Azərbaycan Dövlət İqtisad Universitetində (UNEC) tələbələrlə tiktokerlərin görüşü təşkil olunub. Universitetin akt zalında keçirilən görüşdən video sosial şəbəkədə yayılıb. Görüntüdə tələbələrin onları coşqu ilə alqışladığı əks edilib.
Qeyd edək ki, bu görüş sosial şəbəkədə tənqid edilib. İstifadəçilər nüfuzlu ali təhsil müəssisəsində tələbələrin tiktokerlərlə görüşünü düzgün hesab etməyiblər. Tələbələrin isə tiktokerləri alqışlaması biabırçılıq adlandırılıb. Onların gənclərə nə məsləhət verə biləcəyi qınanılıb.
Könül İsmayılova: “Tələbələrlə görüşə gələn tiktokerlər onlara hansı elmdən, bilikdən, dəyərdən danışıb?”
Psixoloq Könül İsmayılova bildirdi ki, tiktokerlərin universitetə dəvət olunması düzgün deyil. Universitet ali təhsil müəssisəsidir və tək məqsədi tələbələrə təhsil vermək, milli-mənəvi dəyərləri öyrətməkdir: “Maraqlıdır, tələbələrlə görüşə gələn tiktokerlər onlara hansı elmdən, bilikdən, dəyərdən danışıb? Ümumiyyətlə, bu görüşü keçirmək tələbələrə hansı savad verəcək? Tiktokerlərin tələbələrlə görüşü İqtisad Universitetində baş tutub. Onları görüşə dəvət edən şəxslər tiktokerlərin iqtisadiyyatdan anlayışı olduğunu araşdırıblarmı? Adətən İqtisadiyyat Universitetinin tələbələri ilə görüşə gələnlər iqtisadiyyatdan, auditdən, vergidən danışmalıdır. Ancaq bizim tiktokerlərin iqtisadiyyatdan anlayışları sıfırdır”.
Psixoloq onu da əlavə etdi ki, "TikTok" sosial və təhlükəsizlik problemləri yaratmaqla yanaşı, cəmiyyətdə, xüsusən uşaqlarda ciddi psixoloji fəsadlar da törədir. Bu şəbəkə insan psixologiyasına çox təsir edir: “Texnologiya inkişaf etdikcə, hər kəs bu vasitələrdən istifadə etməklə, bir-birini çəkib paylaşır və həmçinin bu yolla şantaja əl atır. Bu da şantaj olunan tərəfin hətta intiharına qədər gətirib çıxarır".
Psixoloq qeyd edir ki, videonu çəkən tərəflərə sosial şəbəkədə əylənmək, gülmək üçün material lazımdır. Onlar həmin görüntüləri insanların düşdüyü qəribə vəziyyət, hər hansısa sözü düzgün deməməsi, nəyisə səhv başa düşməsi kimi hallarda çəkirlər və bu da həmin şəxsi ələ salmaq üçün materiala çevrilir. Beləliklə, video yayımlanır və başqaları tərəfindən tez-tez paylaşılır. Bu "yumoristik" yanaşmanın təhlükələri çoxdur. Çünki burada ələ salınan insanın yaxınları da bu videoya baxır, vəziyyətdən utanır, hətta depressiyaya düşürlər. Bu baxımdan bir insanı ələ salanda mütləq nəticəsini, həmin şəxsə hansı travma yaşadacağını düşünmək lazımdır”.
Həmsöhbətimiz hesab edir ki, bu gün tələbəyə təhsil vermək lazımdır. Tələbələrlə görüş təşkil olunursa öz sahələrində sözünü demiş nüfuzlu adamlarla görüş keçirilməlidir: “Ömründə bir kitab oxumayan, ali təhsili olmayan, “TikTok” vasitəsilə söyüş söyənlər tələbələrə nə örnək olacaq?! O tiktokerlər tələbələrə gedib canlı yayım açıb söyüş söyməyi, təhqir etməyi öyrədəcəklər?! Azərbaycanda qeyd edilən sosial şəbəkədən yalnız pul qazanmaq və əyləncə üçün istifadə edilir. Canlı yayım açıb kimlərisə təhqir edir və bununla da onlar özlərini qəhrəman sanırlar”.
Psixoloqun sözlərinə görə, cəmiyyətə heç bir faydası olmayan, sadəcə insanları güldürməklə və ya söyüş söyməklə məşğul olan insanların diqqət mərkəzində saxlanılması düzgün deyil.
Osman Gündüz: “Son zamanlar çox doğru olaraq dövlət mediası və TV-lər də bu sosial platformaya inteqrasiya edir”
Azərbaycan İnternet Forumunun Prezidenti Osman Gündüz bildirdi ki, hazırda “TikTok” Azərbaycanın informasiya mühitində xüsusi yer tutur. Milyonlarla istifadəçisi var. Artıq onun üzərində bizneslər qurulur. Marketinq aləti olaraq və tanıtım üçün effektiv istifadə olunur: “Baxıram ki, son zamanlar çox doğru olaraq dövlət mediası və TV-lər də bu sosial platformaya inteqrasiya edir. Belə bir anda UNEC-i, universitetləri “TikTok”dan kənar tutmaq çağırışları doğru bir yanaşma olmazdı”.
Günel CƏLİLOVA
