Nazirlər Kabineti yanında Operativ Qərargahın qərarına görə, bu il iyul ayının 1-dən müəyyən qaydalara əməl olunmaqla toy şənliklərinin keçirilməsinə icazə verilib. Lakin heç də bütün şadlıq sarayları qoyulan tələblərə əməl etmir.
Belə ki, aidiyyəti qurumlar tərəfindən aparılan yoxlamalar nəticəsində bəzi şadlıq saraylarında qeyd olunan qərardan irəli gələn tələblər pozularaq, toyların təşkili zamanı “icaze.e-gov.az” portalından qeydiyyatdan keçməməsi, icazə verilən saydan artıq qonağın iştirak etməsi, mərasimlərə qatılan bəzi şəxslərin vaksinasiya olunmalarını təsdiq edən müvafiq sənədin olmaması, eləcə də şənliklərin saat 24:00-dan sonra da davam etməsi müəyyən edilib.
Daxili İşlər Nazirliyinin Mətbuat Xidmətindən verilən xəbərə görə, belə halların qarşısının alınması məqsədilə Daxili İşlər Nazirliyinin əməkdaşları Dövlət Vergi Xidməti və Qida Təhlükəsizliyi Agentliyinin mütəxəssislərinin iştirakı ilə Bakı şəhərində, eləcə də respublikanın digər şəhər və rayonlarında fəaliyyət göstərən şadlıq saraylarında müntəzəm olaraq yoxlamalar həyata keçirir. Son 3 gün ərzində paytaxtda yerləşən 300-ə yaxın şadlıq sarayında analoji yoxlamalar aparılıb. Nəticədə 12 şadlıq sarayında (“Gülüstan”, “Golden Baku”, "Billur", "Kral", "Aura", "SS Hall", "Ərzurum", "Neon Palace", "Kleopatra", "Sevən ürəklər", "Xan bağı", "Şuşa") xüsusi karantin rejimindən irəli gələn qaydaların pozulması halları müəyyən edildiyindən, hər bir fakt üzrə Cinayət Məcəlləsinin 139-1-ci maddəsilə cinayət işləri başlanıb, təqsirkar şəxslər saxlanıb.
4 şadlıq sarayı və 1 restoranda isə ("Yeganə", "Amor", "İdeal", "Retro", "Səda") aşkar edilmiş qayda pozuntularına görə İXM-in 211-ci maddəsilə protokollar tərtib edilərək, obyekt sahibləri barəsində inzibati həbs və ya cərimə tətbiq edilib.
Analoji tədbirlər ərazi polis orqanları tərəfindən müvafiq dövlət qurumları ilə birgə respublikanın bütün şəhər və rayonlarında da həyata keçirilir. Belə yoxlamalar nəticəsində xüsusi karantin rejimi qaydalarını pozduğuna görə 2 şadlıq sarayının sahibi barəsində cinayət işi başlanıb, 12 obyekt sahibi şübhəli şəxs qismində tutulub, 21 obyekt sahibi inzibati cərimə edilib, 10 fakt üzrə istintaq araşdırması aparılır, vaksinasiya olunmasını təsdiq edən müvafiq sənədi olmayan 423 nəfər isə şadlıq saraylarına buraxılmayıb.
Daxili İşlər Nazirliyi bir daha toy etməyi planlaşdıran vətəndaşlarımızdan, eləcə də toy şənliklərinin keçiriləcəyi şadlıq sarayı və restoran sahiblərindən təşkil edəcəkləri şənlik mərasimləri zamanı koronavirus pandemiyası ilə əlaqədar tətbiq edilən bütün qərarlara, o cümlədən dəvət edilən qonaqların say məhdudiyyətinə, onların vaksinasiya olunmalarını təsdiq edən müvafiq sənədə malik olmaları tələbinə ciddi riayət və nəzarət etməyi xahiş edir. Əks təqdirdə, koronavirus pandemiyasına qarşı mübarizə tədbirlərinə nəzarəti həyata keçirən polis və digər aidiyyəti qurumlar qanunvericiliyin tələblərinə uyğun olaraq təqsirkar şəxslər barəsində cəza tədbirləri görmək məcburiyyətində qalacaq.
Gördüyümüz kimi, 12 şadlıq sarayı ilə bağlı cinayət işi açılıb, faktla bağlı saxlanılan var.
Məşhur şadlıq saraylarının sahiblərinə cinayət işi açılması təsadüfdürmü?
“Bu proses 12 şadlıq sarayının sahibinin saxlanması ilə məhdudlaşmayacaq və bunun dairəsi hələ böyüyəcək”
“Polisə Dəstək” İctimai Birliyinin rəhbəri, tanınmış hüquqşünas Şəmsəddin Əliyev “Bakı-Xəbər”ə şərhində bildirdi ki, hadisənin bu cür nəticələnməsinə həmin şadlıq saraylarının rəhbərləri öz vəzifə səlahiyyətlərini aşmaqla şərait yaradıblar. Ş.Əliyev hesab edir ki, bəzi şadlıq evləri və restoranların sahibləri qayda-qanunlara riayət etməli olduqları halda qanunları tapdalayır, bu da onların həbsinə, cərimələnməsinə səbəb olur. “Şadlıq sarayları sahiblərinin saxlanılmasını qətiyyən təsadüf saymıram, şəraitin tamamilə yetişdirdiyi bir haldır. Əvvəlla deyim ki, COVID-19-la gərgin mübarizə dövrü olan bu ilyarımda bu istiqamətdə Nazirlər Kabineti yanında Operativ Qərargah əhaliyə ciddi xəbərdarlıq edirdi, Daxili İşlər Nazirliyi hərtərəfli profilaktik, ictimai təhlükəsizlik tədbirlərini həyata keçirir, qanunu pozanlar cərimə edilirdi və sair. Lakin cinayət məsuliyyətinə cəlb edilmə ilə bağlı hər hansı hərəkətlər baş verməmişdi. Bəzi populyar şadlıq sarayları da fürsətdən istifadə edib əndazəsini aşırlar. İndi artıq DİN tərəfindən bu şadlıq saraylarının rəhbərlərinə qarşı Cinayət Məcəlləsinin 139.1 maddəsi ilə cinayət işinin açılması o deməkdir ki, bu şadlıq sarayları, onların vəzifəli şəxsləri səlahiyyət çərçivəsini aşıblar və onlara verilən imkanlardan öz şəxsi maraqları üçün istifadə etməyə başlayıblar. Bu baxımdan düşünürəm ki, bu proses 12 şadlıq sarayının sahibinin saxlanması ilə məhdudlaşmayacaq və bunun dairəsi hələ böyüyəcək.
Baş verənlərdə məqsəd dövlət başçısının bu istiqamətdə verdiyi mesajların diqqətdə saxlanılması və gələcəkdə ictimai münasibətlərə xələl gətirən halların qarşısını almaqdan ibarətdir. Yəni qanun qarşısında hamı boyun əyməlidir, qanun qarşısında hamı bərabərdir”.
Ş.Əliyevin fikrincə, bəzi şadlıq saraylarının rəhbərləri özlərini toxunulmaz, imtiyazlı saymamalıdır, çünki ölkə başçısı demişkən, toxunulmaz şəxs yoxdur, hamı etdiklərinin cavabını verməlidir. Ş.Əliyev hesab edir ki, qanuna riayət etməyən digər şadlıq sarayları və restoranların sahibləri də bu 12 şadlıq sarayının rəhbərlərinin vəziyyətini yaşaya bilər.
İradə SARIYEVA
