Bildiyimiz kimi, Azərbaycan və Türkiyə arasında ali və orta ixtisas məktəbləri tərəfindən verilən diplomların qarşılıqlı tanınması məsələsində müəyyən problemlər var. Amma son zamanlar bu istiqamətdə yeni proses başladılıb və nəticədə hər iki ölkənin ali məktəblərinin, kolleclərinin diplomları qarşılıqlı olaraq tanınacaq.
“Report”un yaydığı məlumata görə, rəsmi Bakı və Ankaranın iqtisadi əməkdaşlığına dair fəaliyyət planında qeyd edilib ki, Türkiyə ilə Azərbaycan arasında təhsil sahəsində əməkdaşlığın genişləndirilməsi istiqamətində müzakirələr davam etdirilir.
Sənədə əsasən, 2021-ci ildə Azərbaycanda fəaliyyət göstərən 1 nömrəli Bakı Tibb Kolleci, 2 nömrəli Bakı Baza Tibb Kolleci və Sumqayıt Tibb Kollecinin diplomalarının Türkiyənin Milli Təhsil Nazirliyi tərəfindən peşə orta təhsili çərçivəsində qiymətləndirilməsi üçün danışıqlar aparılacaq.
Bu işlərin həyata keçirilməsi Azərbaycan və Türkiyənin Təhsil nazirliklərinə tapşırılıb.
Maraqlıdır ki, niyə məhz bu kolleclər seçilib? Bunlar kimin tövsiyəsi ilə seçilib? Bunlardan başqa Azərbaycanda tibb kollecləri yoxdur?
“Adıçəkilən kolleclər müəyyən şəxslərlə, yaxud qurumlarla razılaşa bilərlər ki...”
Təhsil eksperti Elçin Əfəndi “Bakı-Xəbər”ə şərhində bildirdi ki, bu siyahıda kifayət qədər müəmmalı məqam var və bu, kimlərinsə işbirliyinin nəticəsi kimi görsənə bilir. Bundan əlavə, E.Əfəndi vurğuladı ki, qarşıdan kolleclərə qəbul imtahanı gəlir, bu siyahı 1 nömrəli Bakı Tibb Kolleci, 2 nömrəli Bakı Baza Tibb Kolleci və Sumqayıt Tibb Kollecinin piarına, reklamına da hesablana bilər. “İndiki məqamda bu üç kollecin adının hallandırılması birbaşa piar məsələsi ilə də bağlı ola bilər. Çünki qarşıdan qəbul prosesi gəlir, 11-ci sinfi bitirənlər arasında kollecləri seçənlər də olacaq. Bu kontingenti adıçəkilən kolleclərə cəlb etmək üçün göstərilən 1 nömrəli Bakı Tibb Kolleci, 2 nömrəli Bakı Baza Tibb Kolleci və Sumqayıt Tibb Kollecinin adlarının çəkilməsi, onların reklam edilməsi kimlər üçünsə maraqlıdır. Yəni kimlərsə istəyir ki, bu kolleclərə daha çox abituriyent üz tutsun.
Hazırda Azərbaycan və Türkiyə arasında iqtisadi-siyasi və digər sahələrlə paralel olaraq təhsil sahəsində də müəyyən əməkdaşlıq məsələləri müzakirə edilir, razılaşmalar əldə olunur. O cümlədən də ən çox üstünlük verilən sahələrdən biri orta ixtisas və peşə təhsilinin inkişaf etdirilməsidir ki, bu barədə də daha çox razılaşmalar əldə edilir, müqavilələr bağlanır. Niyə bu kolleclərin diplomlarının Türkiyədə tanınmasına belə maraq göstərilir, nə üçün Gəncə Tibb Kollecinin, Mingəçevir Tibb Kollecinin, Şəki Tibb Kollecinin adları çəkilmir? Eyni zamanda, niyə tibb istiqamətinə aid olan kolleclərin adları hallandırıldığı halda, iqtisadi, texniki, humanitar yönümlü kolleclərin adları hallandırılmır, onların diplomlarının tanınmasından söhbət getmir? Əlbəttə, bu suallar bir sıra qaranlıq məqamları üzə çıxarır. Fikrimcə, burada təklifi verən Təhsil Nazirliyidirsə, yalnız tibb sahəsində olan üç kollecin deyil, digər sahələr üzrə də kolleclərin diplomlarının tanınması ilə bağlı müraciət etməli idi, bu kolleclərin diplomlarının qarşılıqlı tanınması ilə bağlı razılıq əldə olunmalı idi”.
E.Əfəndinin sözlərinə görə, faktiki olaraq, reallıq ondan ibarətdir ki, Türkiyə adıçəkilən kolleclərin diplomlarının tanınmasının yalnız peşə təhsili səviyyəsində həyata keçiriləcəyini bildirir.
Barəsində danışılan üç kollecin diplomlarının tanınması məsələsində maraqlı tərəflərin olduğunu bir daha vurğulayan E.Əfəndinin sözlərinə görə, ola bilsin, həmin şəxslər həmin kolleclərin rəhbərləri ilə əlbirdir və piar kampaniyasında birgə çalışırlar: “Bu kolleclərin diplomlarının tanınmasında maraqlı olan tərəflər, qüvvələr var. Bu üç kollecin diplomlarının Türkiyədə tanınması ilə bağlı maraqlı olanlar onlara inanan kütlə formalaşdırmaq istəyirlər. Bu cür piar aparmaqla çalışırlar ki, onlara inansınlar və gələcəkdə bu kolleclərdə yer boş qalmasın. Burada konkret bir məqam var, adıçəkilən kolleclər müəyyən şəxslərlə, yaxud qurumlarla razılaşa bilərlər ki, belə informasiya yaysınlar, yaxud Təhsil Nazirliyində müəyyən insanlarla əlaqə yarada bilərlər ki, Türkiyədə diplomları tanınacaq kolleclər siyahısına bizim kollecin adını salın. Yaxud bu işdə səhiyyə sistemindən də maraqlı olanlar ola bilər. Onlar bu piarın aparılmasında və həm də o kolleclərin adlarının siyahıya salınmasında maraqlı tərəf ola bilər” - deyə E.Əfəndi qeyd etdi.
İradə SARIYEVA
