İslam şəriətində qəbir yerlərinin satılması haram buyurulsa da, işbazlar buna məhəl qoymur. Paytaxtda yaşayanların çoxu qəbir yerlərinin yerindən asılı olaraq neçəyə satılmasından xəbərdardır. Təbii ki, rəsmilər qəbir yerlərinin satılmasını etiraf etməsələr də, ölüsünü basdırmaq istəyən hər kəs qəbiristanlıqda belə açıq bazarla qarşılaşmalı olur.
Qəbir yerlərinin satılması halı, paytaxtla yanaşı, bölgələrdə də müşahidə edilir. Məlumatlara görə, Sumqayıt şəhər Hacı Zeynalabdin Tağıyev qəsəbəsinin bələdiyyəsi qəbir yerlərini satmaqla məşğuldur. Qəsəbə sakini Mehriban İsayevanın yaydığı məlumata görə, onun bibisi rəhmətə gedib: “Rəhmətlik bibimi qəsəbənin qəbirstanlığında dəfn etmək istəyirdik. Bələdiyyənin işçiləri bizə yaxınlaşıb dedilər ki, meyidi basdırmaq üçün 270 manat pul verməlisiz. Amma izah edə bilmirlər ki, bu pulu niyə verməliyik?”.
M.İsayevanın dediyinə görə, pul verilmədiyi üçün bələdiyyə işçiləri dəfnə mane olub: “Dedilər ki, pul verilməsə, ölünüzü burda dəfn etməyə qoymayacağıq. Biz də məcbur olub, deyilən məbləği verdik. Əvvəllər burada belə şey olmayıb. Yalnız qəbir qazanlara, ustalara pul verirdik. Çarəsiz qalıb pulu verdik, ancaq bizə hər hansı sənəd təqdim etmədilər. Bu da o deməkdir ki, qanunsuzluq ediblər”.
Məlumat üçün qeyd edək ki, Hacı Zeylabdin Tağıyev qəsəbəsinin bələdiyyə sədri Əsli Qasımovadır.
“Məzar yerləri vətəndaşlara verilərkən rəsmi məbləğdən artıq pul istənilməsi barədə aidiyyəti qurumlar araşdırma aparmalıdır”
Dinşünas İsmayıl Əhməd qeyd etdi ki, qəbiristanlıqlarda vətəndaşlardan məzar yeri üçün təyin olunan rəsmi məbləğdən qat-qat artıq pul istəyirlər. Qanunvericiliyə görə, məzar yerlərinin rəsmi qiyməti 63 manat olduğu halda, vətəndaşdan “avtomobilin dəyərində” vəsait tələb olunur.
Ekspert bildirdi ki, məzar yerlərinin vətəndaşlara pulla satılması əvvəllər ancaq paytaxt ərazisində müşahidə olunurdu: “Artıq bu hal bölgələrə də sirayət edib. Məzar yerləri vətəndaşlara pulla verilərkən onlara sənəd verilməlidir. Qəbir yeri vətəndaşa yalnız şifahi danışıq əsasında müəyyən məbləğ qarşılığında verilir. Bu isə qanunsuzdur”.
Həmsöhbətimizin sözlərinə görə, məzar yerləri vətəndaşlara verilərkən rəsmi məbləğdən artıq pul istənilməsi barədə aidiyyəti qurumlar araşdırma aparmalıdır. Bu məsələ rəsmi şəkildə araşdırılmalı, qanunvericiliyin tələbinə əməl etməyənlər cəzalandırılmalıdır”.
Günel CƏLİLOVA
