Böyük tədbirlərin keçirilməsi ilə bağlı qadağa aradan qalxdıqdan sonra müxtəlif növ tədbirlər, o cümlədən mükafatlandırma mərasimləri də rahat şəkildə keçirilir. Son günlər sosial şəbəkədə ən çox müzakirə edilən mövzu da elə keçirilən mükafatlandırma mərasimləridir.
Məlumat üçün bildirək ki, bu günlərdə Bakıda “Xarıbülbül” mükafatlandırma mərasimi keçirilib. Mərasim bitsə də, mükafatlandırma ilə bağlı qalmaqal hələ də davam edir. Qeyd olunur ki, mükafat şəxslərə pulla verilib. Müxtəlif sahənin insanlarına sözügedən mükafat 1000 manata verilib. İddia olunur ki, tədbirin təşkilatçısı Ləman Mirtalıblı mükafat qarşılığında insanlardan pul istəyir.
Digər mükafat ifşası isə müğənni İlhamə Qasımovadan gəlib. O qeyd edib ki, mükafat üçün ondan 400 manat istəyiblər.
Mükafatlandırma mərasiminin təşkilatçısı “Mirtalibli Group” şikətinin rəhbəri Ləman Mirtalıblı “Lent.az”-a açıqlamasında qeyd edib ki, mərasimdə iştirak edən şəxslər tək “Xarıbülbül” mükafatına görə yox, həm digər mükafatın təqdimetməsinə, həm də jurnal təqdimatına gəlmişdilər: “Onlar arasında iş adamları, sahibkarlar, mütəxəssislər, jurnalistlər, sənət adamları, qazilərimiz və s. var idi”. “Xarıbülbül”lə bağlı səsləndirilən iddiaları cavablandıran şirkət rəhbəri bildirib ki, paylaşılan “screen”lər qurama olub və yalandır: “Yayılan görüntülər barədə məlumatlı idim, sadəcə gözləyirdim ki, tədbir baş tutsun və bununla bağlı müvafiq addımları atım. Yazışmaların yayılması hüquqi tərəfdən düzgün deyil. Mükafat qarşılığında 1 000 manat almağımız isə uydurmadır. Orada yazılan 1 000 manat mükafat verilməsi üçün yox, iştirak haqqı üçün olub. Sözügedən məbləğə isə həmin vətəndaşın uçuş biletləri, otel xərcləri və s. daxil olub. Mükafat heç kəsə satılmır və bunu ancaq layiq olan şəxslər ala bilir”.
Qeyd edək ki, bu kimi söhbətlər dəfələrlə müzakirə olunub. Mükafatların pulla satılması ilə bağlı iddialar dəfələrlə səslənib.
“Təşkilatçılar məşhur adamları belə mükafatlarla təltif edib özlərini məşhurlaşdırır, sonra bundan yaxşı biznes düzəldirlər”
Sosioloq Aytəkin Kamranqızı bildirdi ki, mükafatların pulla satılması məsələsi uzun illərdir müzakirə olunur: “Bəziləri bunu biznesə çevirib. Dünyada da belədir. Məşhur adamları belə mükafatlarla təltif edib özlərini məşhurlaşdırırlar. Sonra bundan yaxşı biznes düzəldirlər. Bəzən çox mötəbər təşkilatlar da belə ödüllər verir. Amma bunun da matahını çıxarmağa dəyməz. Elə təşkilatlar, QHT-lər var ki, işi-peşəsi ona-buna təşəkkürnamə, sertifikat, qramota paylamaqdır, bu üzrə ixtisaslaşıblar. Ən acınacaqlısı isə Xarıbülbülün adından istifadə edilməsidir. Bir çox təşkilatçılar mükafat vasitəsilə daha çox qazanc əldə etmək istəyirlər. İndi də əllərinə fürsət düşüb, mükafat paylayıb və ya satanlar xeyriyyəçi adından istifadə edir. Yəni kimsə qazilərə və ya şəhid ailələrinə yardım edibsə və ya etməyibsə, diplomun üzərinə xeyriyyəçi kimi adını yazıb həmin şəxsi təltif edirlər. Təbii ki, bu işi görən şəxslər pul müqabilində mükafatı təqdim edirlər. Bu rüsvayçılığa son qoyulmalıdır”.
Günel CƏLİLOVA
