Bir müddətdir ki, Binəqədi rayonu Sulutəpə qəsəbəsinin sakinləri ərazidə yaranmış ürəkbulandırıcı vəziyyətdən narazılıq edir. Yuxarı Sulutəpə, Ətçilik adlanan ərazinin sakinləri iddia edir ki, günlərdir ərazidə zibil qutuları boşaldılmır. Nəticədə həmin ərazidə xoşagəlməz mənzərə yaranır.
Sakinlər bildirir ki, günlərdir boşaldılmayan zibil qutularının ətrafı üfunət qoxur: “Zibil qutuları dolduqca insanlar məcbur olub zibilləri yerə atır. Pandemiya zamanı belə mənzərənin olması bizi xüsusilə narahat edir. Havalar olduqca istidir və bu da zibil iyinin daha da yayılmasına səbəb olur. Küləkli hava olduqda isə vəziyyət daha da acınacaqlı olur. Evlərimizdə qoxudan otura bilmirik. Uşaqlarımız çöldə oynaya bilmirlər”.
Onu da qeyd edək ki, son zamanlar Sulutəpə qəsəbəsində yerləşən zavodun ətraf küçələrindəki zibilliklərlə bağlı çoxlu sayda şikayətlər səslənir. Lakin problemin həll olunması ilə bu günə kimi hər hansı bir iş görülməyib.
“Aidiyyatı qurumlarda məişət tullantılarının daşınmasına nəzarət edən şöbələr var, lakin həmin şöbələr vəziyyətdən sui-istifadə edirlər”
Məsələ ilə bağlı fikir bildirən sosial sahə üzrə ekspert Mayis Əliyev qeyd etdi ki, məişət tullantılarının qalaqlanması, vaxtında daşınmaması halları ilə tez-tez qarşılaşırıq: “Ümumiyyətlə, istər mərkəz ərazilərdə, istər bölgələrdə, istərsə də kənar qəsəbələrdə bu, həll edilməyən problem olaraq qalır. Bəzi ərazilərdə isə məişət tullantıları yandırılır. Belə olan halda, ətrafa qatı tüstü, zəhərli maddələr yayılır. Yerli sakinlər isə bu tüstü ilə nəfəs almaq məcburiyyətində qalırlar”.
Həmsöhbətimiz onu da əlavə etdi ki, aidiyyatı qurumlarda məişət tullantılarının daşınmasına nəzarət edən şöbələr var. Lakin həmin şöbələr vəziyyətdən sui-istifadə edirlər. Nəticədə əziyyət çəkən yenə əhali olur.
Günel CƏLİLOVA
