Bahadur Bilalov: “Turist sifaris verdiyi təamın tərkibinin nələrdən ibarət olduğunu və qiymətini bilməlidir”
Bu il ölkəmizə gələn turistlərin sayı ötən illərə nisbətən yüksəkdir. Turist axını tək paytaxt Bakıda deyil, bölgələrdə də müşahidə olunur. Turistlərə xidmət göstərmək üçün şirkətlər fəaliyyət göstərir. Ancaq bununla yanaşı, bəzi şəxslər turistlərdən gəlir əldə etmək məqsədilə qanunsuz yollara əl atırlar.
Məsələn, hansısa dükandan alış-veriş edən turisdən aldığı malın dəyərindən yüksək məbləğ istənilib. Bu kimi hallar tək mağazalarda deyil, restoran, kafe və nəqliyyat sahələrində də qeydə alınıb.
Qeyd edək ki, Azərbaycanda builki yay turizm mövsümü ərzində turistlərə qarşı xoşagəlməz hallarla bağlı cinayət işi açılıb. Bu barədə Azərbaycan Turizm Assosiasiyasının sədri Nahid Bağırov media nümayəndələrinə açıqlamasında məlumat verib. O qeyd edib ki, belə neqativ hallar otellər, yeni açılmış turizm şirkətləri, özbaşına ekskursiya xidməti göstərən şəxslər, taksi sürücüləri, restoranlar tərəfindən edilib: “Tanınmış otellər də daxil olmaqla, bir neçə oteldə turistlərə düzgün xidmətin göstərilməməsi, giriş və çıxış vaxtlarının düzgün müəyyənləşdirilməməsi halları baş verib”.
Assosiasiya sədri əlavə edib ki, dünya standartlarına görə, otellərə giriş gündüz saat 2-də, çıxış gündüz saat 12-də olur: “Lakin çox hallarda turistlərin gözlədilməsi, otellərin turist qəbuluna hazır olmadığı müşahidə edilib. Turistlər bəzən axşam saat 7-dək otaqlarını təhvil ala bilməyiblər. Bu da müəyyən problemlər yaradıb. Bundan başqa, restoranlarda turistlərə, xüsusilə də ərəb turistlərinə bir neçə dəfə olduğundan yüksək qiymətlər təqdim edilib, bəzi turistlər taksi sürücüləri tərəfindən aldadılıb. Özünü bələdçi kimi qələmə verən insanlar Azərbaycanın tarixi, mədəniyyəti haqqında düzgün məlumat çatdırmayaraq turistləri aldadıblar”.
N.Bağırov təəssüflə qeyd edib ki, bir çox dələduzlar özlərini turizm şirkətinin təmsilçisi kimi qələmə verərək həm xarici, həm də yerli vətəndaşları aldadıblar: “Bu şikayətlər həm hüquqi, həm də fiziki şəxslərlə bağlı edilib”.
Turistləri aldadan şəxslərin cinayət məsuliyyətinə cəlb olunması ilə bağlı fikir bildirən turizm sahəsi üzrə ekspert Bahadur Bilalov “Bakı-Xəbər”ə açıqlamasında qeyd etdi ki, nəinki turistlərin, ümumiyyətlə bütün müştərilərin aldadılması yolverilməzdir: “Xüsusən də xarici turistlərin aldadılması düzgün deyil. Dəfələrlə açıqlamalarımda bildirmişəm ki, ictimai iaşə müəssisələrində mütləq menyu olmalıdır. O menyuda qidanın tərkibindəki inqridientlər, çəkisi və qiyməti yazılmalıdır. Turist sifaris verdiyi təamın tərkibinin nələrdən ibarət olduğunu və qiymətini bilməlidir. Çox təəssüf ki, Azərbaycanda buna nail olmaq hələ mümkün deyil. Hesab edirəm ki, turizmin inkişafı naminə bunu mütləq etməliyik. Olmazsa, turislərin kütləvi aldadılmasının şahidi olacağıq. Bu hal turizmin inkişafına mənfi təsir göstərəcək. Çünki gələn turistlər vəziyyəti görəndən sonra öz ölkələrinə qayıdanda antireklamla məşğul olacaqlar”.
Həmsöhbətimizin sözlərinə görə, yerli və ya xarici turistləri aldadan şəxslərin cinayət məsuliyyətinə cəlb olunması hüquqi bir prosesdir. Bu proses davam edərsə, bu niyyətdə olan digər şəxslər cinayət məsuliyyətinə cəlb olunmaqdan ehtiyat edib turisti aldatmazlar.
Günel CƏLİLOVA
