44 günlük Vətən müharibəsi zamanı azğınlaşmış ermənilər mülki əhalini hədəf aldılar. Onlar əlisilahlı hərbçilərlə deyil, sadə insanlarla, uşaqlarla, yaşlılarla müharibə aparmağa üstünlük verirdilər.
İkinci Qarabağ müharibəsi dövründə Ermənistan silahlı qüvvələri münaqişə zonasından və cəbhə xəttindən uzaqda yerləşən dinc şəhər və rayonları müxtəlif növ silahlarla, artilleriya və ballistik raketlərlə atəşə tutaraq, mülki əhalini və eləcə də infrastruktur obyektlərini hədəf seçərək, fərdi yaşayış evlərinə, sosial və iaşə obyektlərinə irimiqyaslı zərər vurub. Dəymiş ziyanın qiymətləndirilməsi və aradan qaldırılması məqsədilə Azərbaycan Prezidenti İlham Əliyevin 6 noyabr 2020-ci il tarixli müvafiq Sərəncamı ilə yaradılmış Dövlət Komissiyası tərəfindən təşkil olunmuş fəaliyyət nəticəsində ümumilikdə 11 şəhər və rayon ərazisində 12 000-dən artıq obyektə baxış keçirilib, qiymətləndirmə və təmir-tikintinin ilkin planlaşdırılması işləri aparılır.
Qeyd etdiyimiz kimi, 44 günlük Zəfər müharibəsində mülki əhaliyə dəymiş ziyanın ödənilməsi ilə bağlı tapşırıq verilsə də, bu işdə ləngimələr müşahidə edilir. Belə ki, Ağcabədi rayonu Qaraxanlı kəndində Quliyev Aqil Ramazan oğluna məxsus ev raket zərbəsi nəticəsində yararsız hala düşüb. Belə ki, 17 oktyabr 2020-ci ildə Aqil Quliyevin evinə raket düşüb. Mərmi evin damından girərək içərisində partlayıb. Nəticədə bir otaq tamamilə dağılıb, mətbəx, hamam və digər otaqlar yararsız hala düşüb. Zərbənin gücündən evin bünövrəsi də dağılıb.
A.Quliyev bildirir ki, müharibədən 9 ay keçib, hələ də gəlib evini təmir etmirlər: “5 azyaşlı uşaqla qonşuda yaşayırıq. Adam adamın evində 3 gün, 5 gün, lap bir ay qalar. Biz 9 aydır qonşunun evində qalırıq. Bütün qurumlara müraciət etmişəm. Ağcabədi Rayon İcra Hakimiyyətindən deyirlər ki, nə vaxt növbə çatacaq, onda düzələcək. Elə evlər var ki, çox kiçik zərər dəyib, onu təmir etdilər, nədənsə mənim evimi gözləmədə saxlayırlar. Hamısı rüşvətdir! Pul ver, gəlib evini tikib versinlər”.
“Ölkə başçısının da xüsusi tapşırığı var ki, 44 günlük Vətən müharibəsi zamanı zərər görən hər bir şəxsə dəstək göstəriləcək”
Sosial sahə üzrə ekspert Mayis Əliyev bildirdi ki, Vətən müharibəsi zamanı ermənilər əhalinin yaşadığı bir çox ərazini hədəfə aldılar. Nəticədə insanların yaşadığı mənzillər yararsız hala düşdü. Həmin mənzillərin təmir olunması istiqamətində aidiyyəti qurumlar tərəfindən iş aparılır: “Hətta bununla bağlı ölkə başçısının da xüsusi tapşırığı var ki, 44 günlük Vətən müharibəsi zamanı zərər görən hər bir şəxsə dəstək göstəriləcək”.
Həmsöhbətimiz onu da əlavə etdi ki, İkinci Qarabağ müharibəsi zamanı zərər görmüş evlər qısa müddətdə təmir olunmalı idi. Müharibə 9 aydır bitib, ancaq bəzi vətəndaşın evi hələ də yararsız vəziyyətdədir: “Bəzi məmurlar vəziyyətdən sui-istifadə edib, vətəndaşları incidir. Ancaq unutmaq lazım deyil ki, bu cür həssas məsələdə insanları incitmək olmaz. O şəxslərin evi öz günahlarından deyil, ermənilərin atdığı raket nəticəsində yararsız hala düşüb. Əhaliyə dəymiş ziyanın ödənilməsi ilə bağlı Prezidentin xüsusi göstərişi var. Aidiyyəti qurumlar insanları incitməzdən öncə Prezidentin sərəncamlarını, göstərişlərini xatırlasın”.
Günel CƏLİLOVA
