Azərbaycan polisinin "patı" və "kakos"a qarşı əməliyyatları daha barışmaz xarakter alır…

Şəmsəddin Əliyev: “Belə cinayətlərlə mübarizə kifayət qədər müddət tələb edən və çətin həyata keçirilən əməliyyatlardı”

img

Daxili İşlər Nazirliyi Baş Narkotiklərlə Mübarizə İdarəsinin əməkdaşları tərəfindən narkotik vasitə və psixotrop maddələrin qanunsuz dövriyyəsi, kultivasiyası, sosial şəbəkələrdə onlayn yolla satışı ilə məşğul olan şəxslərin aşkar edilərək məsuliyyətə cəlb edilmələri istiqamətində növbəti əməliyyatlar həyata keçirilib.

Belə ki, Baş İdarə əməkdaşlarının Astara rayonunda həyata keçirdiyi əməliyyat zamanı narkotik vasitələrin ölkə ərazisinə qanunsuz yollarla gətirilməsini təmin etməkdə şübhəli bilinən əvvəllər məhkum olunmuş Şıxəli Fətullayev saxlanıb. Onun Astara rayonu ərazisində dağlıq və meşəlik sahədə gizlətdiyi yerdən ümumilikdə 5 kiloqram 385 qram heroin aşkar edilib.

Baş İdarə əməkdaşlarının Yevlax rayonunda həyata keçirdiyi digər bir əməliyyat zamanı isə narkotik vasitələrin qanunsuz kultivasiyası ilə məşğul olan Səbuhi Məmmədov saxlanılıb. Onun yaşadığı Aşağı Qarxun kəndindəki evin həyətinə baxış zamanı 9 kq 450 qram qurudulmuş marixuana və 7 kq 800 qram yaş halda çətənə kolu aşkar olunub. Səbuhi Məmmədov çətənə kollarını satmaq məqsədilə xüsusi qulluq edərək yetişdirdiyini bildirib.

Baş İdarə əməkdaşlarının daxil olan əməliyyat məlumatı əsasında Binəqədi rayonunda həyata keçirdiyi daha bir əməliyyat zamanı isə paytaxt sakinləri Vüqar Hüseynov və Kamil Rəşidov saxlanıb. Onların üzərindən və Kamil Rəşidovun idarə etdiyi “Ravon” markalı avtomobilə baxış zamanı ümumilikdə 9 kq heroin və 1kq 50 qram “patı” “şüşə” kimi tanınan psixotrop maddə metamfetamin aşkar olunub. İlkin dindirmə zamanı Vüqar Hüseynov narkotik vasitələri sosial şəbəkələrdə tanış olduğu xarici ölkələrdən birinin vətəndaşının Binəqədi rayonu ərazisində əvvəlcədən yerləşdirdiyi yerdən satmaq məqsədilə əldə etdiyini bildirib. Vüqar Hüseynov həmyerlisi Kamil Rəşidovla birlikdə həmin narkotik vasitələri, yəni heroini və “patı” adlanan metamfetamini Bakı şəhərində müxtəlif ünvanlara qoymaqla ayrı-ayrı şəxslərə çatdırılmasını və satışını təşkil etməli imiş.

Baş İdarə əməkdaşlarının Yasamal və Xətai rayonlarında həyata keçirdiyi əməliyyat zamanı narkotik vasitə və psixotrop maddələrin satışı ilə məşğul olan Vüsal İbrahimov və Babək Ağayev saxlanıb. Həmin şəxslərdən, həmçinin onların yaşadığı ünvanlardan müvafiq olaraq 21 və 165 qram metamfetamin, eləcə də heroin aşkar edilib.

Baş İdarə əməkdaşlarının paytaxtın Nizami rayonunda həyata keçirdiyi digər bir əməliyyat zamanı isə narkotik vasitələrin satışı ilə məşğul olan 2 nəfər - əvvəllər məhkum olunmuş Elşən Əyyubov və Samir Əliquliyev saxlanıb. Onlardan ümumilikdə 7 qrama yaxın narkotik vasitə və psixotrop maddə olan metamfetamin aşkar olunub.

Baş İdarə əməkdaşlarının Nərimanov rayonunda həyata keçirdiyi növbəti əməliyyat zamanı narkotik vasitə və psixotrop maddələrin satışı ilə məşğul olan Azər Fətullayev saxlanıb. Onun üzərinə baxış zamanı ümumilikdə 725 qram heroin və “patı”, “şüşə” adlanan psixotrop maddə metamfetamin aşkar olunub.

