Sahil Kərimli: “Bu səfər eyni zamanda beynəlxalq birliyin Azərbaycanın ərazi bütövlüyünü tam şəkildə qəbul etdiyini göstərir”
Azərbaycanda akkreditə olunmuş diplomatik korpus nümayəndələrinin Qarabağ və Şərqi Zəngəzura müntəzəm səfərləri təşkil edilir. Sonuncu səfər sentyabrın 11-12-də baş tutub və bu sayca 22-ci səfər olub.
Ekspertlər hesab edir ki, bu sadəcə protokol xarakterli tədbirlər olmayıb, pərdəarxası çox mühüm regional və qlobal reallıqları üzə çıxarır. Xarici diplomatların, hərbi attaşelərin və beynəlxalq təşkilatların təmsilçilərinin bu səfərlərinin sonradan aydınlaşan və siyasi-diplomatik müstəvidə görünməyən əsas tərəfləri var.
58 ölkə və 9 beynəlxalq təşkilatdan olan 150 nəfərlik heyətin Xankəndi, Şuşa, Ağdərə və Kəlbəcər kimi ərazilərə rəsmi Bakının xətti ilə səfər etməsi, beynəlxalq birliyin Azərbaycanın ərazi bütövlüyünü tam şəkildə və yerindəcə qəbul etməsinin əyani göstəricisidir.
Diplomatların Qarabağ Universitetində, Xankəndi Dəmir Yolu Kompleksində olması bu ərazilərin Azərbaycanın daxili idarəçilik sisteminə tam inteqrasiya edildiyini dünyaya nümayiş etdirir.
Səfərlər çərçivəsində diplomatlar Ağdərədəki Gəncəsər və Kəlbəcərdəki Xudavəng monastır komplekslərini ziyarət edirlər.
Diplomatik korpusa bu qədim xristian abidələrinin əsl tarixi-memarlıq xüsusiyyətləri, eləcə də işğal dövründə ermənilər tərəfindən məruz qaldığı müdaxilə, dəyişdirilmə və saxtalaşdırma faktları ilkin sənədlər və vizual sübutlarla göstərilir. Bu, xarici ölkələrin erməni təbliğatına olan inamını kökündən sarsıdır. Səfərlər diplomatlara Azərbaycanın üzləşdiyi kütləvi mina təhdidinin miqyasını göstərməklə yanaşı, Ermənistanın destruktiv siyasətini beynəlxalq hesabatlara daxil etmək üçün zəmin yaradır.
Xarici dövlət təmsilçilərinin ailələri və ya geniş heyətlərlə bu ərazilərdə rahat şəkildə hərəkət etməsi regionun artıq bir münaqişə zonası deyil, dinc və təhlükəsiz yaşayış məkanı olduğunu sübut edir.
Füzuli Beynəlxalq Hava Limanından başlayan səfərlər xarici dövlətlərə regionun beynəlxalq nəqliyyat-logistika qovşağına çevrildiyini bəyan edir.
Kəlbəcərdəki "İstisu" mineral su zavodunun fəaliyyəti, Bal festivalları və bərpa olunan enerji layihələri ilə tanışlıq xarici diplomatların timsalında böyük qlobal şirkətlərin Qarabağa investisiya yatırmaq marağını stimullaşdırır.
Bu səfərlərin sonradan açılan ən böyük tərəfi ondan ibarətdir ki, Azərbaycan Ermənistanın və onun xaricdəki havadarlarının apardığı "etnik təmizləmə" və "mədəni soyqırım" miflərini diplomatların öz gözləri qarşısında darmadağın edir. Yerində görülən tikinti-quruculuq işləri, tarixi abidələrin restavrasiyası və mülki həyatın bərpası Azərbaycanın bölgəyə sülh, sabitlik və inkişaf gətirən tərəf olduğunu beynəlxalq siyasi elitaya birdəfəlik diktə edir.
Qeyd edək ki, iki günlük səfər Azərbaycan Prezidentinin köməkçisi Hikmət Hacıyevin rəhbərliyi ilə gerçəkləşib.
Diplomatik korpus nümayəndələrinin azad Qarabağa səfərlırinin əhəmiyyəti nədir?
Politoloq Sahil Kərimli baki-xeber.com-a bildirdi ki, diplomatik korpus nümayəndələrinin işğaldan azad olunmuş ərazilərə-Qarabağa və Şərqi Zənəzura səfərləri çox böyük əhəmiyyətə malikdir. “Ərazilərimiz işğaldan yeni azad olunan dövrdə də diplomatik korpus nümayəndələrinin azad olmuş ərazilərə bir neçə səfəri təşkil oldundu. Əgər Azərbaycanda fəaliyyət göstərən diplomatik korpus nümayəndələrinin azad olunmuş ərazilərə ilk səfərləri daha çox erməni vəhşiliyinin, vandalizminin, Azərbaycan ərazilərinin dağıdılmasının, kütləvi şəkildə məhv edilməsinin, daşın daş üstə qoyulmamasının göstərilməsi kimi xarakterizə olunurdusa, amma son səfərlərin mahiyyəti fərqlidir. Son dövrlərdə Azərbaycan dövlətinin həyata keçirdiyi sıfırdan quruculuq-bərpa işləri, meqa layihələr, nəhəng infrastruktur, sosial obyektlərin inşaası, abadılıq işlərinin görülməsi ilə yanaşı azad olunmuş ərazilərə Böyük Qaydış prosesinin başlanması və uğurla davam etdirilməsi kimi məsələlər var. Artıq Azərbaycan dövlətinin keçmiş məcburi köçkünləri öz ata-baba yurdlarına qaytarması, onların orada necə həvəslə, sevgi ilə məskunlaşması əlbəttə, diplomatik korpus nümayəndələrinin bu səfəri zamanı bir daha müşahidə olundu. Eyni zamanda azad olunmuş ərazilərdə fəaliyyət göstərən infrastruktur obyektləri, müasir sosial obyektlərin tikilməsi, yeni iş yerlərinin açılması, müəssisələrin, istehsalat sahələrinin fəaliyyətə başlaması və bu gün öz işini uğurla davam etdirməsi də xarici diplomatların gözləri ilə gördükləri bir mənzərə oldu. Hesab edirəm ki, diplomatların bu səfəri bütün istiqamətlərdə böyük əhəmiyyətə malikdir. Azərbaycan dövlətinin Qarabağın və Şərqi Zəngəzurun bərpa ediliməsi ilə bağlı öz iqtisadi imkanları ilə həyata keçirdiyi işlər bir daha diplomatik korpus nümayəndələrinə göstərildi”.
S.Kərimli vurğuladı ki, diplomatlar həmçinin Qarabağın və Şərqi Zəngəzurun füsunkar təbiətini bir daha gördülər, bu bölgələrimizin tamamilə yenidən qurulduğunun, simasının necə dəyişdiyinin şahidi oldular. “Bu səfər eyni zamanda beynəlxalq birliyin Azərbaycanın ərazi bütövlüyünü tam şəkildə qəbul etdiyini göstərir.
Bu cür səfərlər gələcəkdə də davam etdirələcək. Çünki azad olunan ərazilərdə işlər daha da irəliyə aparılır, günü gündən azad ərazilərə yeni sima verilir. Gələcəkdə də bu cür səfərlərin təşkili Azərbaycanla bağlı həmin ölkələrdə müsbət təəssüratların yaradılması, ölkəmizin o bölgələrdə həyata keçirdiyi sosial siyasətin təbliğatı baxımından da çox böyük önəm daşıyır”-deyə S.Kərimli vurğuladı.
İradə SARIYEVA
