Sumqayıt şəhəri, 1-ci kvartal, bina 6, mənzil 4-də yaşayan Qubadlı rayonu Əfəndilər kənd sakini Əhmədov Rəhman Qasım oğlu redaksiyamıza gələrək, üzləşdiyi problemin ictimailəşdirilməsinə yardımçı olmağımızı istədi.
Məcburi köçkün həyatı yaşayan R.Əhmədov bizimlə söhbətində bildirdi ki, uzun illər sahibkarlıq fəaliyyətilə məşğul olub və bu səbəbdən də banklarla əməkdaşlıq edib, kredit götürüb işini görüb. Əsasən “Yapi Kredi Bank”ın və “AccessBank”ın müştərisi olduğunu və əvvəllər hər şeyin qaydasında getdiyini deyən R.Əhmədovun sözlərinə görə, lakin 2014-2015-ci illərdə onu şok vəziyyətə və məhkəmələrə salan olay baş verib. R.Əhmədov iddia edir ki, “Yapi Kredi Bank” xəbəri olmadan onun adına 16-17 kredit açıb. “Uzun müddət sahibkarlıq fəaliyyətilə məşğul olmuşam və banklardan kredit götürmüşəm. İşlədiyim bankların hamısının 1 nömrəli müştərisi olmuşam. 2014-2015-ci illərdə kredit götürmək üçün başqa bir banka getmişəm və orada mənə dedilər ki, “sənin “Yapi Kredi Bank”da 16-17 kreditin var”. Məlum oldu ki, mənim xəbərim olmadan “Yapi Kredi Bank” adıma kredit açıb, kimlərsə adıma kredit götürüb. Bunu araşdırmaq üçün “Yapi Kredi Bank”a getdim və bildirdim ki, başqa bankdan kredit götürmək istəyirdim, oradan mənə belə dedilər, mənim sizin bankda 16-17 kreditim necə ola bilər ki? Mənim “Yapi Kredi Bank”da 1 kreditim olduğu halda qanunsuz olaraq adıma 16-17 kredit “aformut” ediblər. Bankdan mənə cavab verdilər ki, xəzinədarın səhvi ucbatından problem baş verib, narahat olmayın, biz problemi qaydasına salacağıq. Yəni bank probemin aradan qaldırılacağına dair vəd verdi. Mən də inandım ki, problem aradan qalxacaq, çünki faktiki olaraq bu qədər kredit götürməmişəm, heç bir sənəddə imzam yoxdur. Fkirləşdim ki, bunun mənə heç bir ziyanı olmaz, cəmi bir kreditim var, onu da ödəyirəm az qalıb. Mənə bankdan dedilər ki, biz sənə 3 milyon kredit ayırırıq, heç nədən narahat olma, heç bir problem yoxdur, bu məsələni qaydasına salacağıq. Bu olayın üstündən xeyli vaxt keçəndən sonra gördüm ki, ləngimələr var və yenidən banka müraciət etdim. Bankın hüquqşünası dedi ki, 90 günlük müddət başa çatdığı üçün biz işi məhkəməyə verəcəyik. Dedim ki, mənim heç bir gecikdirməm yoxdur, heç kəslə problemim yoxdur, siz nəyi məhkəməyə verəcəksiniz? Bu dəfə isə dedilər ki, bizim sistemdə problem olub və biz bunu məhkəmə yolu ilə həll etməyə məcburuq. Yenə güzəştə getdim, dedim ki, yəqin düzəldərlər. Çünki o bankda tanıdığım, münasibət saxladığım insanlar var. Yenə də bunlara inandım. Beləliklə, bank işi məhkəməyə təqdim etdi və məhkəmə başladı. Gördüm ki, bunlar vəd etdiklərinə əməl edib işi məhkəmədən götürmək istəmirlər, onda bankdan baş idarə ilə məni əlaqələndirmələrini tələb etdim. Çünki malım karqoda qalmışdı, götürə bilmirdim, mənə pul verən yox idi. “Yapi Kredi Bank”ın mənim adıma qanunsuz olaraq, məndən xəbərsiz 16-17 kredit açması nəticəsində böyük problemlərlə üzləşmişəm. Düz 9 dəfə bu bankın baş ofisində qəbulda olmuşam, lakin nəticəsi olmayıb. Burada mənim özümün də səhvim olub, bank işçilərini pis vəziyyətdə qoymaq istəməmişəm. Mənim hüquqlarım “Yapi Kredi Bank” tərəfindən ciddi şəkildə pozulub”.
