Mədəniyyət Nazirliyi yanında İctimai Şuranın üzvlərinin kimliyi məlum olub. Siyahı açıqlanar-açıqlanmaz İctimai Şuraya seçkilərin qeyri-şəffaf keçirildiyinə, mütəxəssislərin kənarda qaldığına dair iddialar yayılmağa başlayıb. Yayılan iddialara görə, Mədəniyyət Nazirliyinin İctimai Şurasına seçkilərdə qruplaşma olub.
Azərbaycanın İşğal Olunmuş Ərazilərindəki Tarix və Mədəniyyət Abidələrini Müdafiə Təşkilatı İctimai birliyinin sədri Faiq İsmayılov da Mədəniyyət Nazirliyinin İctimai Şurası üzvlüyünə namizədliyini verib, lakin seçilməyib.
F.İsmayılov narazılığını Mədəniyyət naziri Anar Kərimova müraciətində də bildirib.
“Cənab nazir, Azərbaycan Respublikasının Mədəniyyət Nazirliyi yanında İctimai Şuraya üzvlərin seçilməsi prosesi 13 iyul 2021-ci il tarixində Beynəlxalq Muğam Mərkəzində başa çatdı. Belə bir təşəbbüsdən yararlanaraq, bu sahəyə ictimai fəaliyyətlə məşğul olan ekspertlərin cəlb edilməsi Azərbaycan mədəniyyətinin inkişafına fayda verə bilərdi. Bu seçkiyə mənim də namizədliyim qeydə alınmışdı.
Güman edirdim ki, seçkidə istər namizədlər, istərsədə seçicilər, mədəniyyət sahəsində sözünü demiş ictimaiyyət nümayəndələri seçiləcəklər. Lakin düşüncəmdə yanılmışdım. Beləki qeydə alınan namizədlərin 51 nəfərdən 30-u, seçicilərin 258 nəfədən 218-inin qeyri-ixtisas sahibi olması Nazirliyin adına qətiyyən yaraşmırdı. İndi hər kəs üçün maraqlıdır; Axı heyvandarlar, ekoloqlar, iqtisadi sahədə çalışanlar, əlil və müharibə veteran təşkilatların nümayəndələri İctimai Şuraya seçilsələr Mədəniyyət Nazirliyində hansı təşəbbüslərlə çıxış edəcəklər?
Cənab Nazir, bu qeyri-ixtisas sahibləri olan seçicilər seçki başlar-başlamaz bir neçə qrupa bölünərək, seçkiyə gələnlərə onların təqdim etdikləri siyahıdakı adamlara səs verməyə təhrik edərək, seçkinin şəffaf keçirilməsinə mane oldular. Bu utancverici hadisə seçki bitənə kimi davam etdi. Mən bütün örünü könüllü olaraq Azərbaycanın mədəni irsinin qorunmasına sərf etmiş bir ziyalı kimi sizdən xahiş edirəm. Nə qədərki gec deyil, bu seçkinin nəticələrini ləğv edin. Azərbaycanın qanunları çərçivəsində yenidən seçkilərin keçirilməsinə göstəriş verin. Qoy bir zamanlar Azərbaycan Mədəniyyətinin müxtəlif sahələrində çalışıb Azərbaycan Mədəniyyətinə fayda vermiş ictimaiyyət nümayəndələri seçkidə iştirak etsinlər”.
- Faiq İsmayılov: “Nazirlik bu ixtisassız insanları niyə qeydiyyatdan keçirmişdi?”
Faiq İsmayılov “Bakı-Xəbər”ə açıqlamasında bildirdi ki, seçkilərdə böyük qruplaşma olub, qruplaşmanın hədəfi isə peşəkarlar olub. F.İsmayılovun sözlərinə görə, qruplaşmanı yaradanlar bir-birinə səs veriblər. Bu işin planlı şəkildə həyata keçirildiyini qeyd edən F.İsmayılov “Çox biabırçı bir seçim oldu. Rauf Zeyni, Gəray Əlibəyov və Vüqar Qədirov qruplaşmalar yaratdılar. Seçəcəkləri adamlara səs verdirdilər. Planlaşdırma Vatsapp üzərindən aparılıb və bütün səs yazıları məndə var. İstəsəniz sizə də göndərərəm. Nazirlik də bu işə dəstək verdi. Belə ki, 51 namizədin 30-u, 258 seçicinin 218-i ixtisas sahibi deyildi. Niyə? Nazirlik bu ixtisassız insanları niyə qeydiyyatdan keçirmişdi? Maraq nə idi?”.
- Vüqar Qədirov: “Çox təəssüf edirəm ki, Faiq İsmayılov belə bir açıqlama verib və mənim adımı hallandırıb”
F.İsmayılovun adını çəkdiyi Qarabağ Qeyri Hökumət Təşkilatları Koalisiyasının koordinatoru, Üçüncü Sektor Mərkəzinin rəhbəri, Ağstafa Regional Mədəniyyət İdarəsinin sabiq rəisi Vüqar Qədirov “Bakı-Xəbər”ə açıqlamasında deyilənlərin həqiqətə uyğun olmadığını bildirdi: “Çox təəssüf edirəm ki, Faiq İsmayılov belə bir açıqlama verib və mənim adımı hallandırıb. Faiq İsmayılov mənim rəhbərlik etdiyim koalisiyalarda təmsil olunub və həmişə də ona hörmətlə yanaşılıb. O ki qaldı qruplaşmalar yaratmağa, mən qruplaşma yaratmamışam. Amma Faiq İsmayılov burada adını çəkdiyi şəxslərin hansısa birinin qruplaşmasında olub və ona görə də özünü aldadılmış hesab edir. Qruplaşmaya gəldikdə, seçki kampaniyasını yaratmaq üçün qruplaşma taktikalardan biridir. Amma mən qriplaşmaya gedəsi olsaydım, öz namizədliyimi geri götürməzdim. Öz namizədliyimi geri götürdüm və açıq şəkildə də qardaşımı dəstəklədim. Mən 8 il Prezident yanında Qeyri-Hökumət Təşkilatlarına Dövlət Dəstəyi Şurasının üzvü olmuşam, 50-dən artıq QHT-ni öz ətrafında birləşdirən Qarabağ Qeyri Hökumət Təşkilatları Koalisiyasının rəhbəri olmuşam. Qardaşım da eyni zamanda aktiv qeyri-hökumət təşkilatı rəhbəridir. İkimizin fəaliyyətimiz Şahin Qədirovun ən yüksək səs toplamasına gətirib çıxarıb. Burada heç bizim qruplaşmaya və hansısa geniş tərkibli kampaniyaya ehtiyacımız yoxdur. Mən sadəcə, belə bir açıqlamaya görə təəssüf edirəm” - deyə V.Qədirov bildirdi.
İradə SARIYEVA
