Azərbaycan tarixinin şərəfli səhifəsinə qızıl hərflərlə həkk olunan Vətən müharibəsində yağıya qarşı son damla qanına qədər döyüşən, igidliyi, mərdliyi dillərdə dastana dönən şəhid Elçin Ağaqulu oğlu Tağıyev haqqında danışmaq istəyirəm. Xalqımızın bu igid, vətənpərvər oğlu 1989-cu il iyulun 1-də Biləsuvar rayonunun Zəhmətabad kəndində dünyaya göz açıb. Həyatı dərk edən gündən canından da çox sevdiyi Vətən torpağının düşmən tapdağına düşməsi onu narahat edib. Odur ki, hərbiçi olmaq arzusu Elçini Heydər Əliyev adına Azərbaycan Ali Hərbi Məktəbinə aparıb. Məktəbdə oxuduğu zaman nizam-intizamı ilə fərqlənib, Vətən naminə vacib olanları mükəmməl öyrənib. 2011-ci ildə ali hərbi təhsil alıb leytenant rütbəsində Vətənin keşiyində durub. Göstərdiyi xidmətlə mərd, cəsur, ağıllı bir komandir olaraq tanınıb, sevilib.
Qısa müddət içində peşəkar zabit kimi yetişən Elçin Tağıyev Müdafiə Nazirliyinə döyüş bölgəsinə getmək üçün müraciət edib. İstəyi yerinə yetirilib, cəbhə xəttində düşmənlə qarşı-qarşıya dayanmaqla doğma Azərbaycan torpaqlarını göz bəbəyi kimi qoruyub. Həmçinin əsgərlərinə böyük qardaş qayğısını göstərən komandir öyrənməkdən də qalmayıb. Özündən yuxarı vəzifəli komandirlərin tapşırıqlarını vaxtında, keyfiyyətlə yerinə yetirib. Qatıldığı təlimlərdə göstərdiyi döyüş hazırlığı həmişə nümunə olub. Təcrübə qazana-qazana erməni dığalardan qisas almaq üçün məqam axtarıb. Beləcə, özünün şəxsi nümunəsində əsgərlərinə Vətəni necə sevməyi, torpağına canı bahasına sipər olmağı öyrədən Elçin Tağıyev kapitan rütbəsinə qədər yüksəlib.
Doğma Vətən torpağı uğrunda son nəfəsinədək vuruşub şirin canından keçməyi özünə şərəf bilən Azərbaycan Ordusunun kapitanı Elçin Tağıyev Vətən müharibəsi başlanan gündən ən qaynar nöqtələrə yollanıb. Qisas məqsədilə yağının üstünə cəsarətlə, hünərlə gedib. Neçə-neçə qanlı savaşda ölümə meydan oxuya-oxuya dığaların axırına çıxıb. Döyüşdən-döyüşə təcrübəsi və səriştəsi çoxalıb, hər azad edilən kənd, şəhər onun ürəyində qələbəyə inamını artırıb. Vətən, millət naminə böyük arzular, ülvi amallar odlu, alovlu müharibə meydanında ona yeni güc verib, hünərlə, cəsarətlə vuruşub. Komandirin igidliyi əsgərlərini yalnız qələbəyə aparıb. Tərtər rayonunun Talış qəsəbəsi uğrunda gedən ağır müharibə zamanı yüksək şəxsi rəşadət göstərməklə düşmənin çoxlu sayda canlı qüvvəsini, hərbi texnikasını məhv edib.
Ürəyi Vətən eşqli Elçin Tağıyev səngərdə öz yerini tutan andan Qarabağ erməni dığalarından azad edilən günədək vuruşacağına an içmişdi. 1 oktyabrda düşmən tərəfindən qəfil açılan güllə onun gənc ömrünə son qoyub. Göstərdiyi hünər isə Elçini bir evin oğlundan bütöv Azərbaycan xalqının övladına çevirib. Vətən torpaqlarının azadlığı uğrunda şərəfli, yaddaqalan döyüş yolu keçən, ölümsüzlüyə qovuşan qəhrəman dövlət tərəfindən “ Qarabağ” ordeninə və “Vətən uğrunda” medalına layiq görülüb.
Zəfər ORUCOĞLU Azərbaycan Jurnalistlər Birliyinin üzvü
