Rasif Bağırov: “Pulsuz tibbi müayinələrin keçirilməsi əhalinin sağlamlığına diqqəti baxımından önəmlidir”
Neçə ildir ölkəmizdə pulsuz tibbi müayinələr keçirilir. Ölkənin istənilən yerində fəaliyyət göstərən tibb ocaqları əhaliyə pulsuz tibbi xidmət göstərirlər. Aztəminatlı insanlar bu xidmətdən yararlanmaq üçün xəstəxanalara müraciət edirlər və onlara lazımi qaydada xidmət göstərilir.
Ölkəmizdə müasir standartlara cavab verən xəstəxanalar açılır. Belə tibb ocaqlarından biri də bu günlərdə Cəlilabad rayonunda açıldı. Məlumat üçün bildirək ki, sentyabrın 2-də Azərbaycan Respublikasının Prezidenti İlham Əliyev Cəlilabad rayonuna səfər edib. Prezident adıçəkilən bölgəyə səfəri zaman orada yeni səhiyyə ocaqlarının açılışında iştirak edib.
İ.Əliyev çıxışı zamanı bildirib ki, artıq neçə ildir ölkəmizdə tibbi müayinədən keçən insanların sayı 5 milyona çatıb: “Biz bu xidməti pulsuz, dövlət hesabına təqdim edirik. Bu nəyə görə mümkün olub? Ona görə ki, indi hər bir yerdə müasir tibb ocaqları var, o cümlədən Cəlilabad rayonunda. Mən hər iki tibb müəssisəsinin – həm Müalicə-Diaqnostika Mərkəzinin, həm də Mərkəzi Rayon Xəstəxanasının açılışında iştirak etmişəm. Bu iki böyük tibb ocağı Cəlilabad rayon sakinlərinə çox yaxşı xidmət edir”.
Pulsuz tibbi xidmətin cəmiyyətin ümumi sağlamlığı kontekstində nə kimi əhəmiyyəti var?
Tibbi ekspert Rasif Bağırov bizimlə söhbətində bildirdi ki, pulsuz tibbi müayinələrin keçirilməsi əhalinin sağlamlığına diqqəti baxımından önəmlidir: “Aztəminatlı ailələr bu cür xidmətdən rahat şəkildə yararlanırlar. Elə ailələr var özəl xəstəxanalarda müayinə oluna bilmirlər. Belə olan təqdirdə onlar dövlət xəstəxanalarında təşkil olunan pulsuz tibbi müayinə xidmətindən yararlanırlar. Ümumiyyətlə, müayinə üçün müraciət edənlərin sayı yetərincədir. Müayinələr nəticəsində insanlar özlərində hər hansı bir xəstəliyin baş qaldırmasından tez bir zamanda xəbər tuturlar”.
Həmsöhbətimizin sözlərinə görə, dövlət xəstəxanalarında mütəmadi pulsuz tibbi müayinə kampaniyaları keçirilir: “Həmin kampaniyalardan xəbər tutan insanlar ondan yararlanırlar. Aztəminatlı ailələrlə yanaşı, yaşlı nəslin nümayəndələri də bu xidmətdən istifadə edirlər”.
Ekspertin fikrincə, yeni açılan xəstəxanaların müasir standartlara cavab verməsi səhiyyənin inkişafının göstəricisidir. Artıq insanlar könül rahatlığı ilə yerli tibb ocaqlarına müraciət edirlər. İstər müayinə, istərsə də müalicə baxımından Azərbaycan səhiyyəsi bir çox ölkələri geridə qoyur.
R.Bağırov hesab edir ki, yaxın müddət ərzində pulsuz tibbi xidmətdən yararlanacaq insanların sayı daha da artacaq.
Günel CƏLİLOVA
