Azərbaycanın qeyrətli oğulları ölümdən qorxmadan özlərini odun-alovun içinə atıb 44 günə 30 il yağıya əsir olan Qarabağımızı azad etdilər. Bununla qanları bahasına yeni tariximizin qəhrəmanlıq salnaməsini yazan Vətən sevdalılardan biri də 10 noyabr 2000-ci il Biləsuvarın Zəhmətabad kəndində dünyaya göz açan Nicat Höccət oğlu Qasımzadədir. Qısa ömür yolu keçsə də, onu doğma Azərbaycanına fəda etməklə ölümsüzlük qazanıb. 30 il düşmən tapdağına dönən Qarabağımızın xilaskarı, Vətənin ər oğlu olaraq adı xalq tərəfindən böyük qürurla çəkilir, şərəfli həyat yolu nümunə göstərilir.
20 yaşında polad sinəsini Vətənə sipər edib tarix yazan qəhrəmanımız Nicat Qasımzadə orta təhsilini başa vurub, 2019-cu ildə Vətənin keşiyinə yollanıb. İlk 3 ay Goranboy rayonunda doğma Azərbaycanın hər qarışına olan sevgisini nümunəvi xidməti ilə göstərib. Daha sonra Ağdamda 3 ay artilleriya qoşunlarında üzərinə düşən bütün tapşırıqları layiqincə yerinə yetirib. Cəsurluğu, mərdliyi, igidliyi hesabına tanınan, sevilə Nicata hərbi xidməti dövründə pulemyotçu vəzifəsi verilib, daha sonra manqa komandiri olub. Xidmətinin axırıncı 2 ayını isə kiçik çavuş rütbəsi ilə başa vurub və 6 iyul 2020-ci il tarixində üzüağ, alnıaçıq doğmaların yanına qayıdıb.
Canına məkrli yağı dadanmış Qarabağımıza görə Nicat evdə heç cür rahatlıq tapa bilməyib. Vətən sevdalı qəlbi məhz buna görə də erməni dığalardan qisas almaq istəyi ilə alışıb-yanıb. Azərbaycanın, eləcə dünya hərb tarixinə qızıl hərflərlə yazılan 44 günlük haqq savaşımızda könüllü olaraq, birincilər sırasında Vətənin müdafiəsinə qalxıb. Füzuli və Cəbrayıl istiqamətində gedən ağır döyüşlərdə odlardan, alovlardan keçərək düşmənin xeyli canlı qüvvəsini məhv edib, bir neçə yaralı dostunu müharibə meydanından çıxardıb. Aldığı yaraları belə unudaraq bir-birindən çətin vuruşlarda hünər göstərib. Erməni dığalarına qan qusdurub, istədiyi qisası alandan sonra Şuşada aldığı qəlpə yarası nəticəsində 9 noyabrda Vətən eşqli ürəyi əbədi dayanıb. 12 noyabr 2020-ci il tarixində doğulduğu Zəhmətabad kənd məzarıstanlığında torpağa tapşırılıb. Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı Vətənə can borcunu şərəflə ödədiyi üçün ölkə rəhbəri İlham Əliyevin Sərəncamları əsasında Nicat Qasımzadə ölümündən sonra "Vətən uğrunda", Xocavəndin, Füzulinin, Şuşanın azadlığına görə , "Cəsur döyüşçü" medalları və 3-cü dərəcəli "Vətənə xidmətə görə" ordeni ilə təltif edilib.
Bəli, 30 il əsir Qarabağımızın xilaskarı olaraq tarixin yaddaşına iz qoyan, qısa ömrü Vətəninə, torpağına sonsuz məhəbbət mücəssəməsinə dönən Nicat kimi oğlanlar heç vaxt unudulmaz, ürəklərin mehmanı olaraq zaman-zaman gələn nəsillər tərəfində böyük ehtiramla xatırlanar.
Zəfər ORUCOĞLU Azərbaycan Jurnalistlər Birliyinin üzvü
