“Son illər ərzində ölkəmizdə genişmiqyaslı özünüməşğulluq proqramı icra edilir. Biz hər il özünüməşğulluqla məşğul olmaq istəyənlər üçün vasitələr təqdim edirik və onların sayı artır”. Bu fikirləri Prezident İlham Əliyev Xocasən qəsəbəsində şəhid ailələri və müharibə əlillərinə mənzillərin və avtomobillərin təqdim edilməsi mərasimindəki çıxışında deyib.
Azərbaycan Prezidenti bildirib ki, bu il 16 min insan özünüməşğulluq proqramına cəlb olunacaq: “Dövlət tərəfindən onlara vasitələr veriləcək və beləliklə, onlar öz gələcək maddi imkanlarını özləri təmin edəcəklər. Özünüməşğulluq proqramına cəlb olunan 16 min nəfər arasında artıq 5 mindən çox şəhid ailəsinin üzvləri və müharibə əlilləri vardır. Yəni bu da daim diqqət mərkəzində olan məsələdir”.
Ekspertlər qeyd edir ki, Prezident bütün vaxtlarda bu kateqoriyadan olan şəxslərin, ailələrin işlə təmin olunmasını diqqətdə saxlayıb. Özünüməşğulluq proqramına cəlb ediləcək vətəndaşlar arasında 5 mindən çox şəhid ailəsinin üzvləri və müharibə əlillərinin olmasının mühüm əhəmiyyət kəsb etdiyini vurğulayan ekspertlərin fikrincə, Əmək və Əhalinin Sosial Müdafiəsi Nazirliyi özünüməşğulluq proqramına cəlb ediləcək 16 min nəfərin tam tərkibini bu kateqoriyadan olan ailələrdən seçərsə daha yaxşı olar.
“Bu, belə ailələrin daha geniş tərkibdə məşğulluğunun artırılmasında, işlə təmin olunmasında mühüm rol oynayar”
“Novoye vremya” qəzetinin baş redaktoru Şakir Ağayev bizimlə söhbətində vurğuladı ki, özünüməşğulluq proqramının həyata keçirilməsi nə qədər insana dəstək göstərilməsi deməkdir: “Bəli, Prezident İlham Əliyev Xocasən qəsəbəsində şəhid ailələri və müharibə əlillərinə mənzillərin və avtomobillərin təqdim edilməsi mərasimindəki çıxışında çox mühüm məsələlərə toxundu. Onlardan biri də bu kateqoriyadan olan insanların və ailələrin daimi iş yerləri ilə təmin edilməsi ilə bağlı idi. Prezident onu da bildirdi ki, bu sahədə işlər davam etdirilir, iş adamları da bu işdə yardımçı olur. Təbii ki, özünüməşğulluq proqramına cəlb olunanlar arasında 5 mindən artıq şəhid ailəsi üzvlərinin və müharibə əlillərinin olması müsbət haldır. Özünüməşğulluq proqramına cəlb ediləcək 16 min insanın tam tərkibini bu kateqoriyadan olan insanlar təşkil edərsə, bu, onlara göstərilən dövlət qayğısının bir neçə qat olduğunun göstəricisi olardı. Bu belə ailələrin daha geniş tərkibdə məşğulluğunun artırılmasında, işlə təmin olunmasında mühüm rol oynayar. Dövlətin birbaşa qayğısı nəticəsində sosial problemlərin müəyyən hissəsi həll olunar. Bütün hallarda, dövlət bu kateqoriyadan olan ailələrin, insanların məşğulluğunun təmin olunması üçün bütün gərəkən addımları atır, onlara maddi və mənəvi dayaq olur, fəaliyyətlərini stimullaşdırır”.
Ş.Ağayevin sözlərinə görə, insanların məşğulluq proqramına cəlb edilməsi hansı prosedurlarla müəyyən olunursa, aidiyyəti qurumlar ona uyğun şəkildə addım atmalıdır.
İradə SARIYEVA
