Son dövrlər təhsil sahəsində xeyli dəyişikliyin baş verdiyini görürük. Bu da məlumdur ki, dəyişikliyin əsas mərkəzində müəllimlər, onların fəaliyyəti dayanır. MİQ, sertifikasiya imtahanları, onlardan əvvəl dioqnostik qiymətləndirmə prosesi bu qəbildəndir. Müəllim işləmək istəyənlərlə, yaxud müəllimlərlə bağlı elə qərarlara rast gəlirik ki, mütləq mənada onun geniş izahına ehtiyac olur.
Yeniliklərdən biri də müəllimlərin əməkhaqqı məsələsi ilə bağlıdır.
Elm və təhsil naziri Emin Əmrullayev Milli Məclisdə “Dövlət ümumtəhsil müəssisələrində işləyən təhsilverənlərin sertifikatlaşdırılması” mövzusunda keçirilən ictimai dinləmədə səsləndirilən suallara cavabında “Sertifikasiya imtahanları nəticəsində bir sıra islahatlar həyata keçiriləcək. Misal olaraq, bölgülər olacaq və ona uyğun da əməkhaqqı artırıla bilər. Yəni müəllim həm təhsilverən, həm də metodist kimi əməkhaqqı alacaq”-deyib.
Onun sözlərinə görə, eyni zamanda sertifikasiya yekunlaşandan sonra təhsil işçilərinin digər bacarıqlarının yoxlanılmasına fokuslanacaq:“Məqsədimiz odur ki, sertifikasiyadan keçməyən müəllim şagirdlərə dərs deməsin, amma işdən də çıxmasın”.
Müəllimlərin iki cür əmək haqqı alması necə tənzimlənəcək?
“Elm və təhsil naziri eyhamla bildirdi ki, gələcəkdə...”
Məsələyə şərh verən tanınmış təhsil eksperti Elşən Qafarov “Bakı-Xəbər”ə şərhində bildirdi ki, Təhsilin İnkişafı üzrə Dövlət Strategiyasında müəllimlərin diferensiallaşmış əməkhaqqı sisteminə keçidi nəzərdə tutulur. “İlk olaraq sertifikasiyadan keçmiş müəllimlərlə bağlı Nazirlər Kabinetinin 231 saylı 24 avqust tarixli qərarına əsasən, sertifikasiyadan keçən, 50 faizdən çox bal toplayan müəllimlərin əməkhaqqının 10 faiz, 91-100 faiz bal toplayanların isə 35 faiz artırılması nəzərdə tutulur. Bu sertifikasiyanın mahiyyəti nədən ibarətdir? Müəllimlərin peşə yararlılığı və peşəkarlıq səviyyəsi. Cənab nazirin də bildirdiyi kimi, gələcəkdə onların metodiki biliklərinin xüsusi yoxlanılması və sair prosesi olacaq. Düşünürəm ki, bunlar hamısı bir yerdə olsaydı daha yaxşı olardı. Bizdə sertifikasiya hələ birinci ildir keçirildiyi üçün, fikrimcə, elm və təhsil nazirliyi bu məsələyə bir az ehtiyatla yanaşır. Müəllimlərin peşəkarlıq səviyyəsini müəyyən edən kriteriyalar olmalıdır. Biz bunu beynəlxalq təcrübədən də götürə bilərik, öz təcrübəmizi də yarada bilərik. Çünki sertifikasiya müəllimlərin peşəkarlıq səviyyəsini müəyyən edir. Peşəkarlıq səviyyəsini yoxlanılması mexanizmləri yoxdur. Elm və təhsil naziri eyhamla bildirdi ki, gələcəkdə onların metodiki bilikləri də yoxlanılacaq. Yəqin ki, həmin peşəkarlıq səviyyəsinin yoxlanılması ilə bağlı mexanizmlərin yaradılacağına işarə edir. Ümumilikdə, müəllimin biliyi təkcə onun tədris etdiyi fənn üzrə yox, bir neçə kriteriya üzrə yoxlanılmalıdır. Təbii ki, tədris etdikləri fənn üzrə bilikləri ilə yanaşı metodiki bilikləri də yoxanılmalıdr”.
E.Qafarovun sözlərinə görə, müəllim ilk növbədə müəllimdir, onun pedoqoji-psixoloji bilikləri, müasir təlim metodlarından və strategiyalarından istifadə etmək bacarığı, günümüzün tələblərinə uyğun olaraq şərti bilikləri yoxlanılmadır. Ekspert hesab edir ki, bunlar kifayət qədər böyük yoxlama prosedurudur. “Sertifikasiya ilk təcrübəmiz olduğu üçün, düşünürəm ki, növbəti mərhələlərdə peşəkarlıq səviyyəsini müəyyən edən mexanizmlər yaradılacaq və bunsuz sertifikasiyanı tamamlamaq mümkün deyil”-deyə E.Qafarov vurğuladı.
İradə SARIYEVA
