Məlum olduğu kimi, iyulun 18-də Lerikin dağlıq ərazisinə güclü yağış yağıb. Yağan güclü yağış nəticəsində yaranan sel Aşağı Amburdərə, Göydərə, Kəlvəz, Hüseynabad, Kələxan, Yuxarı Amburdərə və Qosmalyan inzibati ərazilərə ziyan vurub.
Sel nəticəsində təkcə Kələxan kənd sakini Xurşud Məmmədovun azı 50 sot taxıl zəmisi, ot tayaları məhv olub. Anbarı, heyvan saxlayan tövləsi yararsız hala düşüb. X.Məmmədovun hesablamasına görə, bir ton yarımlıq taxılına zərər dəyib: “Biri 3 manat 50 qəpikdən olan 150 ot presim getdi. 2 min metr uzunluqda olan su şlanqını sel apardı”.
Kələxan kəndinin digər sakini Rəsmiyə Ağamalıyeva deyir ki, sel fəlakətindən sonra icra qurumları gəlib maraqlanmayıb: “Yoldaşım vəfat edib. Bir nəfər gəlib maraqlanmır”.
Sakinlərin sözlərinə görə, təbii fəlakətdən 11 gün keçsə də vətəndaşlara yardım edilib-edilməməsi ilə bağlı heçnə deyilmir. Yerli icra hakimiyyəti heç maraqlanmır, dəymiş zərərin invertarizasiyası ilə bağlı tədbir görmür. Əslində isə dəymiş zərərə görə kompensasiya ödənilməlidir. Kompensasiyanın hesablanması isə dəymiş zərər əsasın müəyyən edilməlidir. Bununla bağlı ilk addım olaraq zərərin invertarizasiyası həyata keçirilməlidir. Zərərin hesablanması subyektlər üzrə həyata keçirilə bilər. Yəni, ailə təsərrüfatlarına, kommersiya subyektlərinə dəyən zərər hesablana bilər. Ancaq bu yöndə heç bir təşəbbüs müşahidə edilmir. Fövqəlada Hallar Nazirliyinin mətbuat katibi Gülçin Mehdiyeva bəyan edib ki, Lerikdəki sellə bağlı yerli icra orqanları cavabdehdir: “Bununla sırf icra hakimiyyəti məşğul olur. İcra hakimiyyəti tərkibində Fövqəlada Hallar Komissiyası var. O komissiya buna baxmalıdır və Nazirlər Kabinetinə müraciət etməlidir”.
Habil Məlikov: “Ziyan dəymiş təsərrüfatların heç birinin sığortası yoxdur”
Sözügedən məsələlərlə bağlı Lerik rayon icra hakimiyyəti başcısının müavini, Fövqəladə Hallar Komuissiyasının sədri Habil Məlikovla əlaqə saxladıq. H.Məlikov “Bakı-Xəbər”ə açıqlamasında qeyd etdi ki, zərər dəymiş təsərrüfatların sığortası yoxdur: “Baş verən sel nəticəsində vətəndaşların təsərrüfatlarına ziyan dəyib. Ancaq yaşayış evlərinə demək olar ziyan dəyməyib. Əsasən kartof əkinlərinə və digər sahələrə ziyan dəyib. Ancaq məsələ ondadır ki, ziyan dəymiş təsərrüfatların heç birinin sığortası yoxdur. Lakin bütün bunlara baxmayaraq, biz onların hamısını sənədləşdirib aktlaşdırdıq. Sel fəlakəti nəticəsində kəndarası yollar tutulmuşdu. Bununla əlaqədar rayon icra hakimiyyəti texnikalarını əraziyə cəlb etdi və bütün yollar açıldı. İndi həmin kəndlərə gediş-gəliş normal vəziyyətdədir. Bununla əlaqədar elə bir problem qalmadı. Ona görə də ziyan elə də böyük deyil ki, bu dövlət səviyyəsində həll olunsun. Deməyim odur ki, çox da ciddi ziyan dəyməyib. Düzdür, sel fəlakəti güclü idi. Yaşlı adamların dediyinə görə, 100 ildə belə belə fəlakət olmayıb. Qısa bir müddətdə yağan güclü yağış bir sıra fəsadlara səbəb oldu. Çünki ora yarımsəhra, qumsal ərazidir. Yağış bəzi yerlərdə 2 metr dərinliyində yarğanlar yaratdı. Vətəndaşların arı ailələrinə, ev quşlarına ziyan dəydi. Ancaq evlərə bu, elə də ziyan vurmadı. Bütün hallarda baş verən fəlakətin törətdiyi fəsadlarla bağlı əlaqədar qurumlara məlumat vermişik. O baxımdan gözləyirik. Ola bilsin hansısa yardım göstərilsin”.
Ümid edirik ki, zərər görən sakinlərin problemləri həll olunacaq.
Vidadi ORDAHALLI
