Cəmiyyətin elə bir üzvü çətin tapılar ki, ölkənin orta təhsil mənzərəsini müzakirə etməmiş olsun. Demək olar ki, hər ailədə bu mövzu ətrafında söhbətlər aparılır. Son zamanlar orta təhsil sahəsində ən çox müzakirə edilən məsələlərdən biri müəllimlərin, təhsilverənlərin, xüsusən də məktəblərə rəhbərlik edən şəxslərin səviyyəsi ilə bağlıdır.
Təhsilin səviyyəsi vaxtaşırı olaraq Milli Məsclisdə də müzakirə olunur.
“Müstəqilliyin ilk illərində ölkədə çobanlar məktəblərə direktor təyin olunurdu. Bunu edənlər də bu gün xalqdan, millətdən danışanlardır. Bu gün məktəb rəhbərlərinin çoxu yerində deyil. Direktor tapşırıqla təyin olunursa, adını yaza bilməyənin biri məktəbi idarə edirsə həmin təhsil müəssisəsində keyfiyyətli tədris gözləmək olmaz”. Mətbuatın əldə etdiyi məlumata görə, bunu deputat Musa Qasımlı Milli Məclisdə "Dövlət ümumtəhsil müəssisələrində işləyən təhsil verənlərin sertifikarlaşdırılması" mövzusunda keçirilən ictimai dinləmədə çıxışı zamanı deyib. "Təhsili sağlamlaşdırmağın adı nədir? Bu sertifikasiyadır. Valideyn-məktəb əlaqəsi gücləndirilməlidir. Əgər bu gün təhsilin sağlamlaşdırılması üçün addımlar atılmasa vəziyyət bir neçə ildən sonra heç də ürəkaçan olmayacaq. Təhsilə kənar adamları, kiminsə qohumlarını gətirmək olmaz. Elm və Təhsil Nazirliyinin təhsilin sağlamlaşdırılması istiqamətində atdığı addımları alqışlayıram "-deyə M. Qasımlı qeyd edib. Milli Məclisin Elm və Təhsil Komitəsinin sədri Bəxtiyar Əliyev isə deputat Musa Qasımlının səsləndirdiyi fikirlərə "Musa müəllim, bizi heç bir fəlakət gözləmir"- cavabını verib.
Bu iki deputatın hansı düz deyir? Bizim təhsilimizi gələcəkdə fəlakət gözləyir, yoxsa hər şey yaxşı olacaq?
“Əgər belə idisə, çobanlara qarşı niyə vaxtında üsyan səsini qaldırmırdılar?”
Mövzuya şərh verən filologiya üzrə fəlsəfə doktoru, dosent Vüsalə Ağabəyli baki-xeber.com-a şərhində bildirdi ki, birinci deputatın fikri ilə razılaşmaq olmaz. “Mən bu fikirlə heç cür razı deyiləm. Əksinə, müstəqilliyin ilk illərində fəaliyyət göstərən məktəb direktorları daha çox əziyyət çəkib indiki direktorlarla müqayisədə. İşığın, qazın, suyun əhaliyə limitlə verildiyi dövrlərdə, məktəblərin heç bir texnoloji vəsaitlə təmin olunmadığı, dərsliklərin, dərs vəsaitlərinin tapılmadığı, heç kserokopiya aparatlarının olmadığı bir dövrdə məktəblərə rəhbərlik edən çoxsaylı vicdanlı, savadlı və fədakar məktəb direktorunu nümunə gətirmək olar. Şəxsən tanıdığım bir çox direktorlar və müəllimlər var, öz evindən məktəbə odun daşıyan, öz kitabını şagirdlərə paylayan, lampa işığında heç bir maddi vəsait ummadan dərs keçən. Yaxşılara niyə qiymət verə bilmirik? İndi hər şey hazır vəziyyətdədir, danışmaq belə asan gəlir? Əgər belə idisə, çobanlara qarşı niyə vaxtında üsyan səsini qaldırmırdılar? Çünki çobanlar indi daha da çoxalıb. Diqqəti təhsilin real problemindən kənara yayındırmaq məqsədilə bu cür mənasız fikirlər atılır ortaya. Ümumiyyətlə, bu fikir yürüdən insanların özlərinə baxmaq lazımdır ki, səriştəli və kompetent adamlardır, ya yox. Onların verdikləri təklif nədən ibarətdir? Niyə bugün bizləri narahat edən təhsil sistemini kölgədə qoyub, bunu müzakirə etmək əvəzinə söhbəti keçmişə və ya lazımsız məsələlərə daşıyırıq? Əslində müəllimlərin sertifikasiyası məsələsi də bütövlükdə təhsil sistemində olan boşluqları və problemləri ört-basdır etmək üçün ortaya atılıb. Bəyəm bu boyda problem təkcə müəllimin sertifikasiya imtahanından asılıdır?”. Dosentin fikrincə, bu gün təhsil sisteminin bir parçası olan müəllimdə problem varsa, bu da özü-özlüyündə təhsil sisteminin problemidir. Alim hesab edir ki, sistemdəki boşluqları doldurmaq üçün təkliflər vermək lazımdır.
İradə SARIYEVA
