Bakı məktəblərində boş müəllim yeri yox, kənd məktəblərinə də gedən yox - nə edək...

Nizami Hüseynov: “Ucqar rayon məktəblərində çalışan müəllimlərin təminatı üçün dövlət tərəfindən xüsusi diqqət göstərilir”

img

Ölkədə təhsilin səviyyəsinin yüksəldilməsi, o cümlədən də müəllimlərin rifahının yaxşılaşdırılması istiqamətində bir sıra addımlar atılsa da, bölgələrdə, xüsusilə də ucqar kəndlərdə müəllim çatışmazlığı üzünü qabarıq şəkildə göstərməkdədir.

Ucqar bölgələrə şagirdlərə dərs keçmək üçün göndərilən müəllimlərin bir hissəsi də müəyyən vaxtdan sonra orada dayanmır və geri dönürlər.

Təhsil Nazirliyinin Ümumi təhsildə məzmun, tədris və qiymətləndirmə şöbəsinin müdiri Vəfa Yaqublu media nümayəndələrinə açıqlamasında qeyd edib ki, vakant yerlər daha çox ucqar ərazilərdəki məktəblərdə qalır: “Çünki bir çox namizəd imtahanda iştirak edir, ancaq müəyyən səbəblərdən işləmək istəmirlər. Buradan müəllim olmaq istəyən namizədlərə səslənirəm ki, doğrudan da ürəkdən müəllimlik peşəsinə yiyələnmək istəyənlər düşdüyü yerdən asılı olmayaraq işləsələr, yaxşı olar. Bu gün rayonlarda, dağ kəndlərinin məktəblərində vakant yerlər olsa da, namizədlərin əksəriyyəti ora işləmək üçün getmirlər. Bu gün əksəriyyət yaşadığı yerdə işləmək istəyir. Bu gün dövlət universitetlərinə tələbə qəbul edilərkən bu yerlər nəzərə alınır. Bakıda əhalinin sıx yaşadığı yerlərdə isə vakant yerlər məhduddur”.

Qeyd edək ki, gənc pedaqoqların rayonlara, ucqar bölgələrdə çalışması üçün müəyyən proqramlar həyata keçirilsə də, bu sahədə vəziyyət yenə də probem olaraq qalır. Müəllimlər ucqar ərazilərdə çalışmaqdan yayınır.

  • “Bəzi məktəblərdə ixtisaslı müəllim öz fənni ilə yanaşı, daha bir neçə digər fənni də tədris edir, nəticədə isə…”

Təhsil eksperti Nizami Hüseynov bildirdi ki, ölkədə son illərdə müəllimlərin işə qəbulu, onların sosial problemlərinin həlli istiqamətində mühüm addımlar atılıb: “Buna baxmayaraq, hələ ucqar kəndlərdə müəllim çatışmazlığı yaşanır. Bəzi məktəblərdə ixtisaslı müəllim öz fənni ilə yanaşı, daha bir neçə digər fənni də tədris edir. Nəticədə isə təhsilin keyfiyyəti aşağı düşür, şagirdlər və valideynlərin narazılığı yaranır. İstər Bakıda, istərsə də bölgələrdə rus bölməsi üzrə ciddi şəkildə kadr çatışmazlığı mövcuddur”.

Həmsöhbətimiz onu da əlavə etdi ki, ucqar rayon məktəblərində çalışan müəllimlərin təminatı üçün dövlət tərəfindən  xüsusi diqqət göstərilir. Bölgələrə tam ixtisaslı müəllimlər göndərilir. Onlara əlavə ödənişlər edilir, hər cür şəraitlə təmin olunurlar. Amma bu problem hələ də həll olmayıb. İxtisaslı kadrların azlığı o sahə üzrə şagirdlərin tələb olunan səviyyədə bilik və bacarıqlara sahib olmaması ilə nəticələnir: “Məhz ixtisaslı kadrların az olduğu və çatışmazlığının yaşandığı məktəblərin qəbul imtahanları nəticələrinə nəzər salanda görürük ki, o fənlər üzrə qəbul imtahanında göstəricilər aşağı səviyyədə olub”.

Günel CƏLİLOVA

Son xəbərlər