Redaksiyamıza Lənkəran Dövlət Universitetinin İqtisadiyyat fakültəsində əyani və ödənişli təhsil alan bir qrup tələbə tərəfindən müraciət daxil olub. 2020-2021-ci tədris ilində subbakalavrdan bu ali məktəbin İqtisadiyyat fakültəsinə qəbul olan və hazırda orada oxuyan 16 nəfər tələbə qəzetimiz vasitəsilə Təhsil Nazirliyinə müraciət edərək, ali təhsillərinin qiyabi şəkildə davam etdirilməsinə şərait yaradılmasını istəyir.
Tələbələrin müraciətində qeyd edilir ki, təhsil aldıqları fakültəyə 2020-2021-ci tədris ilində qəbul olunanlar üçün qiyabi təhsil alma yoxdur, subbakalavrdan qəbul olduqları üçün isə başqa fakültələrə dəyişdirilə bilmirlər. Tələbələrin sözlərinə görə, işlədikləri üçün dərslərini əyani şəkildə davam etdirmələri mümkün deyil, əyani formada təhsil almaq onların iş fəaliyyəti ilə üst-üstə düşmür, ödənişli oxuduqları üçün isə təhsil haqqını ödəmələrinə görə işləmələri vacibdir. Tələbələr deyir ki, 2020-2021-ci tədris ilində Lənkəran Dövlət Universitetinin İqtisadiyyat fakültəsinə əyani qəbul olanların hamısı onlayn qaydada Təhsil Nazirliyinin müvafiq portalına da müraciət edib və oxuduqları fakültənin qiyabisinin açılmasını xahiş ediblər, lakin hələ nazirlik buna reaksiya verməyib. Tələbələrin sözlərinə görə, 2021-ci ilin yanvar ayında onlara universitetdən, konkret olaraq oxuduqları fakültənin dekanlığından bildirilib ki, ərizə ilə nazirliyə müraciət etsinlər, nazirlik onların müraciətindən sonra qiyabini aça bilər. Tələbələr deyir ki, nə qədər müraciət etsələr də, hələ ki, nəticə yoxdur.
Məsələ ilə bağlı Təhsil Nazirliyinin mətbuat xidməti ilə əlaqə saxladıq. Nazirliyin mətbuat xidmətinin rəhbəri Cəsarət Valehov bizimlə söhbətində bildirdi ki, 2020-2021-ci tədris ilində Lənkəran Dövlət Universitetinin İqtisadiyyat fakültəsində qiyabi tədrisin açılması mümkün deyil, bu olmayıb, indi də açılmayacaq. C.Valehovun sözlərinə görə, bu tələbələr sübbakalavrdan qəbul olunduqları üçün onların başqa fakültələrin qiyabi şöbəsinə dəyşdirilməsi də mümkün deyil, vəziyyətdən çıxış yolu isə bu tələbələrin işdən çıxıb təhsillərini əyani şəkildə davam etdirməsindədir.
“Qiyabi şöbənin açılması Təhsil Nazirliyinin ixtiyarındadır və qiyabi şöbəni ali məktəbin razılığı əsasında açmalıdır…”
Tanınmış təhsil eksperti Elçin Əfəndi “Bakı-Xəbər”ə bildirdi ki, bu məsələnin həlli qarşıda duran vacib vəzifələrdən biridir, amma indiyə qədər öz həllini tapmayıb. Subbakalavrların bu istiqamətdə üzləşdiyi problemlərin həll edilməli olduğunu deyən ekspert hesab edir ki, onları ali təhsillərini başa vurmaqdan məhrum etmək olmaz: “Bu olduqca aktual məsələdir və biz bunu indiyə qədər kifayət qədər işıqlandırmışıq, ictimailəşdirmişik, amma təəssüflər olsun ki, hələlik bu məsələdə hər hansı bir irəliləyiş yoxdur. Bilirsiz ki, sübbakalavrlara 2019-cu ildən ali məktəblərə qəbul edilmələri ilə bağlı şans yaradıldı. 2012-ci ildə kolleci bitirib subbakalavr dərəcəsi almış şəxslərə müsabiqədə imtahan vermədən işə götürülmək imkan verildi. Həmin şəxslər ali təhsil müəssisələrinə sənəd verdikdə, təəssüflər olsun ki, yalnız əyani ixtisasları yazdıqları zaman qəbul olunurlar. Bəzi ixtisasların qiyabisi yoxdur, yalnız əyanisi var. Əyani düşdükləri zaman isə, təbii ki, seçim etmək həmin şəxslərin öz ixtiyarındadır. Yəni bu yerin əvvəlcədən əyani olduğunu biliblərsə, buna təəssüf ki, heç kəs qarışa bilmir. Çıxış yolu “part-time” tədris formasının tətbiqidir. Bu tələbələr 16-17 nəfərdirsə, yığışıb ərizə ilə rektora müraciət etməlidirlər və rektor “part-time” tədris formasının tətbiqi haqqında qərar qəbul etməlidir. Qiyabi şöbənin açılması Təhsil Nazirliyinin ixtiyarındadır və Nazirlik qiyabi şöbəni ali məktəbin razılığı əsasında açmalıdır, amma faktiki qiyabi təhsil forması müəyyən ali təhsil müəssisələrinə sərf etmədiyi üçün onlar yalnız əyani təhsil formasına üstünlük verirlər. Əyani və qiyabi təhsil formalarının təhsil haqqında da xeyli fərq olduğunu bilirsiniz, ən az 200-300 manat fərq yaranır. Belə olduğu halda həmin universitetlər də daha çox əyani təhsil formasına üstünlük verirlər. Subbakalavrların çoxu ailəli, müxtəlif yerlərdə işləyən, məsafə baxımından gedib-gəlmək sarıdan əziyyət çəkən insanlardır, ona görə də onların vəziyyəti nəzərə alınmalıdır”.
E.Əfəndi qeyd etdi ki, hər halda, onlar üçün distant təhsil təşkil olunsun və onlar təhsildən geri qalmasınlar. Bütün hallarda sübbakalavrların problemi olduğunu deyən E.Əfəndinin sözlərinə görə,
onların transfer olması məsələsi də mükünsüzdür, çünki sübbakalavrlarla bağlı meyarlar müəyyən olunmayıb, onlar yeni-yeni qəbul olurlar, üç-dörd il keçməlidir ki, onlar bu transfer məsələsinə baş vursunlar. “Amma hazırkı dövrdə, təəssüf ki, buna imkan verilmir”-deyə E.Əfəndi vurğuladı.
Ekspert əlavə etdi ki, bütün hallarda onların müraciətlərinə həssas yanaşılmalıdır.
İradə SARIYEVA
