İndiyə qədər heç bir ciddi layihənin altında imzası olmayan bələdiyyə orqanları əhalidən pul toplamağın yeni üsullarını icad ediblər. Keçən ildən başlayaraq bina evlərinə yerli bələdiyyə qurumları tərəfindən tədiyyə bildirişləri göndərilir və sakinlərdən əmlak vergisi tələb olunur.
Vətəndaşın əmlakının olub-olmaması ilə bağlı heç bir araşdırma aparmadan, heç bir əsaslandırma ortaya qoymadan bina evlərində yaşayan vətəndaşlara da tədiyyə bildirişləri göndərilir. Ümumiyyətlə, bələdiyyə ərazidə nə iş görür ki, vergi də tələb edir? Bakıda, Xırdalanda, Sumqayıtda və sair bina evində yaşayan vətəndaşlar deyir ki, bələdiyyələrin vətəndaşdan əmlak vergisi tələb etməsi doğru deyil. Vətəndaşların sözlərinə görə, bildirişdə qeyd edilir ki, verginin ödənilməsi vətəndaş tərəfindən gecikdirildikdə hər ötən gün üçün 0,1 faiz tutulacaq və maliyyə sanksiyası tətbiq olunacaq.
Vətəndaşlar hesab edir ki, bu bildirişlərin onlara ünvanlanması tamamilə qanunsuzdur.
Biz də bunu araşdırmaq qərarına gəldik. Bələdiyyənin bina evlərinə əmlak vergisi tələbi ilə bildiriş göndərməsi qanunidir, yoxsa qanunsuz?
“...Kupçası olmayan mənzillər üçün göndərilirsə qanunsuzdur”
Bələdiyyə sahəsi üzrə mütəxəssis Fərman Salmanov bizimlə söhbətində bildirdi ki, bina evlərinə göndərilən bildirişlər tədiyyə bildirişləridir. “Bu bildiriş əmlak vergisi ilə əlaqədar göndərilir. Bələdiyyələr tərəfindən bina evlərinə əmlak vergisinin ödənilməsi ilə bağlı bildiriş göndərilməsininin qanuni olub-olmadığına gəlincə, bu, kupçası olmayan mənzillər üçün göndərilirsə qanunsuzdur. Amma kupçası olan evlər üçün qanunidir. Mənzilin kupçası varsa, istənilən əmlak üçün əmlak vergisi ödənilməlidir. Bu, Əmlak Vergisi Haqqında Qanun və Vergi Məcəlləsi ilə təsbit edilib. Amma bunun kupçasız mənzillərə aidiyyəti yoxdur, bu cür mənzillər üçün ödənişlər olmur. Çünki xüsusi mülkiyyət olaraq təyin edilməyib. Yalnız kupçası olanlar üçün müəyyənləşdirilib”.
Mənzil sahibləri pulu ödəmədikdə onlardan konkret faiz tələb edilməsinə gəlincə, F.Salmanovun sözlərinə görə, bu, gecikdirmə ilə bağlı olur. Göndərilən bildirişlərə gəlincə isə, ekspert bunun Bələdiyyələrin Avtomatlaşdırılmış Məlumat Sistemi (BAMS) proqramından çıxarış olduğunu bildirdi. “Ödəniş gecikəndə sistem gecikmə faizi hesablayır. Qanunvericiliyə əsasən, son 3 ili hesablaya bilirlər”-deyə ekspert qeyd etdi.
F.Salmanovun sözlərinə görə, burada konkret olaraq söhbət əmlak vergisindən gedir və bu da müvafiq qanunvericiliklə tənzimlənir.
İradə SARIYEVA
