Məlum olduğu kimi, Daxili İşlər Nazirliyi antinarkotik təbliğatla bağlı ictimaiyyətə müraciət edib. Nazirliyin müraciətində qeyd olunur ki, narkotiklərin qanunsuz dövriyyəsi və narkomanlıq qlobal problem olaraq bütün bəşəriyyəti narahat edir:
“Bu bəlaya qarşı mübarizə Azərbaycanda da hüquq-mühafizə orqanları qarşısında duran başlıca vəzifələrdən biridir. Qanunsuz dövriyyədən çıxarılan narkotiklərin həcminin ilbəil artmasına baxmayaraq, həmin vasitələrin ölkəyə gətirilməsinə edilən cəhdlər, buna mütənasib olaraq narkotik istifadəçilərinin sayı çoxalır. Belə bir vəziyyət isə nəticə etibarı ilə gənclərimizin narkotik aludəçisi olmaq təhlükəsini artırır.
Problemlə bağlı mediada tənqidi yazılar dərc olunur, sosial şəbəkələrdə müzakirələr aparılır, müxtəlif fikirlər səsləndirilir. Bu, normal haldır və biz hər kəsin mövqeyinə, eləcə də ictimai rəyə hörmətlə yanaşırıq.
Lakin təkcə tənqidlə, yaxud iradlarla iş bitmir. Bu təhlükəni aradan qaldırmaq üçün cəmiyyətin birgə səyləri tələb olunur. Yəni hər kəsin ümumi işə real köməkliyi çox vacibdir. Yalnız bu halda görülən işlər istənilən nəticəni verə bilər”.
Maraqlıdır, narkomaniya ilə mübarizədə sosial şəbəkə istifadəçiləri, media nümayəndələri və blogerlər bir araya gələrsə, istənilən nəticəni əldə etmək olarmı?
“QHT və blogerlər məktəblilər arasında bu bəlanın yayılmasının qarşısını almaq üçün daha da aktiv faəliyyət göstərməlidirlər”
“Vəfa” Sosial İctimai Birliyinin sədri Fatimə Hacıbəyli qeyd etdi ki, narkomaniyaya qarşı mübarizənin bütün cəmiyyət tərəfindən aparılması olduqca vacibdir: “Məlumdur ki, ölkəmizdə narkotik vasitələrin dövriyyəsinə qarşı mübarizə dövlət səviyyəsində aparılır. Ölkəmizdə narkobizneslə mübarizə günü-gündən güclənir. Aparılan tədbirlər nəticəsində tonlarla qanunsuz narkotik vasitə dövriyyədən çıxarılır. Artıq bir çox qeyri-hökumət təşkilatı narkomaniyaya qarşı mübarizədə bir araya gələrək QHT koalisiyası yaradıb. Həmin koalisiya çərçivəsində müəyyən işlər görülür”.
Həmsöhbətimiz hesab edir ki, narkomaniya ilə mübarizədə aparılan maariflənmə işləri daha da artmalıdır. Bu işdə əsas yük sosial şəbəkə istifadəçiləri, blogerlər və media təmsilçilərinin üzərinə düşür: “Məlumdur ki, pandemiyadan öncə QHT təmsilçiləri ali təhsil ocaqlarında narkomaniyanın zərəri, bu bəla haqqında tələbələrə məlumat verirdilər. Ancaq indi karantin qaydalarına əsasən belə tədbirlər keçirilmir. Bu səbəbdən hazırda əsas iş aktiv sosial şəbəkə istifadəçilərinin üzərinə düşür. Blogerlər gənclərlə onlayn görüş təşkil edərək narkotikin insan həyatını necə məhv etməsi haqqında məlumat verə bilərlər. Açıqlanan statistik rəqəmlərdə narkomaniyanın gəncləşməsinin şahidi oluruq. Bu səbəbdən də məktəblilərin arasında bu bəlanın yayılmasının qarşısını almaq üçün QHT və blogerlər daha da aktiv faəliyyət göstərməlidirlər”.
Birlik sədri xüsusi olaraq vurğuladı ki, narkomaniya ilə mübarizə kampaniya xarakterli deyil, davamlı şəkildə olmalıdır.
Günel CƏLİLOVA
