Qonşu dövlətləri və dünyanın bir sıra ölkələrini cənginə alan “Delta” Azərbaycanda da peyda olub. Ölkəmizdə 31 nəfərdə koronavirusun “Delta” ştammı aşkarlanıb.
“Bir ildən uzun müddətdir davam edən SARS-CoV-2 pandemiyası bütün dünyada mühüm səhiyyə problemi olmaqla birlikdə, sosial və iqtisadi cəhətdən də ciddi çətinliklər yaratmaqdadır. SARS-CoV-2 infeksiyasına qarşı aparılan tədbirlər, peyvəndlənmənin təşkili və effektivliyinin öyrənilməsi baxımından ölkəmiz dünyada ön sıralardadır”.
Bu barədə Səhiyyə Nazirliyi, İcbati Tibbi Sığorta üzrə Dövlət Agentliyi və Tibbi Ərazi Bölmələrini İdarəetmə Birliyinin (TƏBİB) birgə məlumatında bildirilib.
Qeyd olunub ki, koronavirusların mutasiyaları nəticəsində son zamanlar meydana çıxan yeni variantlar bütün dünyada ciddi narahatlıq doğurur. Ölkəmizdə epidemioloji vəziyyətin nəzarətdə saxlanılması üçün görülən tədbirlər çərçivəsində Milli Hematologiya və Transfuziologiya Mərkəzinin Genetik Diaqnoz Mərkəzində SARS-CoV-2 virusunun genetik variantlarına dair mütəmadi analizlər aparılır.
Aparılan araşdırmaların növbəti mərhələsində son dövrdə ölkə xaricindən gələn şəxslərdən alınmış nümunələrdən 31-də B.1.617 (Delta) variantı, 9-da B.1.1.7 (20 Alpha V1, Britaniya) variantı aşkar olunub: “Dünyada və ölkəmizdə aparılan tədqiqatlardan əldə olunmuş nəticələrin təhlili bir daha göstərir ki, virusun yeni və sürətlə yayılan təhlükəli variantlarından qorunmağın ən effektiv yolu vaksinasiyadır. Bu gün ölkəmizdəki sabit epidemioloji vəziyyəti aparılan vaksinasiyaya borcluyuq. Bir daha bütün vətəndaşlarımızı vaxt itirmədən vaksinasiya olunmağa çağırırıq.
Unutmamalıyıq ki, vaksinasiya ilə yanaşı, fiziki məsafənin saxlanılması, maskalardan istifadə və əl təmizliyi kimi qaydalar, virusun variantından asılı olmayaraq, xəstəlikdən qorunmağın, dünyada və ölkəmizdə normal həyata qayıtmağın yeganə yoludur”.
Koronavirusun “Delta” ştammının Azərbaycanda da aşkarlanması məsələyə daha ciddi və məsuliyyətlə yanaşmağı tələb edir.
“Delta” ştammı ilə mübarizədə nələr etmək lazımdır ki, bu ştammın sürətlə yayılmasının qarşısı alınsın?
“...Vaksinasiya prosesi də tam olaraq başa çatdırılmalıdır”
Tibb üzrə tanınmış mütəxəssis, professor Ədalət Rüstəm “Bakı-Xəbər”ə bildirdi ki, “Delta” ştammı ilə daha aktiv şəkildə mübarizə aparılmalıdır. Ə.Rüstəm hesab edir ki, qoruma tədbirlərini gücləndirmək mütləqdir: “Qoruma tədbirləri daha da gücləndirilməlidir. Binalar, evlər, küçələr, müəssisələr başdansovdu şəkildə deyil, bütün qaydalara uyğun şəkildə dezinfeksiya edilməlidir. Dezinfeksiya məsələsinə ciddi yanaşılmalıdır. Düşünürəm ki, bütün sanitariya-gigiyena qaydalarına riayət edilməli, maskadan davamlı istifadə edilməli, sosial məsafə saxlanılmalıdır. Bu məsələyə barmaqarası yanaşmaq olmaz, səhlənkar, biganə yanaşsaq, “Delta”ya da yoluxanların sayı sürətlə arta bilər. Hər şey görüləcək qoruyucu tədbirlərdən və insanların qaydalara riayət etməsindən asılıdır”.
Ə.Rüstəm xatırlatdı ki, bir müddət əvvəl Azərbaycanda da “Delta” ştammının olması ilə bağlı açıqlama verib, onun fikirləri həmin zaman rəsmən təsdiqlənməsə də, artıq indi rəsmən təsdiqlənib. “Biz demişdik ki, Azərbaycanda “Delta” ştammına yoluxanlar var, həmin zaman təsdiq etmədilər, amma 10-15 gündən sonra bunu rəsmən açıqladılar. “Delta” ştammı ilə mübarizə tədbirləri gücləndirilməlidir, bu ştammın aşkarlandığı şəxslər təcrid edilməli, onların ətrafla ünsiyyətinə icazə verilməməlidir. “Delta”nın daha geniş miqyas almaması üçün vaksinasiya prosesi də tam olaraq başa çatdırılmalıdır, insanlarımız vaksinasiya olunmaqdan çəkinməməlidir. Bundan əlavə, sərhəddə nəzarət ciddiləşdirilməlidir, ölkəyə daxil olan hər bir şəxs ciddi şəkildə müayinə olunmalıdır. Milli Hematologiya və Transfuziologiya İnstitutunda xüsusi laborotoriya fəaliyyət göstərir, orada verilən analiz nəticəsində “Delta” ştammının olub-olmadığını müəyyən etmək olur”-deyə bildirən Ə.Rüstəm hesab edir ki, toyların, şənliklərin və əyləncələrin təşkilində normaların gözlənilməməsi də “Delta” ştammının yayılmasına səbəb ola bilər. Professorun sözlərinə görə, toylarda qaydalar qətiyyən qorunmur, normadan artıq qonaqların iştirakına şərait yaradılır, şadlıq evləri qətiyyən sağlamlıq haqqında düşünmür. “Toylar, şənliklər, əyləncələr Almaniyada, Fransada, İngiltərədəki kimi qaydaya, normaya salınmalıdır, əndazəni aşmaq olmaz”.
“Delta” ilə əlaqədar toyların, şənliklərin dayandırılması ilə bağlı hansısa ehtimalların olub-olmadığına gəlincə, professor “Hər şey mümkündür. Vəziyyət gərginləşərsə toylar da dayandırıla bilər. Hər şeyin qaydasında getməsi üçün bütün qaydalara ciddi əməl olunmalıdır”-deyə bildirdi.
İradə SARIYEVA
