“Orta məktəblərdə dinlə bağlı biliklərin daha da dərinləşdirilməsinə ciddi ehtiyac var”
21-ci əsr olmasına baxmayaraq, xurafatla mübarizənin aparılması bu gün cəmiyyətimiz üçün aktual olan məsələdir. Trend-in məlumatına görə, bunu Dini Qurumlarla İş üzrə Dövlət Komitəsinin (DQİDK) sədr müavini Gündüz İsmayılov bu gün "Dini radikalizm və xurafat: bir medalın iki üzü" mövzusunda keçirilən konfransda deyib.
O qeyd edib ki, həm xurafat, həm də dini radikalizm cəmiyyət üçün çox zərərlidir: "DQİDK-nın dini radikalizmlə mübarizədəki əsas fəaliyyət xətti ideoloji istiqamətdir. İkinci xətt isə inzibati tədbirlərdir. Biz inzibati tədbirləri hüquq-mühafizə orqanları ilə birgə həyata keçiririk. Hesab edirik ki, hər iki istiqamət üzrə mübarizə tədbirləri xurafatçılıqla da həyata keçirilməlidir. Bu məsələlərdə bizə dini icmalarla yanaşı, mətbuat da yaxından kömək etməlidir".
Onun sözlərinə görə, əgər din pərdəsi altında qadın hüquqlarına təhdidlər, erkən nikahla bağlı problemlər varsa, eyni zamanda dünyəvi təhsilə qarşı kiçik qruplar tərəfindən də olsa, çıxışlar varsa, komitə bunları da xurafatla mübarizə çərçivəsində nəzərdə tutduğu məsələlərə aid edir: "Mirzə Fətəli Axundov, M.Ə.Sabir, Ə.Haqverdiyev, M.Ə.Rəsulzadə kimi maarifçi ziyalılarımız həmişə dinə qarşı deyil, xurafata qarşı mübarizə aparıblar. Təəssüf ki, bu gün həmin dövrlə müqayisədə ziyalılarımız xurafata qarşı daha zəif mübarizə aparırlar".
G.İsmayılov deyib ki, xurafat prinsipindən yanaşdığımız məsələlərdən biri də məzhəbçilik olmalıdır. Əslində, xurafatçılığın, məzhəbçiliyin, dünyəvi təhsilə qarşı təhdidlərin arxasında istənilən halda kənar qüvvələr var. O qeyd edib ki, məişət mövzusunda olan xurafat əksər hallarda dini radikalizmin başlanğıc nöqtəsini təşkil edir: "Açıq deyək ki, bizdə məişət mütəvisində xurafat elementləri daha çoxdur. Son nəticədə radikal dini cərəyanlar təbliğatlarını qurarkən bu, onların işinə yarayır. Necə yarayır? Məsələn, radikal dini cərəyan üzvü "Quran"dan çıxış edir, sitatlar gətirir. Yaxud da hansısa böyük islam ədəbiyyatlarına istinad edir. Hər hansı yaşayış məntəqəsində, kənddə mərasimlərdə din adından danışan həmin "din" adamının çıxışlarında xurafat elementləri kifayət qədərdir. Onun dedikləri din üzərində dayansa da, təhrif olunur, mətnlər konteksdən çıxarılır. Bu, nəticədə xurafatın yarandığı, xurafat elementlərinin çox olduğu kəndlərdə, yaşayış yerlərində istər-istəməz dini radikalizmin toxumlarının səpilməsinə imkan yaradır".
Qafqaz Müsəlmanları İdarəsinin Aparat rəhbəri Simran Həsənov qeyd edib ki, radikalizm cinayət əməli olmaqla, cəmiyyətdə qayda-qanunun, nizamın pozulmasına gətirib çıxarır: "Xurafatçılıq da cəmiyyətimizin əsas problemlərindən biridir. Ona qarşı vaxtında mübarizə aparılmasa, dini radikalizmə çevrilə bilər".
G.İsmayılov bildirib ki, orta məktəblərdə dinlə bağlı biliklərin daha da dərinləşdirilməsinə ciddi ehtiyac var. O qeyd edib ki, dini radukalizmə qarşı mübarizənin gücləndirilməsi üçün həqiqi islam dini təbliğ edilməlidir. Bunun üçün isə ümumtəhsil məktəblərində dinlə bağlı tədrisin genişləndirilməsi lazımdır.
G.İsmayılov qeyd edib ki, hazırda Təhsil Nazirliyi və digər aidiyyatı qurumlarla birlikdə orta məktəblərdə tədris olunan "Həyat bilgisi" fənni il bağlı iş aparılır: "Yaxın zamanlarda biz "Həyat bilgisi" dərsliyində dinlə bağlı dəyişikliklərin olmasının şahidi olacağıq. Burada şəriətin tədrisindən söhbət getmir. Ancaq dini məlumatların dərinləşdirilməsinə ehtiyac var".
