Bəzi kütləvi informasiya vasitələri və sosial media səhifələrində jurnalistlərin şəhid ailələrindən şəhidlər haqqında material hazırlamaq məqsədilə müxtəlif məbləğlərdə pul vəsaiti tələb etmələri barədə məlumatlar yayılıb.
Baş Prokurorluğun Mətbuat xidmətindən verilən məlumata görə, həmin xüsusatlar üzrə Baş Prokurorluğun Cinayət tətqibindən kənar icraatlar idarəsində araşdırma aparılıb. Araşdırmalarla Azər Kazımovun Rübabə Vəliyeva ilə birlikdə 2021-ci il iyunun 23-25-də özlərini televiziya əməkdaşları kimi təqdim edərək, Qəbələ şəhəri və kəndlərində yaşayan şəhid ailələri barədə çəkilişlər edib efirdə yayımlamaq adı ilə şəhid analarından ümumilikdə 240 manat məbləğində pulu aldatma yolu ilə ələ keçirib televiziya yayımlarını həyata keçirmədikləri müəyyənləşib. Azər Kazımovun və Rübabə Vəliyevanın barəsində İnzibati Xətalar Məcəlləsinin 227-ci (xırda talama) maddəsi ilə inzibati xəta haqqında iş üzrə icraat başlanılaraq aidiyyəti üzrə məhkəməyə göndərilib və hər iki şəxs barəsində müvafiq olaraq iki və bir ay olmaqla inzibati həbs növündə inzibati tənbeh seçilib.
Respublika Baş Prokurorluğu bu kimi həssas hallardan sui-istifadə edərək qanun pozuntularına yol vermiş şəxslərin məsuliyyətə cəlb olunacaqları ilə bağlı xəbərdarlıq edir.
Yayılan başqa bir məlumatda isə deyilir ki, “www.sheffaf.az” xəbər portalının baş redaktorunun 36 nömrəli Şəhər Poliklinikasının baş həkimindən hədə-qorxu ilə pul tələb etməsi barədə Rayon Prokurorluğuna müraciət daxil olub. Sabunçu Rayon Prokurorluğundan verilən məlumata görə, qeyd edilən xəbər portalının təsisçisi və baş redaktoru Namik Əmrahov vəzifəli şəxs olaraq xidməti vəzifəsinin icrası ilə əlaqədar özü üçün üstünlük əldə etmək məqsədilə öz qulluq səlahiyyətlərindən istifadə edib. O, Sabunçu rayonu, 36 nömrəli Şəhər Poliklinikasının baş həkimi Ramidə İbrahimovaya özünü “www.azinfo.tv” və www.sheffaf.az xəbər portalının rəhbəri kimi təqdim etməklə, barəsində kütləvi informasiya vasitələrində rüsvayedici məlumatlar yayacağı ilə hədələyərək, 2018-ci ildən etibarən ondan dəfələrlə ümumilikdə 2 min manat məbləğində pul tələb edərək alıb. Faktla bağlı Sabunçu Rayon Prokurorluğunda cinayət işi başlanıb, Namik Əmrahov Cinayət Məcəlləsinin 182.2.2 (təkrar törədilməklə hədə-qorxu ilə tələb etmə) və 308.1 (vəzifə səlahiyyətlərindən sui-istifadə) maddələri ilə təqsirləndilirən şəxs qismində cəlb edilərək, barəsində məhkəmənin qərarı ilə həbs qətimkan tədbiri seçilib. Hazırda iş üzrə istintaq davam edir.
Hər iki fakt göstərir ki, mediaya aidiyyəti olmayan adamlar şərəfli jurnalist peşəsini üzlərinə tutacaq edib, əsl cinayətlə məşğul olurlar. Maraqlıdır ki, belələri təsis etdikləri saytlara məhz “şəffaf” kimi adlar qoymaqla, guya “vəzifə borcunu vicdanla” yerinə yetirdikləri təəssüratı yaratmağa çalışırlar. Hüquq-mühafizə orqanlarının belə faktları ifşa etməsi və lazımi tədbirlər görməsinə media ekspertlərinin münasibəti necədir?
Media məsələləri üzrə ekspert Azər Həsrət “Bakı-Xəbər”ə açıqlamasında bildirdi ki, bu adamaları jurnalist adlandırmaq doğru deyil: “Həmin şəxslərin jurnalistika peşəsilə yaxından və uzaqdan heç bir əlaqəsi yoxdur. Bu adamları məlum əməllərinə kimi heç kəs tanımayıb. Biz jurnalistlər belə, bu adları birinci dəfədir eşidirik. Heç media adı ilə təqdim etdikləri saytları da tanımırıq. Belələri jurnalistikadan sui-istifadə edən cinayətkarlardı. Törətdiklıri əməl jurnalistika adı altında olduğuna görə, biz məsələyə sərt mövqeyimizi ifadə etməliyik. Bəziləri deyir ki, aldıqları pul kiçik məbləğdi, buna görə hay-küy salmağa dəyməz. Gercək jurnalistlər bu cür ayıb işlərə dözümlü yanaşa bilməz. Vicdanlı jurnalistlər ümumiyyətlə kimdənsə pul qoparmaq barədə düşünmür. Mən MEDİA rəhbərliyi ilə görüşüb təklif etmişdim ki, bu cür əməllərə görə tutulanların jurnalistika ilə məşğul olmaları konkret bir müddətdə qadağan olunmalıdır. Mən bu adamların saytını və “youtube” kanalını tapıb nəzərdən keçirdim. Baxış sayı çox azdır. Son günlər olunan antireklam onların xeyrinə işləyib, baxış sayları artıb. Bu adamların jurnalistika ilə məşğul olmaları qadağan edilməlidir. Rübabə Vəliyeva adlı xanımı araşdırdım. Bəlli oldu ki, hansısa mağazada icarəyə yer götürüb, alverlə məşğul olurmuş. Sonra keçib olub jurnalist. Əyinlərinə də hərbi geyim geyinirlər. Jurnalist niyə hərbi geyimdə gəzməlidir? Yeni qanunda bu müddəalar yerini tapmalıdır ki, cinayət başında yaxalananlar bəlli bir müddətdə jurnalistikadan uzaqlaşdırılmalıdır. Dünyada belə praktika var. Sürücüyə belə qadağa tətbiq edilirsə, jurnalistə də şamil oluna bilər. Çağırışım şəhid ailələrinədi. Belə dələduzlara pul ödəyib övladlarınızı tanıtmaq yolunu tutmayın. Siz övladlarınızı Vətən yolunda qurban verməklə ən böyük ödənişi edibsiniz”.
Məhəmmədəli QƏRİBLİ
