Maqdalena Qrono Azərbaycanın xarici işlər naziri Ceyhun Bayramov, Prezidentin köməkçisi Hikmət Hacıyev və xüsusi tapşırıqlar üzrə nümayəndə Elçin Əmirbəyovla görüşüb. Müzakirələrdə Aİ-nin Azərbaycan-Ermənistan sülh prosesinə dəstəyi, keçmiş münaqişənin humanitar nəticələri, regional bağlantılar və əməkdaşlıq məsələləri əsas mövzular olub.
Qrono həmçinin diplomatik korpus üçün təşkil edilən Qarabağ və Şərqi Zəngəzura səfərdə iştirak edib. O, keçmiş münaqişədən zərər çəkmiş ərazilərdə vəziyyətlə tanış olub, yerli hakimiyyət nümayəndələri, keçmiş məcburi köçkünlər və media ilə görüşüb, məscid və kilsələr də daxil olmaqla mədəni-dini irs abidələrini ziyarət edib.
Qrono bildirib ki, Bakıda keçirdiyi görüşlərdən sonra İrəvanda Ermənistan hakimiyyəti və vətəndaş cəmiyyəti nümayəndələri ilə görüşlər keçirməyi planlaşdırır.
Qrono Qarabağ və Şərqi Zəngəzura səfər zamanı gördükləri və keçirdiyi görüşlər əsasında İrəvana hansı əsas mesajları apara bilər? Bu səfərin onun Ermənistan hakimiyyəti və vətəndaş cəmiyyəti ilə görüşlərində Azərbaycan-Ermənistan sülh prosesinə dair mövqeyinə və müzakirələrə hansı təsiri göstərəcəyi gözlənilir?
Akif Nağı: “Avropa İttifaqı nümayəndələri Ermənistanın saxtakarlığını öz gözləri ilə gördülər”
Politoloq Akif Nağı “Bakı-Xəbər” qəzetinə müsahibəsində Avropa İttifaqı (Aİ) nümayəndələrinin Cənubi Qafqaza və xüsusilə Azərbaycana səfərini, həmçinin regiondakı mövcud siyasi vəziyyəti dəyərləndirib.
Politoloq qeyd edib ki, Avropa İttifaqının diqqəti hər zaman Cənubi Qafqazdadır. Lakin Aİ və Avropa Parlamenti nümayəndələri çox vaxt Azərbaycana qarşı qərəzli mövqe nümayiş etdirirlər:
“Biz bu tür səfərlər üçün hər zaman açığıq və reallığı göstərməyə hazırıq. Xüsusi nümayəndə xanım Qrononun və digər diplomatların iki gün ərzində işğaldan azad olunmuş ərazilərimizdə - Qarabağ və Şərqi Zəngəzurda olması böyük əhəmiyyət kəsb edir. Onlar öz gözləri ilə hər şeyi gördülər: həm Azərbaycanın maddi-mənəvi irsinə vurulan zərbələri, dağıntıları, həm də ermənilərin yalandan qaldırdıqları hay-küylərin əsassız olduğunu”.
Akif Nağı səfər zamanı üzə çıxan mühüm bir fakta da diqqət çəkib: “Səfər zamanı növbəti dəfə erməni saxtakarlığı rüsvayçı şəkildə üzə çıxdı. Muzeylərdə “qədim erməni kilsə kitabları” və “İncil nüsxələri” kimi təqdim edilən eksponatların ilk 1-2 səhifəsində şəkil və ya qədim hərflər olsa da, içərisindəki 300-400 səhifənin tamamilə ağ vərəqlərdən ibarət olduğu ortaya çıxdı. Bunu Aİ nümayəndəsi daxil olmaqla bütün qonaqlar gördü. Bu, dünyada görünməmiş bir saxtakarlıqdır. Ermənilər illərdir öz məktəblilərini və xarici qonaqları bu yolla aldadırlar”.
Politoloqun sözlərinə görə, Ermənistan cəmiyyəti bu səfəri böyük narahatlıqla qarşılayıb:
“Ermənistan hələ də xəstə cəmiyyət olaraq qalır. Onlar Aİ, ABŞ və Fransa nümayəndələrinə “Niyə o səfərə getmisiniz” deyə etiraz edirlər. Anlamaq istəmirlər ki, bu torpaqlar Azərbaycan torpaqlarıdır. Lakin bu səfər vəziyyətin aydınlaşması və sülh prosesi üçün vacib idi. Aİ nümayəndələri Azərbaycanın haqlı mövqeyini, aparılan bərpa işlərini öz gözləri ilə gördülər”.
Akif Nağı vurğulayıb ki, bu faktlar İrəvanla aparılacaq predmetli danışıqlarda Aİ-nin əlinə mühüm sübutlar verir: “Aİ nümayəndələri Ermənistana mesaj çatdırmalıdırlar ki, əsassız iddialardan əl çəksinlər. Əgər Aİ obyekiv mövqe tutacaqsa, bu, regionda sabitliyə və Azərbaycan-Aİ münasibətlərinə töhfə verəcək. Yox, yenə erməni yalanlarına inansalar, bunun bir mənası olmayacaq. Azərbaycan öz müstəqil siyasətini yürütməkdə davam edir, obyektiivlik isə ilk növbədə Aİ və Ermənistanın özü üçün vacibdir”.
Dəniz NƏSİRLİ
