İyulun 8- 24 –nə qədər müəllimlərin işə qəbulu üzrə Bakıda imtahan keçirilib. Lakin imtahanların nəticələri hətta təcrübəli müəllimləri belə şoka salıb. Özünə güvənən müəllimlərin heç biri kafi səviyyədə bal toplaya bilməyib. İyulun 25-də imtahan nəticələrindən narazı qalan 600-dən çox müəllim Təhsil Nazirliyinin qarşısında etiraz aksiyası keçirmək istəyir.
İmtahan verib çıxmış müəllimlərin hamısı imtahanlarda nöqsanların olduğunu qeyd edirlər. Bəziləri kompüterlərin zəif işləməsindən, bəziləri məntiq suallarından, bəziləri imtahan gedə -gedə sualların dəyişilməsindən narazıdır. Müəllimlərin əksəriyyəti sualların cavablarının dəyişilməsindən şübhəlidirlər. Müəllimlər Təhsil Nazirliyinin İnsan Resursları tərəfindən keçirilmiş imtahanların Dövlət İmtahan Mərkəzi tərəfindən keçirilməsini tələb edirlər.
“Müəllimlərin işə qəbulu müsabiqəsində ədalətli rəqabət mühitinin qorunub saxlanılması Təhsil Nazirliyinin əsas məqsədidir”
Müəllimlərin narazılığı ilə bağlı fikir bildirən Təhsil Nazirliyinin ictimaiyyətlə əlaqələr şöbəsinin müdiri Cəsarət Valehov bildirdi ki, 5 iyul tarixindən etibarən baş tutmuş müəllimlərin işə qəbulu müsabiqəsinin imtahan mərhələsində istifadə edilmiş sualların elmi-statistik təhlili aparılıb: “Aparılmış elmi-statistik tədqiqat çərçivəsində müxtəlif fənlər üzrə 5,040 test tapşırığı əhatə olunmaqla sualların məzmun xüsusiyyətləri, çətinlik dərəcəsi, diskriminasiya əmsalı təhlil edilib. 12 iyul tarixində keçirilmiş ibtidai sinif, 23 və 26 iyul tarixlərində keçirilmiş Azərbaycan dili və ədəbiyyat müəllimliyi üzrə seanslarda istifadə edilmiş test tapşırıqlarının bu fənlər üzrə digər tarixlərdə keçirilmiş seanslarda istifadə edilmiş test tapşırıqlarından çətinlik dərəcəsinə görə fərqləndiyi müəyyən edilib. Bu seanslarda texniki xüsusiyyətləri baxımından fərqlənən test tapşırıqlarına görə namizədlərə əlavə ballar veriləcək. Onu da əlavə edim ki, qeyd edilən tarixlərdə imtahanlarda iştirak etmiş namizədlər üçün təkrar imtahan imkanı da yaradılacaqdır. İmtahanlarda iştirak könüllü xarakter daşıyır. Təkrar olaraq imtahanlarda iştirak edən namizədlərin vakansiya seçimi mərhələsində son imtahan nəticəsi nəzərə alınacaq. Müəllimlərin işə qəbulu müsabiqəsində ədalətli rəqabət mühitinin qorunub saxlanılması Təhsil Nazirliyinin əsas məqsədidir”.
Günel CƏLİLOVA
