Milli Təhlükəsizlik Nazirliyinin (MTN) Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarovun cinayət işi ilə bağlı müsadirə olunmuş əmlaklar geri qaytarılıb.
Bu barədə Bakı Apellyasiya Məhkəməsi qərar qəbul edib. Hakim Habil Məmmədovun sədrlik etdiyi hakimlər heyəti belə qənaətə gəlib ki, Bakı Hərbi Məhkəməsinin hökmü ilə müsadirə olunmuş əmlaklar sahiblərinə geri qaytarılmalıdır. Bazar dəyəri 30 milyon manata yaxın qiymətləndirilmiş sözügedən əmlakların Akif Çovdarovun ailə üzvlərinə məxsus olduğu bildirilir.
Xatırladaq ki, Akif Çovdarov 2015-ci ildə həbs olunub. Cinayət Məcəlləsinin bir neçə maddəsi ilə ittiham olunan general-mayor Bakı Hərbi Məhkəməsinin hökmü ilə 12 il azadlıqdan məhrum edilib. Prezident İlham Əliyevin 2020-ci ildə imzaladığı əfv sərəncamı ilə Akif Çovdarov azadlığa buraxılıb.
Qeyd edək ki, məhkəmənin bu qərarı cəmiyyətdə böyük narazılıqla qarşılanıb. Çovdarovun vəkili Kamandar Nəsibov Məhkəmənin qərarını şərh edib.
Kamandar Nəsibov bildirib ki, məsələ ilə bağlı Apellyasiya Məhkəməsinin qərarı Ali Məhkəmədə ləğv olunub və yeni baxışa göndərilib:
“Əmlakların geri qaytarılması deyəndə, burada bir dəqiqləşdirməyə ehtiyac var. Apellyasiya Məhkəməsi işə yenidən baxıb, araşdırıb, hesab edib ki, əmlaklar Akif Çovdarova yox, başqa mülkiyyətçilərə aiddir. Bu səbəbə görə hökmün həmin hissəsi ləğv olunub və müsadirə edilmiş əmlak mülkiyyətçilərə qaytarılıb”.
Bəlli olub ki, başqa mülkiyyətçilər deyəndə Çovdarovun ailə üzvləri nəzərdə tutulur.
Bu qərarı nə dərəcədə ədalətli saymaq olar?
Hüquqşünas Şəmsəddin Əliyev "Bakı-xəbər"ə açıqlamasında bildirdi ki, bu çox ciddi mövzudur: “Mən məsələyə bir hüquqşunas kimi yanaşıram. Əslinə baxanda, Karl Maksın ifadəsi ilə yanaşsaq, cəmiyyət iki halda şüur deformasiyasına uğraya bilər. Birinci halda cəza var, cinayət yoxdur. İkinci halda isə cinayət var, cəza yoxdur. Hər ikisi çox ciddi olmaqla, bütün hüququ dövlətlərin əsas fəaliyyət istiqamətlərini təşkil edir. Çünki hüquqi dövlətdə mütləq mənada bütün cinayətlərə görə cəza olmalıdır ki, ictimai şüur deformasiyaya uğramasın. Apellyasiya məhkəməsinin qərarı ilə mən mətbuatda tanış oldum. Xüsusilə ağır cinayətlərə görə ittiham edilən Çovdarov dövlətin əmlakından, sərvətindən, uzun illər ərzində dövlətin ona etimad etdiyi vəzifəsindən öz şəxsi maraqları üçün istifadə edib. İctimai maraq, dövlət marağı kənara atılıb. Xüsusilə dövlət məmurluğuna yaraşan addımları hiss olunmayıb. Həmin müddət ərzində istintaqa bəlli olan təxminən 30 milyon manatlıq sərvəti hakim özünə qaytarıb verir. Cəzanın əsas 3 məqsədi var: 1.Sosial ədalət bərpa olunsun. 2.Qəbul olunan qərarla baş verə biləcək təkrar cinayətlərin qarşısı alınsın. 3. Vətəndaş islah olunsun ki, gələcəkdə bir də belə şey etməsin. Burada məhkəmənin qəbul etdiyi bu qərar, əksinə, sosial ədaləti aciz bir görkəmdə qoyur. İkinci tərəfdən, burada vəzifədən öz şəxsi maraqları üçün istifadə etmək istəyən dövlət məmurları, dövlət qurumunda çalışan qulluqçular baxıb görəcəklər ki, belə hallara çox normal yanaşılır. Hətta 50 manatdan yuxarı mənimsəmə korrupsiya cinayəti hesab olunur. Amma burada söhbət 30 milyondan gedir. Bir dövlət məmuru bu 30 milyonu haradan qazana bilər? Uzun illər işlədiyi və dövlətdən aldığı əmək haqqını üst-üstə toplasan 30 milyon edə bilməz. Burada, təbii ki, dövlətin müəyyən strukturlarına etibarsızlıq yaranır. Düşünürəm ki, bu şəkildə qərar qəbul edən hüquqşunasın hüquqi düşüncəsi çox aşağıdır. Bir qərarla bir çox vəzifə cinayətlərinə görə məhkum olunmuş insanların həbs qoyulmuş əmlakları gələcəkdə özlərinə qaytarılacaqsa, o zaman bu qədər istintaqın, bu qədər məhkəmənin, yazılan informasiyaların nə əhəmiyyəti oldu? İnsanlar dövlətin ona etibar etibar etdiyi vəzifədə çalışan məmurlara necə inanacaq? Bir baxış bucağı burada gerçəkləşir. Vəzifədə oldunsa, öz gələcəyin üçün istifadə etmək lazımdır. Belə olduğu halda dövlət marağı artıq geri plana çəkilir. Ona görə də düşünürəm ki, bu şəkildə yanlışlıq edən məmurlarımız çoxdur. Zamanında Əmək və Əhalinin Sosial Müdafiəsi Nazirliyində olan aparat rəhbərnin də əmlakları dövlətdən mənimsədiyi pullar sayəsində astronomik həddə çatmışdı. Yəni düşünürəm ki, ölkə Prezidentindən başqa az məmur var ki, dövlətin ona etibar etdiyi fəaliyyət istiqamətlərini lazımınca həyata keçirməyə müvəffəq olur”.
Məhəmmədəli QƏRİBLİ
