Məlum olduğu kimi, müəllimlər bir neçə ildən bir sertifikasiyadan keçir. Sertifikasiyadan uğurla keçən müəllimlərlə yanaşı uğursuzluğa düçar olan müəllimlər də az deyil.
Elm və təhsil naziri Emin Əmrullayev Milli Məclisdə “Dövlət ümumtəhsil müəssisələrində işləyən təhsilverənlərin sertifikatlaşdırılması” mövzusunda keçirilən ictimai dinləmədə çıxışı zamanı bildirdi ki, sertifikasiya imtahanında iştirak edən hər 4 müəllimdən 3-ü öz fənnindən minimal biliklərə sahibdir. İmtahandan keçən müəllimlərin 49 %-nin əmək haqlarına 10 %, 27 %-nin maaşına isə 35 % əlavə olunub: “İmtahanda iştirak edən hər 4 müəllimdən biri, yəni 24 %-i minimal balı toplaya bilməyib. Yəni onlar ən sadə suallara belə cavab verə bilməyiblər”.
Maraqlıdır, qəbul imtahanlarında yüksək bal toplayıb ali məktəbə daxil olan tələbələrin məzun olduqda təhsil səviyyələri öz peşələrini icra etməyə imkan vermir? Burada günahkar onlara 4 il təhsil verən ali təhsil ocağıdır, yoxsa başqa səbəblər var?
Elçin Əfəndi: “Qarşılarına çıxan primitiv suallara belə cavab verə bilmirlər”
Təhsil eksperti Elçin Əfəndi bildirdi ki, 40-a yaxın müəllim 0-9 arası bal toplayıb. 2368 nəfər 0-29 bal aralığı nəticə göstərib: “Təəssüf ki, bu sahədə qeydə alınan görüntü ürəkaçan deyil və çox bərbad nəticədir. Əslində, onların öz ixtisasları üzrə biliklərinin zəif olmasına birbaşa dəlalət edir. Müəllimlərin yaş arealına baxsaq, istənilən yaş areallarında var. Bu da o deməkdir ki, onlar ixtisasları barədə müfəssəl biliyə sahib deyillər, yəni mükəmməl şəkildə öyrənməyiblər. Qarşılarına çıxan primitiv suallara belə cavab verə bilmirlər. Elə suallar var ki, sözün sadə və ya mürəkkəb olduğunu bilmirlər. Buna baxmayaraq ibtidai sinifdə dərs deyirlər. Yaxud da ki, riyazi məsələləri həll edə bilmirlər, amma ibtidai siniflərə dərs deyirlər. Təbii ki, bütün bunların olmaması üçün də məhz bu sertifikasiya keçirilir. Bu kimi müəllimlərə bir il də şans verilir. Təbii ki, onlar artıq növbəti şanslarını istifadə edə bilmədikləri halda tamamilə tədris prosesindən uzaqlaşdırılacaqlar. Bu da onu düşünməyə əsas verir ki, artıq övladlarımız daha savadlı müəllimlərin əhatəsində olacaq”.
Nizami Hüseynov: “Sertifikasiya prosesində zəif iştirak edirsə və ya bəsit suallara belə cavab verməkdə çətinlik çəkirsə, o pedaqoq şagirdlərə nə öyrədəcək?”
Təhsil eksperti Nizami Hüseynov bildirdi ki, müəllim əməyinin stimullaşdırılması nəinki lazımdır, hətta vacibdir: “Sertifikasiyanın məqsədi kimisə işdən çıxarmaq yox, onları daim inkişafda saxlamaqdır. Birinci il keçməyən müəllimlər, il ərzində ikinci dəfə sertifikatlaşdırmadan keçə bilər. Sertifikasiyada yaş həddi də nəzərə alınacaq. Məlumdur ki, işə yeni qəbul olan müəllimlər 5 il sertifikasiya olmayacaqlar, yuxarı yaş həddində olan müəllimlər də yəqin ki, ilk mərhələdə sertifikatlaşdırmadan keçməyəcəklər. Prosesə cəlb olunacaq pedoqoji heyət üçün sınaqlar keçiriləcək. Sertifikasiyanın məqsədi kimisə işdən çıxarmaq deyil, müəllimləri daim inkişafda saxlamaqdır. İstər diaqnostika olsun, istər attestasiya və ya sertifikasiya – qiymətləndirmə olub və olmalıdır”.
Ekspert bildirdi ki, təhsilverənlərin dövrün tələblərinə cavab verməsi üçün onların sertifikasiyasının keçirilməsi olduqca vacib məsələlərdən biridir. Təhsilverənlərin sertifikasiyasının keçirilməsi müəllimlərə müəyyən imkanlar yaradacaq. Bu da müəllimlər üçün olduqca vacibdir: “Sertifikasiya prosesində zəif iştirak edirsə və ya bəsit sualara belə cavab verməkdə çətinlik çəkirsə o pedaqoq şagirdlərə nə öyrədəcək?”
Günel CƏLİLOVA
