Rəhim Tağıyev adına Masallı Rayon Tarix-Diyarşünaslıq Muzeyinin növbəti tədbiri Tovuz döyüşlərinin ildönümünə həsr olunmuşdu. “Unudulmaz tarix” adlı bu tədbirin iştirakçıları Tovuz döyüşlərində şəhidlik zirvəsinə ucalmış Vətənin qəhrəman oğlu mayor Anar Novruzovun doğmaları, şəhid ailələri, Qarabağ müharibəsi iştirakçıları, rayon Veteranlar Şurasının sədri və mədəniyyət işçiləri idilər.
Tədbir Vətən torpaqlarınin azadlığı və ölkəmizin müstəqilliyi uğrunda şəhid olmuş igid Azərbaycan oğullarının xatirəsini bir dəqiqəlik sükutla yad etməklə başlandı və Muzeyin direktoru, Əməkdar Mədəniyyət işçisi Əntiqə Tağıyevanın giriş sözü ilə açıldı. O bildirdi ki, düşmən tərəfindən Ermənistan-Azərbaycan dövlət sərhədinin Tovuz rayonu istiqamətində Azərbaycan Silahlı Qüvvələrinin mövqelərinin atəşə tutulması ilə başlanan iyul döyüşləri Ordumuzun qətiyyəti sayəsində vaxtında susduruldu. Sarsıdıcı zərbələr hesabına təcavüzkar düşmənin çoxlu sayda hərbi texnika və canlı qüvvəsi məhv edildi. Döyüşlər zamanı yüksək rütbəli bir neçə zabitimiz həyatını itirdi. Ölkəmizdə xalq və dövlət, xalq və ordu birliyinin möhkəmliyi bir daha göstərdi ki, Ermənistan hərbi birləşmələri Azərbaycan Ordusu qarşısında hər zaman acizdir.
Şəhid Anar Novruzovun qardaşı Sucəddin Novruzov qardaşı ilə bağlı xatirələrdən danışaraq belə dedi: “O, heç vaxt Qarabağ torpaqlarının ermənilər tərəfindən işğalda saxlanılması ilə barışmırdı. Hər zaman deyirdi ki, Ali Baş Komandanımız əmr verən günü mən çox sevinəcəyəm. Biz Vətən torpaqları düşmən işğalından azad etmək gücünə tam malikik”.
Masallı Regional Mədəniyyət İdarəsinin rəisi Bəxtiyar Qılıncov, iki şəhid oğul anası Ziba Əsgərli, Müharibə, Əmək və Silahlı Qüvvələr Veteranlar Təşkilatının Masallı rayon şöbəsinin sədri Məmmədağa Şiriyev, müharibə veteranı, Azərbaycan Qarabağ Müharibəsi Əliləri, Veteranları və Şəhid ailələri ictimai birliyinin Masallı rayon filialının sədri Nahid Rəhimov və başqaları öz çıxışlarında vurğuladılar ki, ermənilər Tovuz təxribatını törətməklə nəyəsə nail olduğunu güman etsələr də, döyüşlərdən sonra 44 günlük Vətən müharibəsində Azərbaycan ordusu və xalqı bir yumruq kimi birləşərək erməni qəsbkarlarına gücünü göstərdi. Ali Baş Komandan İlham Əliyevin rəhbərliyi altında igid əsgərlərimiz nəinki Tovuz döyüşlərində, 30 il ərzində həyatını itirmiş bütün vətən oğullarının qisasını qısa zaman ərzində aldılar. Doğrudur, müharibə itkisiz ötmür. Torpaq uğrunda itkilərimiz oldu. Vətən yolunda can qoyan general-mayor Polad Həşimov, polkovnik İlqar Mirzəyev, mayor Namiq Əhmədov və Anar Novruzov, eləcə də digərləri Azərbaycan xalqının yaddaşında əbədi yaşayacaq. Onlar döyüş meydanında mərdliklə döyüşərək şəhidlik məqamına ucalmaqla gələcək nəsillər üçün qəhrəmanlıq nümunəsinə çevriliblər.
Tədbirin sonunda qonaqlar Tovuz döyüşlərində qəhrəmanlıq göstərmiş Vətən şəhidlərinin ildönümünə həsr olunmuş sərgiyə baxdılar. “Unudulmaz tarix” adlanan sərgidə rəssam Ehtiram Məmmədov və Sevda Əliyevanın Qarabağ döyüşləri ilə bağlı çəkdikləri rəsm əsərləri və muzeyin fondunda qorunan şəhidlərə aid şəxsi əşyalar nümayiş etdirildi.
Axırda xatirə fotoları da çəkildi.
Zəfər ORUCOĞLU Azərbaycan Jurnalistlər Birliyinin üzvü
