Şahin Camalov: “Əsasən yol hərəkəti qaydalarına riayət etməyən, piyada keçidindən keçməyən piyadaların özləri zərərçəkən olurlar”
“Yol qəzalarında piyadaların vurulması halı üstünlük təşkil edir. Bakıda baş verən yol qəzalarının böyük əksəriyyəti piyadaların avtomobillərlə vurulması ilə bağlıdır”. Bu sözləri Daxili İşlər Nazirliyinin (DİN) Bakı Şəhər Baş Polis İdarəsinin Dövlət Yol Polisi İdarəsinin ictimaiyyətlə əlaqələr bölməsinin rəisi, polis polkovniki Vaqif Əsədov media nümayəndələrinə açıqlamasında bildirib.
Onun sözlərinə görə, 2017-ci il yanvarın 1-dən avqustun 26-na qədər Bakı şəhəri üzrə baş vermiş yol qəzalarının 62 faizi məhz piyadaların vurulması ilə nəticələnib. V.Əsədov qeyd edib ki, təhlükəsizliyin təmin edilməsi məqsədilə həm avtomobillərə, həm də piyadalara qarşı tədbirlər görülür. Qeyd olunan müddətdə Bakı şəhəri üzrə keçirilən tədbirlər nəticəsində avtomobil sahibləri ilə bağlı 451 978, piyadalarla bağlı isə 80 187 inzibati protokol tərtib edilib. Eyni zamanda, mərkəzi məlumat sistemində avtomatik olaraq 455 730 elektron protokol yazılıb.
Qeyd edək ki, 2017-ci il yanvarın 1-dən avqustun 26-na qədər Bakı şəhəri üzrə 375 yol qəzası baş verib. Bu hadisələr nəticəsində 110 ölüm, 340 xəsarət qeydə alınıb.
“Təhlükəsiz Yol” Alyansının koordinatoru Şahin Camalov bizimlə söhbətində bildirdi ki, yol qəzalarının baş verməsinin səbəbi müxtəlifdir: “Baş verən yol qəzalarının 62 faizinin məhz piyadaların vurulması ilə nəticələnməsinin səbəbi müxtəlifdir. İlk öncə deyim ki, piyada keçidlərinin olmasına baxmayaraq, bir sıra hallarda vətəndaşlar keçidlərdən istifadə etmirlər. Bununla onlar həm özlərinin, həm də həmin yolda hərəkət edən nəqliyyat vasitələrini idarə edən sürücülərin həyatını təhlükədə qoyurlar. Nəticədə xoşagəlməz hadisələr qeydə alınır. Əsasən yol hərəkəti qaydalarına riayət etməyən, piyada keçidindən keçməyən piyadaların özləri zərərçəkən olurlar.
Onu da demək lazımdır ki, bu məsələdə sürücülər də diqqətli olmalıdır, bilməlidirlər ki, piyadalar arasında zəif görənlər, zəif eşidənlər var. Sürücülər yol hərəkəti qaydalarına riayət etməklə piyadanı vurmamaq üçün bütün zəruri tədbirlər görməlidirlər. Təəssüflər olsun ki, bəzi sürücülər sürət həddini aşır”.
Həmsöhbətimiz onu da vurğuladı ki, piyadaların vurulması kimi hadisələr əsasən piyada keçidlərinin yaxınlığında baş verir. Bəzi hallarda, qadağan olunmuş yollardan keçmək piyadaların həyatı bahasına başa gəlir.
Günel CƏLİLOVA
