Faiq Ələkbərli: “Bu saxta “qədim” kitabın diplomatik korpus nümayəndlərinə nümayiş olunması erməni yalanlarının beynəlxalq aləmdə ifşa edilməsi baxımından müsbət addımdır”
Azərbaycan Prezidentinin köməkçisi Hikmət Hacıyevin diplomatik korpus nümayəndələrinə ifşa etdiyi saxta kitabların "sirri" ermənilərin işğal dövründə Alban məbədlərini qədim erməni mədəniyyət mərkəzi kimi qələmə vermək üçün qurduqları vizual fırıldaq və "şou"dan ibarətdir. Xarici diplomatların Qarabağ və Şərqi Zəngəzura reallaşdırılan növbəti səfəri zamanı, Ağdərə rayonunda yerləşən qədim Qafqaz Albaniyası irsi - Gəncəsər Monastır Kompleksində bu saxtakarlığın üstü sənədlərlə və əyani şəkildə açılıb.
Bu məsələnin əsas detalları və "boş kitabların" sirri aşağıdakılardan ibarətdir. Bu "qədim eksponat" illüziyasıdır. Yəni işğal müddətində erməni tərəfi monastıra gələn xarici qonaqlara və turistlərə guya "əsrlərlə yaşı olan, qədim erməni əlyazmaları və kilsə kitabları" nümayiş etdirirdi.
H.Hacıyev diplomatların gözü qarşısında həmin "qədim" kitablardan birini götürərək vərəqləyib. Məlum olub ki, kitabların sadəcə ilk bir neçə səhifəsində (və ya yalnız bir səhifəsində) mətn, dini rəsm və ya qondarma qeydlər var, kitabın yerdə qalan bütün digər səhifələri isə tamamilə ağ və boşdur.
Qədim dövrə aid tam bir kitab əlyazması saxtalaşdırmaq böyük elmi bilik və uzun zaman tələb etdiyindən, erməni keşişləri və saxtakarları yalnız vitrin və sürətli baxış üçün nəzərdə tutulan bu cür "mulyaj" (maket) kitablardan istifadə ediblər. Məqsəd kənardan baxan və ya kitabı dərindən vərəqləməyə imkanı olmayan xarici qonaqlarda "zəngin erməni tarixi mərkəzi" təəssüratı yaratmaq olub.
Tarixi irsin saxtalaşdırılması cəhdi özünü bir daha təsidqləyir. Ermənilər Qafqaz Albaniyasına məxsus olan Gəncəsər monastırının həm divarlarına müasir daşlar vurmaqla memarlıq quruluşu dəyişdirilib, həm də içərisinə bu cür uydurma eksponatlar doldurulmaqla abidənin tarixi mənsubiyyəti təhrif edilməyə çalışılıb. Prezident köməkçisinin bu əyani ifşası, tarixi və mədəni məsələlərin emosiyalarla deyil, məhz təkzibolunmaz faktlarla beynəlxalq ictimaiyyətə çatdırılması baxımından mühüm diplomatik gediş hesab olunur.
Yeri gəlmişkən, H.Hacıyevin erməni saxtakarlığını ifşa etməsi Ermənistanda ciddi rezonans yaradıb. Bəzi erməni siyasiləri ah-vay edirlər ki, Qarabağa səfər edən xarici diplomatların mənsub olduqları ölkələrin bəziləri vaxtilə qondarma “erməni soyqırımını” tanıyıblar.
Maraqlıdır ki, illərlə ermənilər öz saxta tarixi irslərini dünyaya tanıtmağa çalışıblar, amma bu gün bütün dünya təqdim olunanların saxta olduğunun fərqindədir.
AMEA-nın Fəlsəfə və Sosiologiya İnstitutunun şöbə müdiri, fəlsəfə doktoru Faiq Ələkbərli baki-xeber.com-a bildirdi ki, erməni ideoloqları uydurmalarda və tarixi saxtalaşdırmaqda “ustadırlar”. “Onlar “erməni mədəniyyəti”, “erməni abidəsi”, “erməni monastrı” adı altında təbliğ etdikləri uydurmalar əslində bu günkü Ermənistana, haylara qətiyyən dəxli yoxdur. Sadəcə, onlar vaxtilə xristianlığın Qriqoryanlıq məhzəbini qəbul etmiş bəzi türk tayfalarının və digər tayfaların maddi-mədəni irsini mənimsəyirlər. Bura kitablar, yazılar, abidələr və sair daxildir. Çar Rusiyanın işğalından sonra XIX əsrin əvvəllərindən başlayaraq kütləvi şəkildə Azərbaycan torpaqlarına, Anadolunun bəzi hissələrinə, xüsusən də Şərqi Anadoluya köçürülən hayların vaxtilə bu ərazilərdə yaşamış və xristianlığı qəbul etmiş türk və digər tayfalarla heç bir əlaqəsi yoxdur. Çar Rusiyasının, bəzi Avropa dövlətlərinin apardığı siyasət nəticəsində onlar bu mədəniyyəti mənimsəməyə çalışırlar. Vaxtilə Qriqoryanlıq məzhəbində olmuş, xristianlığı qəbul etmiş həmin tayfaların, etnosların mədəniyyətini özünküləşdirməyə çalışırlar. Ancaq bu monastrlar, oradakı kitablar və sair olsun, sonradan məlum olur ki, bunların xeyli bir hissəsi vaxtilə xristianlığı qəbul etmiş qıpçaq türklərinin və haylara aid olmayan digər tayfalarındır. Bu baxımdan, haylar öz tarixlərini saxtakarlıq üzərində qurublar. Hələ də saxtakarlığa davam edirlər. Onlar bu saxtakarlıqlarını nə qədər ört-basdır etməyə cəhd etsələr də onların üstü açılır. Bütün saxtakarlıqları açıq şəkildı ifşa olunur”.
F.Ələkbərli vurğuladı ki, Avropa ölkələri erməni saxtakarlığını çox yaxşı bilirlər və məhz onların dəstəyi ilə haylar öz tarixlərini “qədimləşdirməyə” çalışırlar. “Avropa ölkələri çox yaxşı bilirlər ki, bu irsin haylarla heç bir əlaqəsi yoxdur. Bu saxta “qədim” kitabın diplomatik korpus nümayəndlərinə nümayiş olunması erməni yalanlarının beynəlxalq aləmdə ifşa edilməsi baxımından müsbət addımdır. Hikmət Hacıyevin bunu məhz onlara göstərməsi yaxşı bir işdir. Avropalılar da görsünlər ki, illərdir müdafiə etdikləri haylar hansı fırıldaqlarla məşğul olublar”-deyə F.Ələkbərli qeyd etdi.
İradə SARIYEVA
