Bildiyimiz kimi, sosial şəbəkədə “Pantural” ləqəbli Tural Səfərov adlı şəxs izləyicisi olan böyük kütləyə, kişi cinsindən olan şəxslərə xitab edərək, ictimai yerlərdə onları şəhvətləndirən qadınlara qarşı seksual xarakterli zorakılıq halları törətməyə çağırış edib.
Kişilərə “qadınları zorlayın” çağırışı edən “Pantural" ləqəbli blogerlə bağlı Daxili İşlər Nazirliyi hərəkətə keçdi və onu profilaktik söhbətə dəvət edib səhvini anlatdı. Daxili İşlər Nazirliyinin mətbuat xidmətindən verilən məlumata görə, o öz səhvini etiraf edib: “Yaydığı həmin görüntüdən narazı qalan vətəndaşlardan üzr istəyib”.
Belə çıxır ki, DİN məsələyə müdaxilə etməsəydi, “Pantural” kimi bir para özünə “bloger” deyənlər qadınlara qarşı istənilən çağırışları edə bilər və buna görə özündə heç bir məsuliyyət hiss etməz.
Bəzi blogerlərin onlara yaradılan şəraitdən bu cür iyrənc məqsədlər üçün istifadə etməsi təəssüf doğurur. Halbuki, blogerlikdən istifadə edib daha ciddi məsələləri işıqlandırmaq olardı, amma o bunu etməyib, daha tez gündəmə gəlmək üçün bu iyrənc yolu seçib.
“Belə halların yaşanmaması üçün çox ciddi nəzarət mexanizmlərinin tətbiqinə ehtiyac var”
Siyasi ekspert Rövşən Rəsulov məsələyə münasibət bildirərkən qeyd etdi ki, belələri əxlaq ölçüsünün nə olduğunu bilməyənlərdir. “Son proseslərdən çıxarılan nəticələrə görə, artıq belə görünür ki, sosial şəbəkələrdə nəzarət mexanizminin gücləndirilməsinə get-gedə ehtiyac daha çox artmağa başlayıb. Çünki nəinki milli-mənəvi dəyərlərimiz, eləcə də digər sosial dəyərlərimiz ayaqlar altına atılmaqdadır. Necə deyərlər, böyük-kiçik qalmayıb, kim istəyirsə, çıxır canlı yayıma və yuxusunda gördüyü sərsəm mövzunu ictimailəşdirir ki, həmin sərsəm mövzuları ailələrimiz də nə vaxtsa görməli, dinləməli olur.
Götürək, “Pantural” ləqəbli blogerin qadınlara qarşı cinsi zorakılıq çağırışlarını və bu çağırışlarında aşkar küçə təfəkkürü sərgiləməsini. Ümumiyyətlə, bu tərbiyəsiz, əxlqsız ünsürə, fərdə kim icazə verib ki, ağlına gələnləri ilə çıxsın canlı yayıma və dırnaqrarası düşüncələrini “doğru” və ya “kişilik mücəssəməsi” qismində zorla yürütsün daxili sosiuma? Bəlkə axtarıb-arasaq, onun özünün yan-yörəsində guya tənqid etdiyi geyim tərzlərini daha betər istifadə edənlər çoxluq təşkil edir. Amma gəlin görək, onlara digər yerlərdən dil uzadanlar olurmu? Hətta deyərdim ki, bu fərdin özünün psixi və ya başqa çatışmayan cəhətləri mövcuddur və onun ciddi müalicəyə ehtiyacı var. Bundan sonra isə adıçəkilən blogerin müvafiq strukturlar tərəfindən saxlanılaraq izahatının alınmasına, ardınca yenidən canlı yayıma çıxıb “üzr” istəməsinə də ehtiyac yox idi. Zatən, bu “üzrdə” də hər hansı səmimiliyi görmək mümkün deyil. İstehza, təkəbbür və ucuz şou!”
R.Rəsulovun sözlərinə görə, bu arada, mövzuya uyğun daha bir məsələni də bəhs edilən faktla uzlaşdırmaq lazımdır. “Təəssüf ki, “Pantural” kimi milli-mənəvi, əxlaqi dəyərlərimizə sığmayan, biabırçı və rüsvayçı canlı yayımları ilə sosiuma çıxan xanım blogerlər də var ki, onların ifadələrini, davranışlarını izləyərkən insan özü-özündən utanır. Dərhal belə bir fikir formalaşmağa başlayır ki, əcəba, bəs bunlara evlərində, ətraflarında tərbiyə, əxlaq, davranış dərsləri keçən olmayıbmı? Xanım bloger dəniz sahilindən çıxır canlı yayıma və kişilərin çimərlik geyimlərini ələ salır, ağlına gələn fikirləri səsləndirir, bəs buna nə deyək?!
Əlbəttə, heç bir halda haqq qazandırılmayacaq bu cür hadisələr, sanki yağışdan sonra bitən qamışlara bənzəyir, günü-gündən belə dırnaqrarası blogerlərin sayı durmadan artır. Ona görə də artıq belə halların yaşanmaması üçün çox ciddi nəzarət mexanizmlərinin tətbiqinə ehtiyac var və Milli Məclisdə də dəfələrlə müxtəlif səpgidə layihələr təqdim olunsa da, onlar gözləmə mövqeyində qalmaqdadır”.
R.Rəsulovun fikrincə, bizim gələcəyimizi, milli dəyərlərimizi itirməyə çalışanların qarşısına çıxmamağa haqqımız yoxdur. Eyni zamanda, ölkəmizin, xalqımızın və övladlarımızın gələcəyi naminə analoji insürlərin bu kimi şoularına birdəfəlik son qoyulmalıdır.
İradə SARIYEVA
