Adil Qeybulla: “Ürək ritminin pozulması problemini yaşayan, ürək çatışmazlığından əziyyət çəkən şəxslərə bu içkilər ümumiyyətlə qadağan olunmalıdır. Yüksək qan təzyiqindən əziyyət çəkənlərə enerji içkilərindən istifadə etmək olmaz”
Son dövrlərdə uşaqdan böyüyə hər kəsin əlində enerji içkilərinə rast gəlmək mümkündür. Yaşından və cinsindən asılı olmayaraq, demək olar ki, hər kəs enerji içkiləri içir . Bildirilir ki, guya bi içki insanın əhvalını yüksəldir, enejisini artırır və bundan içən şəxs yorulmaq nədir bilmir. Bunu eşidən hər kəs enerji içkilərinə daha çox meyl göstərir. Bu gün şəhərin istənilən ərazisində enerji içkisini içən şəxsi görmək mümkündür. Hətta bu içkini içib rahat şəkildə yerə tullayanlar da az deyil.
Enerji içkiləri tək bizim ölkədə məşhur deyil, dünyanın istənilən ölkəsinin vətəndaşları adıçəkilən içki növünə daha çox meyl edir.
Bu günlərdə Mərkəzi Klinikanın Kardiologiya şöbəsinin müdiri, Türk Dünyası Kardioloqlar Birliyinin vitse-prezidenti, əməkdar həkim Firdovsi İbrahimov eneji içkiləri barədə mətbuata müsahibə verib. O bildirib ki, hazırda siqaretlə yanaşı, insan orqanizmi yeni bir bəla ilə qarşılaşıb. Bu da müxtəlif enerji içkiləridir: “Milli Məclisdən, deputatlarımızdan enerji içkilərini aksiz markaya keçirmələrini xahiş edirik. Bu məhsulların istifadəsinin azaldılması üçün vergi artırılmalıdır. Artıq ABŞ-dan eneji içkiləri ilə bağlı ölüm xəbərləri gəlməkdədir. Bizim enerji içkilərindən ölümcül hala düşən üç xəstəmiz olub. Onları çətinliklə həyata qaytara bildik. Ölümcül aritmiyalar olur. Gün ərzində birdən artıq enerji içkisi qəbul etdikdə problem yaranmağa başlayır. Enerji içkiləri çox asılılıq yaradır. Ona görə də həyəcan təbilinin çalınması çox vacibdir. Müxtəlif adlar altında istehsal olunan enerji içkilərinin zərərliliyi baxımından heç birində fərq yoxdur. Qadınlar üçün istehsal olunduğu deyilənlər də zərərlidir, hamısı satış üçün hesablanıb. Enerji içkilərindən zərər görən xəstələr arasında qadınlar da var. Alkoqollu içkilər, siqaretlər kimi, enerji içkiləri ilə bağlı reklamlar da yığışdırılmalıdır. Bu içkilərin fantastik dərəcədə satışı mövcuddur. Bəzi insanlar hətta alkoqollu içkilərlə birlikdə içir. Bu məsələ ilə bağlı vəziyyət heç ürəkaçan deyil. Əgər bu şəkildə davam edərsə, gələcək aylarda ölümlərin olacağı qaçılmazdır”
Tibb elmləri doktoru, professor Adil Qeybullanın sözlərinə görə, energetik içkilərin tərkibində müxtəlif dərmanlar var və bunlardan insana ən çox təsir edən də kofeindir: “Kofein ürəyin fəaliyyətini gücləndirir. Ardıcıl olaraq enerji içkiləri içdikdə ürəyi həddindən artıq yormuş oluruq. Ürəyi zəif olan, ürəyində problem olan adamlarda bu orqanın həddindən artıq çalışması və kənar müdaxiləyə məruz qalması oksigen tələbatını da artırır. Nəticədə ürəyə gələn oksigenlə tələb olunan oksigenin miqdarı arasında kəskin fərq yaranır ki, bu da insan səhhətində problemə səbəb olur. Uzun müddət enerji içkilərindən istifadə etmək ürək çatışmazlığına, ürək mədəciklərinin genişlənməsinə gətirib çıxara bilər. Həmçinin, ürək ritminin pozulması problemini yaşayan, ürək çatışmazlığından əziyyət çəkən şəxslərə bu içkilər ümumiyyətlə qadağan olunmalıdır. Yüksək qan təzyiqindən əziyyət çəkənlərə enerji içkilərindən istifadə etmək olmaz. Eləcə də yaşlı insanlara da bu cür içkilər məsələhət deyil. Ancaq bunu, birmənalı olaraq, yaşla da əlaqələndirmək olmaz. Ola bilər ki, cavanların da ürək fəaliyyəti bu içkidən istifadəyə imkan verməsin. Bu, orqanizmin vəziyyətindən asılıdır. Uşaqların da enerji içkilərindən istifadə etməsi yolverilməzdir. Bu, ürəyin ritminin pozulmasına gətirib çıxara bilər. Mütəmadi olaraq enerji içkilərini qəbul edən insanları müayinə etsək, görərik ki, bu onlarda ürəyin ritminin pozulmasına səbəb olur. Bu içkilərdən istifadə süni surətdə ürəyin ritmini artırır. Ancaq, əslində, buna lüzum yoxdur. Nəticədə ürək əzələsi həddindən artıq yorulur və müxtəlif fəsadlara yol açır”.
A.Qeybulla bildirdi ki, ürəyində problemi olan şəxslər adıçəkilən içkidən mütəmadi istifadə etdiyi üçün, nəticədə o insanlar sağlıq problemi ilə üzləşir. Və o insanların ürəyi daha da zəifləyərək, çox həssas bir orqana çevrilir.
Günel CƏLİLOVA
