Məlum olduğu kimi, Azərbaycan Qida Təhlükəsizliyi Agentliyi (AQTA) pandemiya dövrünün tələblərinə, bu sahədə müvafiq qanunvericiliyin icrasına, həmçinin, koronavirusun (COVID-19) profilaktikasına dair Nazirlər Kabinetinin qərarı ilə təsdiq edilmiş metodiki göstərişlərin icrasına nəzarət məqsədilə ictimai iaşə obyektlərində reydləri davam etdirir.
AQTA-dan verilən məlumata görə, 7 iyul 2021-ci il tarixində Biləsuvar şəhəri, Heydər Əliyev küçəsində fəaliyyət göstərən, fiziki şəxs Şahbazov Mahir Vəkil oğluna məxsus “Zirvə” şadlıq sarayında keçirilən baxış zamanı pandemiya dövrünün tələblərinin kobud şəkildə pozulduğu aşkar olunub. Belə ki, toy mərasiminin keçirildiyi zalın sahəsi normativ tələblərə müvafiq olaraq 79 nəfərə xidmət etmək üçün uyğun olduğu halda, 150 nəfərlik şənlik mərasiminin keçirilməsi üçün müvafiq portala rəsmi müraciət olunub və keçirilən baxış zamanı şənlik mərasiminin 300-dən artıq şəxsin iştirakı üçün nəzərdə tutulduğu müəyyən olunub. Aşkarlanan pozuntularla bağlı müəssisənin rəhbərliyi inzibati məsuliyyətə cəlb olunub. Eyni zamanda, ciddi qanun pozuntusuna yol verdiyinə görə həmin ictimai iaşə müəssisəsində bundan sonra şənlik mərasimlərinin keçirilməsinə məhdudiyyətin tətbiq olunması üçün Vətəndaşlara Xidmət və Sosial İnnovasiyalar üzrə Dövlət Agentliyinə müvafiq qaydada müraciət olunub.
AQTA əhalinin sağlamlığının qorunması, həmçinin, pandemiya dövrünün tələbləri ilə bağlı qanunvericiliklə müəyyən olunmuş tələblərə əməl olunmasının təmin edilməsi istiqamətində ardıcıl tədbirlərini bundan sonra da davam etdirəcək və qanunsuz fəaliyyətlərin qarşısının alınması istiqamətində müvafiq tədbirlər həyata keçirəcək.
AQTA Bakıda da belə prinsipiallığı niyə etmir? Məgər Bakıda belə pozucu restoranlar olmur?
“Sən obyektivsənsə, bu qaydanı təkcə regionlarda yox, paytaxtda da təmin etməlisən”
“Altay” Sosial-İqtisadi Araşdırmalar Mərkəzinin rəhbəri, sosioloq Elçin Bayramlı “Bakı-Xəbər”ə bildirdi ki, AQTA tərəf tutmamalı və bütün restoranlara, şadlıq evlərinə bir gözlə baxmalıdır. E.Bayramlının sözlərinə görə, bütün şadlıq evləri və restoranlar öz üzərlərinə düşən məsuliyyəti dərk etməlidirlər: “Əvvəla qoyulmuş qaydalara riayət edilməlidir. İstisnasız olaraq hamı. Heç kim heç kimdən artıq deyil. Bu qaydanı pozanlar sərt cəzalandırılmalıdırlar. Çünki cəmiyyətdə ayrıseçkilik yaradır, dövlətə, qanunlara inamı azaldır, psixoloji diskriminasiyaya səbəb olur. Qaydaya uyğun toy edənlər düşünürlər ki, filankəsin pulu çoxdur, rüşvət verib, nə istəsə edir, qanun ancaq kasıblara aiddir və s. Bunun qarşısı alınmalıdır.
İkincisi, toy etmək üçün 150 nəfər də çoxdur. Düşünürəm ki, maksimum 100 nəfər kifayətdir. Toy ailə qurulmasının rəsmiləşdirilməsinin təntənəli qeyd edilməsidir. Burada isə ailənin ən yaxın qohumları və dostları iştirak edə bilər. Heç kimin ən yaxın qohum və dostlarının sayı 50 nəfərdən artıq ola bilməz. İndiki dövrdə heç 10-20 nəfər belə yaxın, doğma adam tapmaq olmur. Demək, 100 nəfərlə də toy etmək olar, halbuki, 150 nəfərə kimi icazə verilib. Məqsəd ailə qurmaqdır, yoxsa özünü başqalarına göstərmək?”
E.Bayramlının fikrincə, biz bəzi stereotiplərdən əl çəkə bilmirik və şan-şöhrət xəstəliyimizi davam etdiririk. “Sadəcə, bizdə ağır bir psixoloji xəstəlik var - özlərini başqalarına göstərmək, başqalarından üstün olduğunu sübut etmək, “mən adi insanlardan deyiləm” ruhunda olmaq. Ona görə fəxrlə deyirlər ki, bizim toyda 500 nəfər iştirak etmişdi, süfrədə hər şey var idi, filan-filan hoqqalar çıxarıldı, gəlin maşını filan markadan idi və s. Bu, ağır patoloji xəstəlikdir və müalicəsinə ehtiyac var. Dünyanın mədəni cəmiyyətləri bu mərhələni çoxdan keçiblər. Biz də keçməliyik, özümüzü dünyaya güldürməməliyik. Bizim toylarda iştirak edən əcnəbilər dəhşətə gəlirlər ki, bu nə biabırçılıq, nə görməmişlik, nə hoqqabazlıqdır. İndiki toylarımız harınlığın, israfçılığın, günahın zirvəsidir. Allaha inanan adam bunu edə bilməz.
AQTA-ya gəldikdə, bu agentliyin işi qida terrorunun qarşısını almaqdır, amma əsas funksiyasını qoyub hər cür işlərlə məşğuldur. Özü də iri balıqlara toxuna bilmir, xırda balıqları tutur. Bəli, sən obyektivsənsə, bu qaydanı təkcə regionlarda yox, paytaxtda da təmin etməlisən. Mağazalarda, kafelərdə əhaliyə hər gün saxta, keyfiyyətsiz, təhlükəli ərzaqlar yedirdilir. Bəs sən hara baxırsan? Halbuki, açıq şəkildə hər gün Bakıda 300-500 nəfərlik toylar keçirilir, AQTA-nın gözləri bunu görmür nədənsə. Bunlar guya bu sahəyə nəzarət etmək üçün yaradılıblar. Bəs nəzarətçilərə kim nəzarət edəcək?” - deyə E.Bayramlı bildirdi.
İradə SARIYEVA