R.Əhmədovun sözlərinə görə, adına açılan qanunsuz kreditlərin silinməsi üçün “Yapi Kredi Bank”ın baş ofisi də ona köməklik etməyib və müvafiq tədbirlər görməyib. Şikayətçi qeyd edir ki, hətta adına yazılan kreditin növünü öyrənmək üçün də çətinliklərlə üzləşib: “Bank məni süründürməçiliyə məruz qoyub. Hətta mən hesabdan çıxarışı əldə edə bilmirdim ki, qanunsuz olaraq adıma hansı kreditlər yazılıb, hansı mədaxil, məxaric qəbzləri var. Bankın hansı filialına gedirdimsə, şəxsiyyət vəsiqəmə baxan kimi hesabdan çıxarışı verməkdən imtina edirdilər. Siz bankla işləmisinizə, istənilən vaxt hesabdan çıxarış götürə bilərsiniz və banklar bunu sizə verməyə borcludur. Amma mən ala bilmirdim. Lakin bir dəfə təsadüf nəticəsində mən hesabdan çıxarışı əldə etdim, 2016-cı ildə bu çıxarışı aldım. Mənim adımla bağlı olan bütün mədaxil, məxaric, bank hesab müqaviləsinin hamısını sistemdən çıxarıb möhürləyib özümə verdi, telefonumu da həmin sistemə qoşdu. Bankın mənim adıma “aformut” etdiyi kreditlərin məbləğini görəndə dəli oldum ki, mən bu qədər pul götürmüşəm? Bu bank adıma qanunsuz olaraq 2 milyon 451 min manat yazıb, dediyim kimi, mənim bundan xəbərim yoxdur, götürməmişəm. Mənim, ümumiyyətlə, “Yapi Kredi Bank”da dollarla kreditim olmayıb. Amma kreditə manat da, dollar da yazıblar. Qəribədir ki, 2 milyon 451 min manatdan 2 milyon 338 min ödənilib. Bunu özləri ödəyiblər. Bundan əlavə 815 min dollar pul götürüblər, 300 mindən çoxunu ödəyiblər. Əməliyyatı özləri edib, elə bil ki, sistemləri öz özünə işləyir. Bugünkü gün də işləyir”.
6 ildir ki, işin məhkəmədə olduğunu deyən R.Əhmədovun sözlərinə görə, bankda onun kredit götürməsinə dair nə bir fakt, mədaxil, məxaric qəbzləri var, nə də ödəmə ilə bağlı. “Orada yalnız mənim adım, atamın adı və soyadım var, şəxsiyyət vəsiqəmin nömrəsi yazılıb, amma orada imzam yoxdur. Yəni nə kreditin götürülməsi, nə də ödənilməsi ilə bağlı sənədlərdə mənim imzam var. “Yapi Kredi Bank”la böyük bir məhkəmə prosesi gedir və proses Sumqayıt şəhər Məhkəməsində gedib. Bilirdim ki, onlar məni Sumqayıt şəhər məhkəməsinə veriblər, lakin məhkəmə olub qətnamə çıxanda məni çağırmayıblar. Qətnamədə yazılmışdı ki, 7-8 müqavilə üzrə Rəhman Əhmədovun borcu var. İş gəlib Sumqayıt Apellyasiya məhkəməsinə çıxdı. Mən bu məhkəmədə işi dayandırdım. Mən ölkə rəhbərliyinə müraciət ünvanladıqdan və Ali Məhkəmənin sədri Ramiz Rzayevlə görüşdükdən, ona vəziyyəti izah etdikdən sonra mənim iddiamı qəbul etməyən məhkəmələr qarşılıqlı olaraq iddiamı qəbul etdilər.
Sonra Nəsimi Rayon Məhkəməsində iddia qaldırdım və bu proses il yarım davam etdi, Nəsimi Rayon Məhkəməsində mənim iddiam, tam olmasa da, qismən qəbul olundu. Məhkəmə qərar çıxardı ki, ortada heç bir sübut, mədaxil, məxaric, imza yoxdur.
Burada söhbət cinayətin üstünün ört-basdır edilməsindən gedir, bu sənədlərə ölkədə kim baxıbsa hamısı deyib ki, burada böyük maxinasiya, cinayət işi var. Hətta mən bütün məhkəmələrə yazılı sürətdə bununla bağlı cinayət işi qaldırılması üçün müraciət edirəm, amma cinayət işi qaldırılmır”.
Şikayətçi qeyd etdi ki, apellyasiya şikayəti verib və Apellyasiya Məhkəməsində hakim Məmməd Məmmədov tərəfindən işə baxılıb. “Məmməd Məmmədov Bakı Apellyasiya Məhkəməsində “Yapi Kredi Bank”la bağla bağlı məsələyə baxıb və 24.05.2021-ci il tarixdə məhkəmənin son iclası olub. Bakı Apellyasiya Məhkəməsinin qərarında qeyd edilir:”Rayon məhkəməsi ona aid olmayan iddianı icraata götürərək ona mahiyyəti üzrə baxmışdır”.
