Xəbər verildiyi kimi, Nizami Rayon Polis İdarəsinin Post Patrul Xidmətinin əməkdaşı ondan şikayət üçün 24-cü Polis Şöbəsinə gedən həyat yoldaşı Xanım Məmmədovanın orada olması barədə məlumat alıb. Daha sonra İsmayıl Məmmədov həmin şöbəyə gələrək arvadını xidməti silahı ilə güllələyərək öldürüb.
Bu hadisədən sonra sosial şəbəkələrdə ictimai şəxslər və fəallar polisin daxili işlər orqanlarına müraciət edən vətəndaşın təhlükəsizliyini və gizliliyini qorumadığını bildiriblər. Vətəndaşlar qadının polis şöbəsində olarkən onun ərinə məlumat verilməsini qadının həyatını təhlükəyə atmaq kimi qiymətləndiriblər. Bir sıra şəxslər isə ümumiyyətlə bu hadisəyə görə bütün polis sistemini hədəfə alıblar. Məlumdur ki, cəmiyyətdə istənilən sosial statusda olan şəxslər tərəfindən cinayətlər törədilir. Konkret bir fərdin əməlinə görə bütöv bir polis sistemini hədəfə almaq doğrudurmu?
Qeyd edək ki, 1988-ci il təvəllüdlü İ.Məmmədov əslən Xocalı rayonundandır. Atası, Məmmədov Vaqif Şamil oğlu Birinci Qarabağ müharibəsində şəhid olub. İsmayıl Məmmədovun bir neçə il öncə polis sıralarına atası şəhid olduğu üçün götürüldüyü deyilir.
Hüquqşunas Şəmsəddin Əliyev “Bakı-Xəbər”ə açıqlamasında bildirdi ki, son zamanlar məişət zorakılığı zəminində münaqişələrin sayında artım müşahidə olunur: “Bunun səbəbini polisdə, məhkəmədə axtarmağa lüzum yoxdur. Bu bütün dünyada mövcuddur. Biz əvvəlcə bu cür hadisələrin qarşısını ala biləcək addımlar barədə düşünməliyik. Ailə münaqişəsini doğuran səbəblər dərindən tədqiq olunmalıdır. Ailə, Qadın və Uşaq Problemləri üzrə Komitə birbaşa belə işlərlə məşğul olmalıdır. Cəmiyyətin əsas özəyi olan ailə dövlətin himayəsindədirsə, deməli bu cür hallarla bağlı müəyyən tədbirlər həyata keçirilməlidir. Hazırda qüvvədə olan qanunvericilikdə boşluqlar var. Bu cür hadisələrlə bağlı zərərçəkənlərin hüquqları təsbit olunan qanuni müddəalar mövcuddur. Hansısa hakim həyat yoldaşını gülələyirsə, bunu bütün məhkəmə hakimiyyətinə şamil etmək doğru olmaz. Polis xidməti silahla həyat yoldaşını qətlə yetirirsə, bunu da bütün polisin adına mənfi hal kimi yazmaq olmaz. İnsan alveri, intiharlar, məişət zorakılıqları bütün dünyada var. Fərqi yoxdur, həmin tendensiyalar hansı ailədə olur. Hər biri ilə mübarizə aparmalıdır. Bunu doğuran bir çox səbəblər ola bilər. Bunun polisin işi ilə birbaşa əlaqəsi yoxdur. Bütün əlaqədar qurumlar səfərbər olub, bu istiqamətdə mübarizə konsepsiyası ortaya qoymalıdır. Mən dəfələrlə demişəm ki, ailə institutu bizdə lazımınca qorunmur. Bütün bu halların tədqiq olunması ilə bağlı bir elmi-tədqiqiat institutunun yaradılmasına ehtiyac var. Bu bizə hava və su kimi lazımdır. Bütün dünya ölkələrində belə institutlar varsa, bizdə niyə olmasın? Belə arzuolunmaz şəraiti elmi dərəcədə öyrənmək lazımdır. Hər hansı cinayəti doğuran səbəbi araşdırmalıyıq, onun kimin tərəfindən edildiyini yox. Bu gün polis edirsə, sabah başqa statuslu adam edəcək. Məndə olan məlumata görə, qətlə yetirilən xanım öz anasına məlumat verib, ancaq ana deyib ki, onların ailə probleminə qarışmaq istəmir. Kimsə cavan ailənin kritik durumna kömək etməlidir. Özbaşına buraxılanda belə xoşagəlməz hallar olur. Əlaqədar qurumların koordinasion qaydada çalışması çox vacibdir ki, belə münasibətlər tənzimlənə bilsin. Bir hüquqşunas kimi hesab edirəm ki, belə amansız cinayətlərin qarşısnı almaq üçün mütləq mənada ölüm cəzasını qəbul etməliyik”.
Məhəmmədəli QƏRİBLİ
