Pandemiya ilə birdəfəlik vidalaşmağın yeganə yolunun ölkə əhalisinin az qala 80 faizdən çoxunun vaksinasiya olunmasından keçdiyini bilirik. Amma elə kateqoriyalardan olan insanlar var ki, onlara koronavirus əleyhinə vaksin vurmaq olmaz. Amma elə adamlar da var ki, onlar vaksinin zərərli olduğunu düşünüb vurdurmaq istəmirlər.
Məlumatlara görə, peyvənd vurulmasina əks göstərişi olan adamların müəyyən edilməsi ilə bagli komissiyanın yaradılır. İstisna deyil ki, bundan sui-istifadə edənlər, saxta arayış alanlar da ola bilər.
Qeyd edək ki, Prezidentin köməkçisi Şahmar Mövsümov Nazirlər Kabineti yanında Operativ Qərərgahın keçirdiyi son brifinqdə bildirib ki, koronavirus əleyhinə peyvənd vurdurulması üçün əks göstərişləri olan insanlar üçün xüsusi sertifakatın hazırlanması nəzərdə tutulur. “Əgər həqiqətən də həmin şəxslərə peyvənd vurulması tövsiyə edilməzsə, o zaman onlara əks göstəriş sertifikatı veriləcək. Həmin sertifikatda da COVID-19 pasportundakı kimi QR kod olacaq”.
Qeyd edilənə görə, süd verən analar, hamilələr, ümumiyyətlə əks göstərişləri olan şəxslər üçün əks-göstəriş sertifikatının hazırlanması nəzərdə tutulur.
“Səhiyyə Nazirliyi tərəfindən xüsusi komissiya yaradılacaq. Əgər doğrudan da, onlara vaksin vurdurmaq olmazsa, həmin şəxslərə QR kodu olan əks-göstəriş sertifikatı veriləcək”. Bu da dövlət rəsmisi tərəfindən bildirilib.
Peyvənd vurulmasına əks göstərişləri olan insanların müəyyən edilməsi və onlara müvafiq sertifikatın verilməsi üçün olan bu komissiyanın şəffafəığının təmin edilməsi üçün nə edilməlidir?
“Mütləq güclü ictimai nəzarət olmalıdır”
Professor Adil Qeybulla “Bakı-Xəbər”ə bildirdi ki, bu istiqamətdə şəffaflığın təmin edilməsi üçün iki əsas amilə diqqət yetirmək tələb olunur, bu iki amil nəzərə alınarsa komissiya tərəfindən heç bir qanunsuzluğa yol verilməz: “Bu komissiyanın fəaliyyətində şəffaflığın təmin olunması olduqca vacibdir. Şəffaflığı təmin etmək üçün iki əsas məsələyə əməl olunmalıdır. Birincisi, komissiya təmsilçilərinin vicdanlı olması vacibdir ki, neqativliyə, sui-istifadə halları baş verilməsin. İkinci əsas amil isə komissiyanın fəaliyyətinə mütləq şəkildə ictimai nəzarətin olmasıdır. Komissiyaya mütləq güclü ictimai nəzarət olmalıdır. Ümumiyyətlə ictimai nəzarətin təmin olunmasına böyük əhəmiyyət verilməlidir, pandemiya ilə mübarizə sahəsində də ictimia nəzarətin olması mütləqdir. İctimai nəzarət təmin olunmasa heç bir şəffaflıqdan söhbət gedə bilməz”.
A.Qeybulla əlavə etdi ki, COVID üçün istənilən əks – göstəriciləri həkim müəyyən edir, istənilən halda bunu vətəndaş müəyyən edə bilməz. O, qeyd edir əgər pasient narahatdırsa o peyvənd otağında təlimatlandırılır: “Astma, ağciyər xəstəlikləri, bütün bunlar hamısı peyvənd vurdurmağa göstərişdilər. Çünki onlar xəstələndikləri halda bu xəstəliyi çox ağır keçirə bilərlər. Bütövlükdə əks göstərişlər komissiya tərəfindən müəyyən edilir. Vaksindən imtina vermək üçün əsas lazımdır. Xəstəlik keçirən adam isə 6 ay müddətində vaksinasiya oluna bilməz, 6 aydan sonra oluna bilər”.
İradə SARIYEVA
