Tarix İnstitutu 44 günlük müharibənin tarixini “elmi tarixləşdirməyə” nə vaxt başlayacaq...

img

44 günlük Vətən müharibəsində Azərbaycanın qazandığı qələbənin tarixləşdirilməsi, kitablara, monoqrafiyalara, elmi materiallara çevirilməsininvaxtı çoxdan çatıb. Azərbaycan tarixinin tamamilə yeni bir dövrünün əsasını qoyan Qarabağ zəfərinin ayrıca tarixləşməsinə ciddi ehtiyac var. Bu istiqamətdə heç şübhəsiz ki, alimlərimiz, tədqiqatçılarımız geniş fəaliyyət istiqamətləri üzrə tədqiqatlara başlamalıdır.

AMEA-nın A.Bakıxanov adına Tarix İnstitutunda Azərbaycan tarixinin ən yeni dövrünün əsasını qoyan 44 günlük müharibənin tarixinin yazılması istiqamətində nə kimi işlər görülür? Prosesə başlanılibmi?

  • Tarix İnstitutu: “Zəfər salnaməsi: Qarabağ savaşından Şuşa bəyannaməsinədək” adlı toplu…”

AMEA Tarix institutu İctimaiyyətlə əlaqələr şöbəsindən “Bakı-Xəbər”in sorğusuna cavab olaraq bildirildi ki, proses artıq başlanılıb: “AMEA Tarix institutunda Azərbaycanın müasir tarixinin kompleks şəkildə tədqiqi istiqamətində fundamental araşdırmalar aparılır. Tarix institutu AMEA Rəyasət Heyəti ilə birlikdə Azərbaycan Respublikasının Prezidenti İlham Əliyevin müharibə və post-müharibə dövrü fəaliyyətini əks etdirən “Zəfər salnaməsi: Qarabağ savaşından Şuşa bəyannaməsinədək” adlı toplu nəşrə hazırlayıb və çapa təqdim edib. Bu toplunun ən mühüm özəlliyi ondadır ki, Prezidentin çox istiqamətli fəaliyyətinin təsnifatı aparılıb. Kitabın 44 günlük müharibənin başlanmasının birinci ildönümünədək çap edilməsi və təqdimatının keçirilməsi nəzərdə tutulur.

Dövlət müstəqilliyinin bərpa edilməsi münasibətilə fundamental “Azərbaycan Respublikasının tarixi: 1991-2021” üç cildliyinin hazırlanması üzərində də iş davam edir. Kitabda həm birinci, həm də Vətən müharibəsi-İkinci Qarabağ müharibəsinin tarixi əksini tapacaqdır. Bununla eyni zamanda, bu il “Qarabağ müharibəsinin tarixi” adlı akademik nəşr də hazırlanır.

Tarix institutunda monoqrafik tədqiqatlar ilə birlikdə, Vətən müharibəsi-İkinci Qarabağ müharibəsinin tarixinin müxtəlif aspektlərinə dair tədqiqatlar da aparılır. Bu barədə respublika və beynəlxalq konfranslarda məruzələr nəzərdə tutulur”-deyə məlumatda qeyd edilir.

  • Məhərrəm Zülfüqarlı: “44 günlük Vətən müharibəsi tarixi çox yüksək səviyyədə yazılmalıdır və burada Azərbaycanın parlaq qələbəsi ifadə olunmalıdır”

AVCİYA-nın vitse-prezidenti, professor Məhərrəm Zülfüqarlı da hesab edir ki, Azərbaycan tarixçiləri, AMEA-nın Tarix İnstitutu, universitetlərin tarix kafedraları Vətən müharibəsi tarixini tam mükəmməl şəkildə yazmalıdır: “44 günlük Vətən müharibəsi tarixi çox yüksək səviyyədə yazılmalıdır və burada Azərbaycanın parlaq qələbəsi ifadə olunmalııdr. AMEA-nın Tarix İnstitutunun və universitetlərin əməkdaşları bu istiqamətdə tədqiqatlar aparmalı və bu tədqiqatları daha da genişləndirməlidir, kitablar yazmalıdırlar. Eyni zamanda bədii tarixi əsərlər də yazılmalı və rejissorlarımız bu əsərlər əsasında filmlər çəkməlidir. Bu işi görmək biz tarixçilərin, yazıçıların, incəsənət adamlarının işidir”.

M.Zülfüqarlının sözlərinə görə, bu mükəmməl tarixi yazmaq üçün böyük imkanlarımız var.

İradə SARIYEVA

Son xəbərlər