Məlum olduğu kimi, dekabrın 3-də MİDA güzəştli mənzillərin satışını həyata keçirib. Satış Hövsan Yaşayış Kompleksinin birinci mərhələsi, Hövsan Yaşayış Kompleksinin ikinci mərhələsi, Sumqayıt Yaşayış Kompleksi, Lənkəran Yaşayış Kompleksi, Binəqədi Yaşayış Kompleksi, Şirvan Yaşayış Kompleksi və Yevlax Yaşayış Kompleksindəki mənzillər üzrə baş tutub.
Mənzillərin qısa zaman ərzində satılması alıcılar tərəfindən birmənalı qarşılanmayıb. Qeyd edək ki, satışa çıxarılan ümumilikdə 627 mənzilin hamısı 1 dəqiqə içərisində satılıb. Bu hal ilk dəfə deyil yaşanır. MİDA-nın mənzilləri hər dəfə satışa çıxarılanda eyni problem və narazılıq yaşanır. Minlərlə vətəndaş rəsmi satış gününü səbrsizliklə gözlədiyi halda, satışın qısa zamanda gerçəkləşməsi müəyyən suallara səbəb olur.
Maraqlıdır, MİDA mənzilləri üçün ədalətli alternativ seçim imkanları necə yaradılmalıdır?
Elnur Fərzəliyev: “Gələcəkdə mənzil sayı artırılarsa, proses sadələşərsə, alıcılar üçün daha əlçatan olar”
Əmlak üzrə ekspert Elnur Fərzəliyev “Bakı-Xəbər”ə şərhində bildirdi ki, Mənzil İnşaat Dövlət Agentliyinin satış mexanizmi elektron platforması üzərindən illərdir eyni qaydada aparılır: “Satışa çıxan mənzil sayı yüzlərlə olsa da, müraciət edənlərin sayı minlərlədir. Bu zaman alıcılardan kompüter bilikləri tələb olunur. Təbii ki, bu növ bilikləri geniş olan şəxslər platformalardan yararlana bilirlər. Hər evlər satışa çıxarılanda alıcılara alış mexanizmləri ilə bağlı demo versiya verilir. Alıcılar həmin demo versiya üzərindən müəyyən proseslər həyata keçirməlidirlər ki, alış qaydalarını öyrənə bilsinlər. Nəzərə almaq lazımdır ki, satışa çıxan mənzillərin sayı az, alıcıların sayı çox olur. Bu zaman alan alır, digər insanların böyük hissəsi narazı kütləyə çevrilir. Məlumdur ki, mənzillərin satış qiymətləri münasibdir, minimumdur, faiz dərəcələri çox aşağıdır. Hər bir şəxs bu mənzillərdən yararlanmağa çalışır. Lakin say az olduğu üçün hər bir insana şamil oluna bilmir. Gələcəkdə mənzil sayı artırılarsa, proses sadələşərsə, alıcılar üçün daha əlçatan ola bilər”.
Osman Gündüz: “Rəqəmsal bacarıqları yetərli olmayanların bu prosesdə uduş şansı elə öncədən sıfıra bərabərdir”
Azərbaycan İnternet Forumunun Prezidenti Osman Gündüzun sözlərinə görə, MİDA əvvəlki satışlardan fərqli olaraq bu dəfə ictimai nəzarətin təşkilinə önəm verməyib: “Proses nə qədər insan amili olmadan, texnologiyalar vasitəsilə həyata keçirilsə də, bəri başdan mahiyyətində bir ədalətsizlik var. Rəqəmsal bacarıqları yetərli olmayanların bu prosesdə uduş şansı elə öncədən sıfıra bərabərdir. Güzəştli mənzillər üçün daha ədalətli alternativ seçim imkanları yaratmaq çox vacibdir. Bu istiqamətdə təkliflərimizi MİDA-ya təklif etmişik”.
Kamran Məmmədli: “Onlayn satış prosesinin istiqamətini dəyişmək lazımdır”
Iqtisadçı Kamran Məmmədli “Bakı-Xəbər”ə şərhində bildirdi ki, onlayn satış prosesinin istiqamətini dəyişmək lazımdır: “Proqramda ehtiyacı olan və eyni zamanda, irəli sürülən standartlara uyğun olan vətəndaşlar iştirak etməlidir. Onlayn satışda kiber təhlükəsizlik hər nə qədər təmin olunsa da, hücumlardan qorunmaq asan deyil. Çünki kim məlumatlar bazasını daha tez ötürə bilsə, məhz onların şansı artır. Sanki bir yarış təyin olunub. Təbii ki, bu yarışda qalib olmaq üçün vətəndaşlarımız müxtəlif xidmətlərə müraciət edəcəklər. Proqramların təkmilləşdirilməsinə baxmayaraq, müdaxilələr qaçılmazdır. Bu baxımdan, ictimaiyyətin iştirakı ilə satış mexanizmində dəyişiklik edilməliddir”.
Günel CƏLİLOVA