Baş İdarə əməkdaşları tərəfindən Xəzər rayonunda həyata keçirilən sonuncu əməliyyat zamanı isə narkotik maddələrin satışı ilə məşğul olan Binə qəsəbə sakini Cavid Səfərov və Buzovna qəsəbə sakini Şahrza Məlikov saxlanıb. Onlardan müvafiq olaraq 150 və 67 qram heroin və metamfetamin aşkar olunub.

Sonuncu əməliyyatlar zamanı Baş İdarənin əməkdaşları tərəfindən ümumilikdə 27 kq-dan artıq narkotik vasitələr və psixotrop maddələr qanunsuz dövriyyədən çıxarılıb.

Faktlarla bağlı Cinayət Məcəlləsinin müvafiq maddələri ilə cinayət işləri başlanıb və adları sadalanan şəxslər tutularaq istintaqa cəlb olunub. Cinayət işləri üzrə zəruri istintaq-əməliyyat tədbirləri davam etdirilir.

Göründüyü kimi, polis bütün ölkə boyunca narkoticarətə qarşı amansız mübarizə aparır. Polisin narkomafiya ilə mübarizəsini mütəxəsislər necə qiymətləndirir?

Hüquqşunas, istefada olan polkovnik Şəmsəddin Əliyev “Bakı-Xəbər”ə açıqlamasında bildirdi ki, narkotik vasitələrin qanunsuz dövriyyəsi tarnsmilli cinayətkarlığın ən təhlükəli növlərindən biridir: “ İstənilən ölkədə bu qrupların hakimiyyət dairələrində havadarları olur. Hətta elə ölkələr var ki, onlar hakimiyyətə qarşı silahlı mübarizə də aparmaq gücündə olurlar. Azərbyacan bu sahədə bir qədər fərqli mövqedə dayanır. Son illərdə cinayətkarlıqla mübarizə kifayət qədər innovativ və modern əsaslarla həyata keçirilir. Narkonamnlıq bizdə də var. Amma DİN-in əlaqədar qurumları həmin hallarla bağlı kifayət qədər ciddi mübarizə aparır. Əsas diqqət ondan ibarətdir ki, narkomafiya cəmiyyətdə gəncləşməsin. Təbiidir ki, bu sahədə mübarizəyə cəmiyyətin də dəstəyi olmalıdır.  Azərbaycanda 30 min qeydiyyatda olan narkoman var. Ola bilər ki, qeydiyyata düşməyən narkomanlar da var.  Son günlərdə biz narkomafiya ilə mübarizənin prinsipail xarakter almağa başladığını görürük.  Mübarizə yalnız “patı”, “şüşə”, “kakos”la  aparılmamalıdır. Hesab edirəm ki, apteklərdə satılan narkotik tərkibli dərmanlarla bağlı da ciddi mübarizə getməlidir. Onların satışı ümumiyyətlə apteklərdən yığışdırılmalıdır. Həmin preparatlar klinikalara göndərilməlidir. Narkomaniya ilə mübarizəyə KİV də ciddi dəstək verməlidir”.

Ekspertin sözlərinə görə, bunun zərərli tərəfləri əhaliyə təfsilatı ilə çatdırılmalıdır: “Bəzi adamları aldadıb ona alüdə ediblər. Uzun müddət “patı”nın reklamı getdi ki, insanı tez zamanda arıqladır. Sosial şəbəkələrdə bu şəkildə aktiv təbliğatdan sonra məlum oldu ki, 2-3 dəfə qəbuldan sonra insanda ondan asılılıq yaranır. Bu hallarla mübarizə çox da asan deyil. Statistika göstərir ki, belə halların aşkarlanması ilə bağlı hallar çoxalıb. Belə cinayətlərlə mübarizə kifayət qədər müddət tələb edən və çətin həyata keçirilən əməliyyatlardı. Mən  bu istiqamətdə polisə dəstək verən   şəxslərə təşəkkür edirəm və hamını dəstəyə çağırıram. Bununla bağlı 2019-2024-cü illəri əhatə edən Milli Fəaliyyət Planı da var.  Buna uyğun olaraq bütün dövlət qurumları bu bəla ilə mübarizəyə səfərbər olur”.

Məhəmmədəli QƏRİBLİ

Son xəbərlər