Son zamanlar ən çox müzakirə olunan mövzulardan biri də kişilərin şortiklə hansısa obyektə daxil olarkən onlara qadağa qoyulmasıdır. Bu günlərdə Bakıda fəaliyyət göstərən məşhur “Qoşa qala” restoranı kişi müştərilərinə xəbərdarlıq edib.
Bildirilib ki, şortik və səndəl geyinən kişilər içəri buraxılmayacaq. Bu haqda restoranın sosial şəbəkə hesabında elan verilib. Eyni zamanda heyvanla məkana gəlmək qadağandır: “Hörmətli qonaqlar, restorana aid xüsusi dress-kod mövcuddur. Bu səbəblə restorana şortik və dabanıaçıq ayaqqabı ilə (başmaqla) giriş təəssüf ki, mümkün deyil. Sözügedən bildiriş yalnız bəylərə şamil olunur” deyə, paylaşımda qeyd olunub.
Qeyd edək ki, bundan əvvəl Azərbaycanda sürücülük vəsiqəsi almaq üçün imtahana şortikdə gedən kişilər binaya buraxılmayıb. Daha sonra Bakı şəhər sakini Azər Kərimov “şortik” geyindiyinə görə notariat kontoruna buraxılmamışdı.
Bəylərin şortiklə hansısa quruma daxil olmasına icazə verilməməsi başa düşüləndir. Ancaq iaşə obyektin bəylərə qarşı belə qadağa tədbiq etməsi düzgün qarşılanmır. Bəylərə şortiklə restorana daxil olmaq olmaz ancaq xanımlara olar.
Aytəkin Kamranqızı: “Qadınlar şortik və ya istənilən açıq geyimdə restorana gələ bilər, ancaq bəylərə olmaz”
Sosioloq Aytəkin Kamranqızı bildirdi ki, ölkəmizdə qadın və kişi gender bərabərliyi var. Lakin son hadisəyə görə qadınlara şortik geyinmək olar, onlar qısa geyinə bilərlər, amma kişilərə, oğlanlar olmaz. Bu necə düşüncə tərzidir?.
Həmsöhbətimiz onu da əlavə etdi ki, vaxtilə nənə-babalarımız çadra və papaqla gəzirdilər və indi məcburi deyil ki, gənclərimiz də elə o cür gəzsinlər: “Onsuz da əxlaqı olmayan, əxlaqsız insan şortikdə, çadrada da öz əməllərindən əl çəkməyəcək. Ona görə də yeni nəsil özlərini təsdiq etmək, etirazlarını bildirmək, qıcıq yaratmaq üçün bəzən bu cür şortik və yaxud yırtıq şalvar geyinirlər. Əlbəttə ki, bu da yaşlı və orta nəsli qıcıqlandırır. Dövlət qurumlarında çalışanlar və ora hansısa işinin düzəlməsi üçün gedənlər şortik geyinə bilməz. Bu həm də həmin müəssisəyə olan hörmətdən irəli gəlir. Ancaq restoranın belə bir tələblə çıxış etməsi düzgün deyil. Vətəndaş istədiyi geyimdə restorana daxil ola bilər. Belə bir qaydanı tətbiq edən iaşə obyekti ilk növbədə özünə zərbə vurur. Restoranın belə bir təkliflə çıxış etməsi ora gedəcək müştərilərin sayına təsir edəcək”.
Həmsöhbətimizin sözlərinə görə, restoranın məlum geyim şərti gender bərabərliyinin pozulmasına səbəb olur: “Qadınlar şortik və ya istənilən açıq geyimdə restorana gələ bilər, ancaq bəylərə olmaz. Bu düzgün yanaşma təzri deyil”.
Cəmşid Əliyev: “Şortla bağlı hansısa yerdə qadağa və yaxud qayda yoxdursa, heç kim bu məsələyə müdaxilə edə bilməz”
İlahiyyatçı Cəmişid Əliyev bildirdi ki, nə kişinin, nə də qadının geyiminə heç kimin qarışmağa ixtiyarı yoxdur. Xüsusilə şortla bağlı hansısa yerdə qadağa və yaxud qayda yoxdursa, heç kim bu məsələyə müdaxilə edə bilməz.
Günel CƏLİLOVA
