XXI əsrin azərbaycanlısının “imam” iddiasında olan fırıldaqçıların toruna düşməsi necə baş verir…

Hacı Təyyar Hüseynli: “Bu yanlış təsəvvürün formalaşmasında maraqlı olan özünü-sözünü bilməyən, məsuliyyətsiz adamlar insanların inancından sui-istifadə edir”

img

Mətbuatda yayılan məlumatlara görə, Baki sakini 12-ci imam” olduğunu iddia edir. Allah tərəfindən ona "vəhy gəldiyini" deyən və möcüzəvi gücün yalnız ona məxsus olduğuna hər kəsi inandırmağı bacaran Aqil Babayev adlı şəxs özünü Mehdi Sahib əz-Zaman kimi qələmə verir. Adıçəkilən şəxsin əməlləri ilə bağlı bir çox zərərçəkən şəxslər hüquq-mühafizə orqanlarına müraciət edib.

Onun qadınlara qarşı zorakılıq etdiyi, camaatı aldatmaq yolu ilə külli miqdarda vəsait ələ keçirdiyi qeyd edilir.

Belə şarlatanlara qarşı hansı tədbirlər görülməlidir? XXI əsrdə yaşayan insanlar cəhalətə necə yuvarlana bilər və o şəxsin Mehdi Sahib əz-Zaman olduğuna inana bilər? İnsanların hələ də belə şarlatanların təsirinə düşə bilməsi nəyin nəticəsidir?

  • “Bu birmənalı olaraq cahillik əlamətidir və bunun arxasında da cəhaləti təbliğ edən insanlar dayanır”

İlahiyyatçı Hacı Təyyar Hüseynli bizimlə söhbətində bildirdi ki, belə bir şəxsin meydana çıxıb dini müqəddəslərin adından istifadə etməsi yolverilməzdir. XXI əsr insanının belələrinin toruna düşməsini cəhalət adlandıran ilahiyyatçının sözlərinə görə, bunun da kökündə xüsusi məqsədlər dayanır: “Bu birmənalı olaraq cahillik əlamətidir və bunun arxasında da cəhaləti təbliğ edən insanlar dayanır. Yəni dini düzgün şəkildə təbliğ etməmək, cəhaləti həqiqət kimi qələmə vermək nəticədə insanlarda yanlış təsəvvürlər yaradır. Bu yanlış təsəvvürün  formalaşmasında maraqlı olan özünü-sözünü bilməyən, məsuliyyətsiz adamlar insanların inancından sui-istifadə edirlər. Hansı ki, o inancın özündə yanlışlıqlar ola bilər”.

Özünün “12-ci imam olduğunu” iddia edən bu şəxslə bağlı qəti tədbirlərin görülməli olduğunu deyən H.T.Hüseynlinin sözlərinə görə, əvvəllər də belə hallar olub. “Mən belə adamları ciddi psixoloji xəstə adlandırıram. Belələrində bu xəstəliyin əlamətləri istər tibbi nöqteyi-nəzərdən, istərsə də digər tərəflərdən özünü biruzə verir. Uzun illərin din xadimi, axundu kimi dini mühitdə belə qəribəlikləri çox görmüşəm. Saysız-hesabsız belə düşüncədə insanlara rast gəlmişəm. Düşünürəm ki, dini mühitdə düşüncə tərzinə reforma verilməlidir. Dini təbliğatda reallığı, məntiqi, sivil dünyanı, insanlara düzgün yolu təbliğ etmək lazımdır. İnsanları doğru yola yönəldəcək və həyatımızın bütün sahələrinə əhatə edən seçkin, mükəmməl bir mənəvi təbliğat aparmaq lazımdır. Yoxsa bu cür təsadüflərə, islam dünyasına, cəmiyyətimizə, mənəvi dəyərlərimizə ləkə olan, kölgə salan insanlara çox rast gələcəyək”.

İradə SARIYEVA

Son xəbərlər