Dünyanın bir çox ölkəsində oktyabrın 31-də Hellouin (Halloween) qeyd edilir. Həmin gün gənclər və uşaqlar qorxulu kostyum geyinir, qapı-qapı gəzərək şirniyyat yığırlar. “Hellouin” bayramını digər bayramlardan fərqləndirən əsas əlamət həmin gün insanların bir-birindən maraqlı, qeyri-adi qiyafələr geyinməklə bir yerə toplaşmasıdır. Bəziləri düşünür ki, həmin gün “o dünya” və bu dünya arasındakı darvazalar açılır. İnsanlar ölmüş yaxınları ilə birlikdə dünyaya gəlmək istəyən ziyanverici ruhları qorxutmaq üçün iyrənc makiyajlar edir, qorxuducu qiyafələr geyinirlər.
Azərbaycanda isə “Hellouin” mübahisəli bayram sayılır. Bir çoxları, bu bayramın bizə yad olduğunu əsas gətirərək onun belə təmtəraqla qeyd olunmasına etiraz edir. Ən əsası isə, bu bayramın uşaqlara mənfi təsirləri vurğulanır.
Qeyd etdiyimiz kimi, bu bayram ölkəmizdə də qeyd olunur. Xüsusilə bəzi məktəb və uşaq bağçalarında müxtəlif qorxulu, vahiməli kostyumlər geyinib “şənlik” təşkil edirlər. Həmin qorxulu geyimlər isə uşaqlarn psixologiyasına təsir edir. Bu günlərdə Bakıda “Malvina” uşaq bağçasında keçirilən “Hellouin” tədbiri zamanı çəkilən qorxunc foto sosial şəbəkələrdə gündəm yaradıb. Foto istifadəçilər tərəfindən ciddi qınaq obyektinə çevrilib. Şəkildə “Hellouin” bayramından çəkilmiş başı kəsilmiş maket təsvir edilib.
“Malvina” uşaq bağçası: “Bu şəkil 6 il əvvələ aiddir və bizim bağçamızda çəkilməyib”
Məsələ ilə bağlı “Malvina” uşaq bağçasından bildirildi ki, həmin şəkil onların bağçasında çəkilməyib: “Bu şəkil 6 il əvvələ aiddir və bizim bağçamızda çəkilməyib. Hansısa bir evdə çəkilən şəkli bizim adımızdan yayımlayırlar. Biz 6 il əvvəl bununla bağlı televiziyalara da açıqlama vermişik. Araşdırmaq lazımdır ki, görəsən, kimdir bizə qara yaxmaq istəyən. “Hellouin” 6 ildir bizim müəssisəmizdə qeyd olunmur”.
Könül İsmayılova: “Hellouin” aqressiyanın normal qəbulu, çirkin görüntünün bir növ cəmiyyətə aşılanmasıdır”
Psixoloq Könül İsmayılova bildirdi ki, zaman keçdikcə Azərbaycanda “Hellouin” bayramını qeyd edənlərin sayında artım müşahidə edilir: “Hər bir bayramın, adət-ənənənin soykökü var və bu, millətin oturuşmuş dəyərləridir. “Hellouin” bayramının bizimlə yaxından-uzaqdan heç bir əlaqəsi olmadığını nəzərə almaq lazımdır. “Hellouin” bayramında görüntü bərbaddır, qorxuncdur və şüuraltı qorxunu əks etdirir, bu bir az da aqressiyanın normal qəbul edilməsinə gətirib çıxarır. Halbuki, biz həmişə uşaqların şəxsiyyətinin formalaşdırılması zamanı onlara cəmiyyətə qarşı mehriban olmağı təlqin edirik, empatiya bacarığının inkişafına çalışırıq və s. Bəs bu bayram nəyi təlqin edir? “Hellouin” aqressiyanın normal qəbulu, çirkin görüntünün bir növ cəmiyyətə aşılanmasıdır”.
Psixoloqun sözlərinə görə, Azərbaycan xalqının mentalitetində başqasına edilən şiddət, aqressiya qəbul edilmir: “Misal olaraq, Novruz bayramı, başqa dini bayramları göstərmək mümkündür. Maraqlıdır ki, Qurban bayramı və ya digər bu kimi bayramlar zamanı narazılığını bildirənlər, lağa qoyanlar “Hellouin” kimi bayrama qarşı durmurlar və adi qəbul edirlər. Hətta Məhərrəmlikdə savadsız dindarların baş yarmağı, al qan içində olmağına aqressiya göstərən kütlə “Hellouin” bayramına eyni münasibətdə olmur. Biz niyə nələrisə oyuncaqlarla uşaqlara təlqin edirik? Çünki onlar görüb-götürürlər. Əgər biz başı yarılmış insana alışsaq, bu bizə adi gələcək. Getdikcə bu tempdə böyüyən uşaqlar da aqressiyaya, şiddətə adi yanaşacaqlar. Bu baxımdan mən qəti şəkildə “Hellouin” bayramının tərəfdarı deyiləm. Hər hansı bir adətin müsbət məramı yoxdursa, o bayramın keçirilməsinin əleyhinəyəm. Müsbət olmayan şeylərin mütləq mənfi nəticələri də var”.
Günel CƏLİLOVA
