qədər enib.
Uşaqlar arasında qeydə alınan ölüm halları ötən illərlə müqayisədə azalıb.
Uşaq ölümlərinin azalması xəbəri sevindiricidir. Bunun səbəbləri müxtəlifdir. Səbəblərdən biri xəstəxanalar tərəfindən pulsuz müayinələrin keçirilməsi və səhiyyə sahəsində qeydə alınan inkişafdır.
Pediatr Aysel Zeynalova bizimlə söhbətində bildirdi ki, uşaq ölümü ötən illərlə müqayisədə azalıb. Ümumiyyətlə, 1990-cı ildən etibarən uşaq ölümü iki dəfə azalıb. Onun sözlərinə görə, uşaq ölümlərinin azalması səbəblərindən biri anaların hamiləlik dövründə vaxtlı-vaxtında müayinədən keçməsidir: “Artıq analar tibbi müayinədən keçməyə tərəddüd etmirlər. Uşaq dünyaya gələndən sonra belə valideynlər körpələri həkim nəzarətində saxlayırlar. Həmçinin, onu da demək lazımdır ki, pulsuz tibbi müayinələrin keçirilməsi də statistikaya öz təsirini göstərir. Aztəminatlı ailələr həmin kampaniyalardan yararlanmaq məqsədilə övladlarını pulsuz tibbi müayinədən keçirir. Müayinədən keçən uşağın səhhətində hər hansı bir dəyişiklik varsa, dərhal valideynə məlumat verilir. Valideyn isə, öz növbəsində, körpəsinin sağlamlığı üçün lazımi tədbirlər görür”.
Həmsöhbətimiz uşaq ölümlərinin azalmasının digər səbəbi kimi tibb müəssisələrinin müasirləşdirilməsini, kadr hazırlığını görür: “Bu istiqamətdə daim işlər görülür. Həkimlərin biliklərini artırmaq məqsədilə onlar mütəmadi olaraq xarici ölkələrdə təşkil olunan seminarlara göndərilir.
Pediatrın sözlərinə görə, ölkəmizdə ana və uşaq sağlamlığının qorunmasına dövlət səviyyəsində qayğı var, kadr təminatı sahəsində ciddi tədbirlər görülür.
Günel CƏLİLOVA
