Son günlər Daxili İşlər Nazirliyi narkoticarətin ifşa edilməsilə bağlı bütün respublika üzrə ciddi əməliyyat tədbirləri həyata keçirir. Daxili İşlər Nazirliyi ölkədə narkotiklərin yayılması problemi və son zamanlar bu mövzu ətrafında gedən ictimai müzakirələr, hüquq-mühafizə orqanlarının ünvanına səslənən tənqidlərlə bağlı ictimaiyyətə müraciət edib. Müraciətdə deyilir:
“Narkotiklərin qanunsuz dövriyyəsi və narkomanlıq qlobal problem olaraq bütün bəşəriyyəti narahat edir. Bu bəlaya qarşı mübarizə Azərbaycanda da hüquq-mühafizə orqanları qarşısında duran başlıca vəzifələrdən biridir. Qanunsuz dövriyyədən çıxarılan narkotiklərin həcminin ilbəil artmasına baxmayaraq, həmin vasitələrin ölkəyə gətirilməsinə edilən cəhdlər, buna mütənasib olaraq narkotik istifadəçilərinin sayı çoxalır. Belə bir vəziyyət isə nəticə etibarı ilə gənclərimizin narkotik aludəçisi olmaq təhlükəsini artırır. Problemlə bağlı mediada tənqidi yazılar dərc olunur, sosial şəbəkələrdə müzakirələr aparılır, müxtəlif fikirlər səsləndirilir. Bu, normal haldır və biz hər kəsin mövqeyinə, eləcə də ictimai rəyə hörmətlə yanaşırıq. Lakin təkcə tənqidlə, yaxud iradlarla iş bitmir. Bu təhlükəni aradan qaldırmaq üçün cəmiyyətin birgə səyləri tələb olunur. Yəni hər kəsin ümumi işə real köməkliyi çox vacibdir. Yalnız bu halda görülən işlər istənilən nəticəni verə bilər. Doğrudur, narkotiklərin qanunsuz dövriyyəsinə qarşı mübarizədə fəal mövqe tutan vətəndaşlarımız var və məhz onların məlumatları əsasında effektiv nəticələri olan bir çox əməliyyat tədbirləri keçirilib. Həmin vətəndaşların hər birinə təşəkkür edir, prinsipial mövqelərini alqışlayırıq.
Bu işdə daha bir vacib məsələ antinarkotik təbliğatın gücləndirilməsi və səmərəsinin artırılmasıdır. Yeniyetmələr, gənclər arasında aparılan izahat işlərinə, müvafiq tədbirlərə gəlincə, bu iş konkret həyat nümunələrinə əsaslandıqda daha təsirli olur, çəkindirici rol oynayır. Bütün hallarda əsas diqqət ölkədə narkotiklərə tələbatın azaldılmasına yönəlməlidir”.
Doğrudan da DİN çox ciddi şəbəkə ilə mübarizəyə girişib. Belə ağır işdə bütün ictimaiyyət DİN-ə ictimai dəstəyini ifadə etməlidir. Bu dəstəyin zəruriliyini DİN-in özü də rəsmi müraciətində etiraf edir. Təəssüflər olsun ki, biz bir sıra jurnalist və blogerlərdən anoloji dəstəyi görmürük. Ən maraqlısı budur ki, böyük canfəşanlıqla DİN-in İctimai Şurasına seçilən QHT təmsilçilərindən də bu yöndə fəallığı hiss etmirik. Onda sual olunur: bu QHT-lər DİN-in İctimai Şurasında niyə təmsil olunmaqda maraqlı idilər? Yalnız həmin qurumdan verilən vəsiqəni daşımaq üçünmü? Polisə geniş ictimai dəstəyin lazım olduğu anda Şura üzvləri sükuta qərq olacaqlarsa, onların fəaliyyətindən heç bir səmərə gözləməyə dəyməz.
Hüquqşunas Mehman Muradlı qəzetimizə açıqlamasında bildirdi ki, son dövrlər DİN narkotiklərlə daha ciddi mübarizəyə girişib: “Doğrudan da bu sahədə vəziyyət daha dramatik hal almışdı. Güçədə gəzən gənclərin əhvalından zərərli vərdişlərə alüdəçilik açıq hiss edilirdi. DİN 44 günlük müharibədən sonra, faktiki olaraq, narkomafiya ilə iknci müharibəyə girişib. Bu məsələdə DİN-i tək qoymaq olmaz. Çünki DİN genofondumuzun məhvinə yönələn təhlükəni aradan qaldırmağa çalışır. Narkomafiya ilə mübarizə sizə sadə görünməsin. Onların geniş maliyyə və təsir rıçaqları var. Silah aləti kimi bizə qarşı narkotikin ən pis formasından istifadə edilir. Mən bu məsələdə bütün ictimaiyyəti dəstəyə səsləyirəm. Doğrudan da DİN yanında İctimai Şuraya seçilən şəxslərin bu yöndə passivliyini görürük. Onların bu susqunluğu başadüşülən deyil. İctimai Şura üzvləri elə düşünür ki, onlar yalnız DİN-lə bağlı olan hansısa problemi qabarda bilərlər. Biz görürük, İctimai Şuralara seçilən şəxslərin çoxunun ictimai iştirakçılıqla bağlı qanundan xəbəri yoxdur. Çoxları elə düşünür ki, yalnız təmsil olunduqları qurumdan nəsə neqativ yazılanda bunlar sinələrini qabağa verib, qurumun nüfuzunu qorumalıdırlar. Mətbuat xidməti ilə öz fəaliyyət sahələrini səhv salıblar. Mən həmin adamları da bu məsələdə DİN-ə ciddi ictimai dəstək verməyə çağırıram”.
Məhəmmədəli QƏRİBLİ
