Samir Hümbətov: “Çinin Rusiya üzərində kifayət qədər təsir imkanları var”
Rusiya prezidentinin mətbuat katibi Dmitri Peskovun sözlərinə görə, BRICS sammiti çərçivəsində Rusiya prezidenti Vladimir Putinlə təmasları zamanı Hindistanın Baş naziri Narendra Modi və Çin prezidenti Si Cinpin Ukraynada nizamlanmanın asanlaşdırılması üçün xidmətlərini fəal şəkildə təklif ediblər.
“İkitərəfli təmasları zamanı Modi və Si Cinpin Ukrayna nizamlanmasına böyük maraq göstəriblər və həll yolunun axtarışını asanlaşdırmaq üçün fəal şəkildə xoşməramlı olduqlarını bildiriblər. Putin bu istəyi alqışlayıb və vəziyyətlə bağlı ətraflı məlumat verib", - Peskov jurnalistlərə bildirib.
Çin və hind liderləri Putinə təsir göstərə, onun qarşısında dura bilərlər?
Beynəlxalq Münasibətlər və Diplomatiya Araşdırmaları Mərkəzinin rəhbəri, politoloq Samir Hümbətov baki-xeber.com-a bildirdi ki, Rusiya Çindən ciddi şəkildə ehtiyat edir. “Bunu özləri də bilirlər. Çinin Rusiya üzərində kifayət qədər təsir imkanları var. Ancaq sual odur ki, Çin özü Rusiya və Ukrayana müharibəsinin bitməsini və Rusiyanın özünü toparlamasını nə qədər istəyir? Halbuki, Rusiyanın zəifləməsi Çin üçün daha məqbul sayılır. Əslində, bu müharibədə Çinin iki avantajı var. Birincisi, Rusiya zəifləyir və ondan daha çox aslı olur. İkincisi, Ukrayana zəifləyir və Çinin təsiri altına düşür. Ona görə də düşünürəm ki, Rusiya faktoru təkcə bununla bitmir, Çin bütün bölgəyə təsir edə bilir. Ancaq Çin bunu ürəkdən istəyirmi, edəcəkmi, bax bu bir az müzakirə predmetidir.
Mən Hindistanı demirəm, çünki Hindistan elə də ciddi təsirə malik ölkə deyil. Amma Çin kifayət qədər təsirə malikdir. Hesab edirəm ki, Çin Rusiyaya kifayət qədər təsir edə bilər”.
S.Hümbətov hesab edir ki, burada maraqlı məqam Çinin bunu nə qədər istəməsidir. O, qeyd etdi ki, burada bir maraqlı məqam da var. “Bu müharibə Rusiya və Ukraynanı təkcə Çinin aslılığına salımır, həm də Avropanın, dolayısı ilə ABŞ-ın bu müharibədə iştirakı dolayısı ilə Çindən aslılığı daha da artırır. Yəni bu müharibənin qazanclı çıxan tək ölkəsi bəlkə də Çin olduğunu deyə bilərik. Hindistan da onun yanında müəyyən qazanc əldə edə bilər. Ancaq əsas Çindir. Ona görə də Çin müharibənin bitməsinin tərəfdarı olduğunu çox da göstərmək istəmir”-deyə S.Hümbətov vurğuladı.
İradə SARIYEVA