Sənəddə qeyd edilir ki, Mülki Prosessual Məcəllənin 387.2.1 maddəsinə görə, işə buna baxmağa hüququ olmayan hakim tərəfindən baxılmışdırsa iş üzrə həmin qəbul edilmiş qətnamə apellyasiya şikayətlərinin dəlillərindən asılı olmayaraq ləğv edilir. Burada söhbət ondan gedir ki, işə aidiyyəti olmayan hakimlər baxıb. Bunu Bakı Apellyasiya Məhkəməsi deyir, mən demirəm. Bu məhkəmə tərəfindən, iş kommersiya məqsədli olduğu üçün, ona Bakı Kommersiya Məhkəməsində yenidən baxılması ilə bağlı qərar qəbul edilib. İşə yenidən baxılacaq. Bu işdən mənim xəbərim yoxdur, 6 ildir gedən prosesdə bir sənəd ortaya çıxarılmayıb… İndiyə qədər özümə bir normal vəkil də tapa bilmirəm”.
“Adıma qanunsuz kredit yazan “Yapi Kredi Bank”la və artıq ödədiyim pulu qaytarmayan, bununla da sahibkarlıq fəaliyyətimə ciddi zərbə vuran “AccessBank”la bağlı məsələyə hüquqi qiymət verilməsini istəyirəm”
“AccessBank”la bağlı problemə gəlincə, şikayətçi qeyd etdi ki, 2016-cı ilin fevral ayına qədər bu banka pul ödəyib. R.Əhmədovun sözlərinə görə, həmin ərəfədə ölkədə olmadığı üçün bütün işləri burada onun mühasibi görüb və ödənişi o həyata keçirib: “Mənə zəng ediblər ki, bankın pulunun vaxtıdır, mən göndərmişəm. Heç vaxt banklarda gecikməm olmayıb. Sonra məlum oldu ki, kreditin ödənişi bitdiyi halda mənim mühasibatlığım banka əlavə pul ödəyib, bank da artıq ödənilən məbləğlə bağlı bizə heç bir məlumat verməyib. Bank da ödənilən artıq pulu geri qaytarmadı. Bununla bağlı 3 il müddətində bank mənə heç bir məktub yazmayıb. Ancaq bu 3 il ərzində mən banka artıq pul ödəmişəm. Bu bank da mənə “sistemdə problem var” deyib və bu “problemi düzəltmək” üçün məni məhkəməyə veriblər. “AccessBank” da “Yapi Kredi Bank” kimi söz verdi ki, məhkəmə iddiasını sonra geri çəkəcək, amma çəkmədi. Mənim “AccessBank”a borcum olmadığı halda, bu bankın mənə borcu olduğu halda məhkəməyə müraciət edib. amma pulumu geri qaytarmır”. 261 min manat bu banka artıq pul ödəmişəm, “AccessBank” pulumu qaytarmır”.
Bütün sənədlərin əlində olmasına baxmayaraq, hələ də banka qarşı heç bir tədbir görülmədiyini deyən şikayətçi qeyd etdi ki, bu sənədlərdən əlavə əlində Ədliyyə Nazirliyinin ekspertizasının rəyi də var. “Mən də iddia qaldırmışam, “AccessBank” da. Burada da saxtakarlığa yol verilib. Hər iki bankın işini eyni hakimdən keçiriblər, hakimə külli miqdarda pul veriblər. Qubadlı Rayon Məhkəməsində işə hakim İlqar Məmmədov baxıb. Bizim rayonun məhkəməsi Sumqayıtda yerləşir. Hər iki işlə bağlı məhkəmə gedib, “Yapi Kredi Bank”la bağlı işimiz Kommersiya Məhhəməsinə yönəldilib, “AccessBank”la bağlı işimizin müyyən bir hissəsi Konstitutsiya Məhkəməsindədir, qalan hissəsinə isə yenidən ali Məhkəmədə baxılacaq…
Bir sahibkar olaraq, hər iki bank tərəfindən başıma belə oyunlar gətirilib. Bir neçə kəlmə də vəkillər haqda demək istəyirəm. Mən bu müddətdə hələ bir normal vəkilə rast gəlməmişəm ki, lazımı səviyyədə mənim hüquqlarımı müdafiə edə. Adıma qanunsuz kredit yazan “Yapi Kredi Bank”la və artıq ödədiyim pulu qaytarmayan, bununla da sahibkarlıq fəaliyyətimə ciddi zərbə vuran “AccessBank”la bağlı məsələyə hüquqi qiymət verilməsini istəyirəm, pozulan hüquqlarımın bərpa edilməsi ən böyük tələbimdir. Mən məhkəmədən ədalətli qərar gözləyirəm. Yenidən sahibkarlıq fəaliyyətini davam etdirmək istəyirəm, çünki bu gün sahibkarlar üçün daha böyük şərait mövcuddur”-deyə R.Əhmədov qeyd etdi.
Şikayətçinin adını çəkdiyi “Yapi Kredi Bank”ın və “AccessBank”ın da mövqeyini dərc edə bilərik.
İradə SARIYEVA
