İyulun 21-də Azərbaycan Respublikasının Baş naziri, Operativ Qərargahın rəhbəri Əli Əsədovun sədrliyi ilə Qərargahın geniş tərkibdə respublika müşavirəsi keçirilib. Müşavirədə bir sıra məsələlərə toxunulub, o cümlədən də toyların vəziyyəti geniş müzakirə edilib.
Bildirilib ki, Bakı şəhərinin şənliklər təşkil olunan obyektlərində əksər hallarda qaydalara əməl olunur. Bununla belə: qonaqların sayına qoyulmuş məhdudiyyət nəzərə alınmır, iştirak edən şəxslərin COVID pasportu olmur, mərasimin vaxtı müəyyən olunmuş saatları keçir, sanitar-epidemioloji normalar pozulur, obyektlərdə əməkdaşların 80%-nin peyvəndlənmiş olması tələbi tətbiq olunmur.
“Restoranlar və şadlıq evləri qarşısında qoyulan tələblərə birmənalı olaraq əməl edilməlidir ki, hökümət daha sərt tədbirlər seçməsin”
“Müasir İnkişaf” Mərkəzinin rəhbəri Mübariz Göyüşlü “Bakı-Xəbər”ə bildirdi ki, toylarla bağlı qadağaların aradan qaldırılması çox müsbət hal olsa da, bəzi restoran və şadlıq evləri bundan sui-istifadə etməyə başladı: “Ailə qurmaq istəyən gənclərin müraciətlərini, istəklərini nəzərə alan hökümət toylarla bağlı qoyulmuş məhdudiyyətləri aradan qaldırdı. Toyların keçirlməsinə icazə verilməsi müsbət hal oldu. Mən elə zənn edirdim ki, toyların keçirilməsinə icazə verildikdən sonra bütün şadlıq evləri, restoranlar toy məclislərini qoyulan tələblərə uyğun şəkildə keçirilməsini təmin edəcək. Ancaq təəssüflər olsun ki, toy məclisləri keçirilərkən müvafiq qaydalara əməl edilmir. Toyların keçirilməsində, qonaqların sayında, eləcə də bu kimi digər məsələlərdə çox ciddi problemlər var. Xüsusən də, bölgələrdə fəaliyyət göstərən şadlıq sarayları və restoranlarla bağlı ciddi qanun pozuntuları, narazılığa səbəb olan hallar var. Müvafiq qurumlar onların fəaliyyətlərindən ciddi narazılıq edirlər ki, qoyulan tələblər yerinə yetirilmir, nəticədə prosesə polis, Qida Agentliyi, vergi xidməti və başqa aidiyyatı qurumlar müdaxilə etməyə məcbur olurlar. Hesab edirəm ki, aidiyyatı təşkilatlar qanunlara əməl olunmasını təmin etməlidir. Qoyulan tələblər yerinə yetirilərsə əlavə sərtləşdirməyə ehtiyac olmaz, amma tələblərə riayət edilmir. Mövcud tələblərin təmin olunmasına nəzarət gücləndirilməlidir və insanlar anlamalıdır ki, onların toy məclislərində hansısa bir gərginliyin yaranması nə özlərinə, nə qonaqlara lazımdır. Restoranlar və şadlıq evləri qarşısında qoyulan tələblərə birmənalı olaraq əməl edilməlidir ki, hökümət daha sərt tədbirlər seçməsin”.
M.Göyüşlü hesab edir ki, insanlar icazə verilən saydan artıq qonaq qəbul etməkdən çəkinməli və bütün müvafiq qaydalara əməl etməlidir. Bununla belə, ekspert hesab edir ki, heç kəs qayaların sərtləşdirilməsini istəmir, bunun baş verməməsi üçün isə qanun pozuntularına yol verməmək lazımdır.
İradə SARIYEVA
