“Bu gün sistemdə belə bir pozuntu nüansı var. Bunu işıqlandırmağınızı istəyirəm. Son bir neçə ildir ki, qanunla subbakalavrlara ixtiyar verilir ki, kollecləri bitirən kimi ümumi orta göstəricilərlə birbaşa ali məktəblərin uyğun ixtisasına sənəd versinlər. Yəni qanunla buna icazə verilir.
Bu subbakalavrlara qanunla verilən çox gözəl şansdır ki, kolleci bitirən kimi ali məktəblərə sənəd versinlər. Bu ilin iyul ayının 8-dən avqustun 10-na qədər subbakalavrlar ərizə verə bilərlər. Amma belə çıxır ki, bu oğlanlara yox, ancaq qızlara və “xüsusi imtiyazlı” oğlanlara aiddir. Niyə? Çünki hərbi komissarlıq oğlanlar kollecləri bitirər bitirməz onların adlarını çağırışçı kimi sistemə daxil edir və subbakalavrı bitirən oğlanlar da nəticədə ali məktəblərə sənəd verə bilmir”. Bunu baki-xeber.com-a filologiya üzrə fəlsəfə doktoru, dosent Vüsalə Ağabəyli bildirib.
V.Ağabəylinin sözlərinə görə, bu gün subbakalavrı bitirən oğlanlar ali məktəbə sənəd vermək məsələsində çox ciddi problemlərlə üzləşiblər. Bu barədə subbakalavrlar tərəfindən çoxlu şikayət edildiyini deyən V.Ağabəylinin bildirdiyinə görə, qanun oğlan subbakalavrların ali təhsil müəssisələrinə sənəd verməsinə imkan yaratsa da, subbakalavrı bitirən oğlanların ali məktəbə sənəd verməsində problem yaranır. “Qanun bir söz deyir, prosedur isə başqadır, burada ikili yanaşma var. Qanunda göstərilir ki, subbakalavrı bitirənlərin ali məktəbə sənəd vermək hüququ var, amma Hərbi Komissarlığın elektron sistemi həmin oğlanların elektron ərizə doldurmasına mane olur, sistem avtomatik olaraq donur, ona müdaxilə olunur. Subbakalavrların ali məktəbə sənəd verməsi üçün Hərbi Komissarlıq onlara möhlət vermir. Ona görə də, kollecləri bitirən oğlanların sənədləri əllərində qalıb, onların hüquqları pozulur. Halbuki, müvafiq qanunda göstərilir ki, subbakalavrlara ali məktəblərə sənəd vermələri üçün möhlət hüququ verilə bilər. Həmin möhlət hüququnun əsasında da subbakalavrlar haqqında məlumatlar hərbi komissarlıq tərəfindən sistemə daxil edilməlidir. Üzləşdiyi problemlə bağlı subbakalavrı bitirən oğlanlar çaşqın vəziyyətdə qalıblar. Bunlar kolleci bitiriblər və balları onların ali məktəblərə daxil olmasına imkan verir, amma sənəd verə bilmirlər. Səfərbərlik və Hərbi Xidmətə çağırış üzrə Dövlət Xidməti heç olmasa subbakalavrı bitirənlərə bir neçə ay möhlət verməlidir ki, onlar ali məktəbə sənəd versinlər, qəbul olmasalar aparsın. Heç kəs əsgəri xidmətə getməkdən boyun qaçırmır, sadəcə sənəd vermək istəyirlər, qəbul olsalar ali məktəbi bitirəndən sonra əsgərliyə gedəcəklər. Qanun buna imkan verdiyi halda bu cür ikili standartlarla yanaşmanın, ikibaşlı oyun aparmağın mənası nədir? Anlaşılan deyil” - deyə V.Ağabəyli qeyd etdi.
Ekspertin sözlərinə görə, sanki zəncirin həlqələri qırıla-qırıla gedir, bir tərəfdən düyün vurulur, başqa bir tərəfdən kəsik yaranır, çox müəmmalı vəziyyətdir. V.Ağabəylinin bildirdiyinə görə, Avropa ölkələrində də, qardaş Türkiyədə də təhsilə gələn, oxumaq istəyən adamın qarşısını kəsmirlər, əksinə ona yol açırlar ki, oxusun, bizdə isə əksinədir. “Son zamanlar subbakalavrlarla bağlı yaranan anlaşılmazlığa heç bir rəsmi qurum tərəfindən aydınlıq gətirilmir. İstər Təhsil Nazirliyi, istər Dövlət İmtahan Mərkəzi, istərsə də Səfərbərlik və Hərbi Xidmətə çağırış üzrə Dövlət Xidməti bu problemə münasibət bildirməyib. Təhsil Nazirliyinə müraciət ediləndə açıq şəkildə deyilir ki, bu Dövlət İmtahan Mərkəzinin problemidir. Dövlət İmtahan Mərkəzinə müraciət ediləndə onlar da “Səfərbərlik və Hərbi Xidmətə çağırış üzrə Dövlət Xidmətinin məsələsidir” deyirlər. Qanun, qayda tərtib olunanda bütün bu strukturların birgə fəaliyyəti nəzərə alınmalıdır. Yəni bir sıra oğlan subbakalavrlar var ki, sənədləri əllərində qalıb və onların ali təhsil almaq taleyi sual altındadır, çünki hərbi çağırışçı kimi adları sistemdədir. Halbuki, qanun onlara imkan verirdi ki, onlar universitetlərə sənəd versinlər. Ümid edirəm ki, əlaqədar qurumlar problemin aradan qaldırılması üçün müvafiq addımlar atacaq və Səfərbərlik və Hərbi Xidmətə çağırış üzrə Dövlət Xidməti subbakalavrlara möhlət verəcək” - deyə ekspert bildirdi.
İradə SARIYEVA
