Bütün dünyanın bəlasına çevirilən “ağ ölüm” bizim cəmiyyətimizi də təhdid etməkdədir. Çox təəssüflər olsun ki, son zamanlar narkoticarətlə, narkotacirlərlə bağlı daha çox xəbərlər alırıq, yeni çeşiddə narkotik vasitənin adını eşidirik. Polis tərəfindən aparılan reydlər nəticəsində kiçik və böyük narkoticarətçilər üzə çıxarılır, cinayət məsuliyyətinə cəlb edilirlər.
Son dövrlər narkotik vasitələr, xüsusən də "Patı" və "Şüşə" satanların aşkarlanıb üzə çıxarılması faktları ilə tanış oluruq. Bəzən gün ərzində eyni cinayətə görə bir neçə şəxsin saxlanıldığını görürük. Burada diqqət çəkən əsas bir məqam var, narkoticarətə görə tutulanlar arasında qadınların sayının çoxluğu diqqətdən yayınmır.
Qadınlar nə üçün narkoticarətciyə çevirilir, bunun səbəbi nədir? Qadınları narkoticarətciyə kimlər çevirir?
“Əsgər Ailələrinə Dəstək” İctimai Birliyinin sədri, hərbi jurnalist Mətanət Əsgərqızı “Bakı-Xəbər”ə bildirdi ki, bu olduqca ağrılı məsələdir və böyük problemdir: “Bu olduqca ciddi bir problemdir, çox ağrılı və narahatedicidir. Əslində, bir çox hallarda bu qadınların narkotik alverçisinə çevirilməsinin əsas səbəbkarının onların öz həyat yoldaşları olduğunu görürük. Bu faktın şahidi oluruq. Yəni həyat yoldaşları olduqları bu yanlış yola öz qadınlarını da cəlb edirlər. Nəticədə də çox pis bir tendensiya əmələ gəlib. Çox təəssüflər olsun ki, narkoticarətçiyə çevirilən qadınların xeyli bir qismi də özlərinə dost, sevgili saydıqları adamlar tərəfindən bu yola cəlb edilirlər. Onlar uzun illər təmasda olurlar, münasibətlərini davam etdirirlər və məlum olur ki, bu kişi narkomandır, qadını da bu yanlış işə yönəldir, çəkir. Qadın da narkotikdən istifadə edir”.
M.Əsgərqızı qeyd etdi ki, narkotikdən istifadə edən istər kişi, istərsə də qadın olsun, istər-istəməz bunun əsirinə çevirilir. “Narkotik aludəçisinə çevirilən insana isə nə tapşırıq, nə əmr versələr kor-koranə olaraq onu icra edəcək. Ən vacib səbəblərdən biri isə şübhəsiz, işsizliklə bağlıdır. İstər pandemiya dövründə, istərsə də, bir qədər ondan əvvəl insanlar iş tapmaqla bağlı çətinliklərlə üzləşiblər. Buna görə də, qadınların bəziləri bu cür neqativ yollara düşürlər. Bütün hallarda, qadınların bu yola düşməsinin qarşısının alınması üçün tədbirlər görmək, onların iş yerləri ilə təmin olunmasına çalışmaq lazımdır. İş yeri olmayan, balasına bir parça çörək qazanmaqda çətinlik çəkən qadınların bədxahların toruna düşməməsi üçün onlar iş yerləri ilə təmin edilməlidir. Elə şərait yaratmaq lazımdır ki, qadınlar özləri öz ayaqlarının üstündə dayana bilsinlər, heç kəsdən asılı vəziyyətə düşməsinlər. Qadın anadır, onun dünyaya gətirdiyi övladlar isə gələcəyimizdir. Əgər bu gün narkotikdən istifadə edən, yaxud narkoticarətlə məşğul olan bir qadın varsa, onun övladının da bu yola düşə biləcəyi istisna deyil. Yəni bu səhv tendensiya ailə daxilində başqasına ötürüləcək. Bu ciddi məsələdir. Hamılıqla bu məsələlərə ciddi yanaşmalı, onunla mübarizə aparmalıyıq. Qadınların sayının artımı bizi həyacan təbili çalmağa vadar edir, hər kəs bundan narahat olmalıdır və mübarizə aparmalıdır” deyə M.Əsgərqızı bildirdi.
İradə SARIYEVA
