İkinci Qarabağ müharibəsində Vətən torpağının qeyrətini hər şeydən üstün tutaraq bu yolda şirin canından keçən Şahin Afat oğlu Tahirli dağlar diyarı Lerik rayonunun Züvüc kəndindəndir. Bu Vətən sevdalı igidimiz haqq savaşımızda yağı düşməndən intiqamını alandan sonra əbədiyyətə qovuşur.
Yazdığı tarix dillərdən düşmür, Lerik camaatı öz Şahin oğlunu ürəyində yaşatmaqla həmişə Vətənə sədaqət nümunəsi olaraq böyük ehtiramla xatırlayır. Dövlət də qəhrəman Şahini unutmayıb. Müharibədə göstərdiyi şücaətinə görə onu ölümündən sonra “Vətən uğrunda”, “Füzulinin azad olunmasına görə”, “Şuşanın azad olunmasına görə” və “Döyüşdə fərqlənməyə görə” medalları ilə təltif edib.
Şəhidin doğma kəndi Züvücdə onun əziz xatirəsinə bulaq kompleksi inşa olunub. Suyundan qəlblərə əbədiyyət nəğməsi hopan saf çeşmənin açılış mərasiminə bütün kənd toplamışdı. Öncə tədbir iştirakçıları şəhidin məzarını ziyarət etdi və önünə tər gül-çiçəklər düzdülər. Tədbirdə çıxış edən rayon icra hakimiyyəti başçısının səlahiyyətlərini icra edən Cəlil Baxşıyev, Səfərbərlik və Hərbi Xidmətə Çağırış üzrə Dövlət Xidmətinin Lerik rayon Şöbəsinin rəisi Arif Həsənov, Züvüc kənd orta məktəbinin müəllimi, şəhidin sinif rəhbəri Vaqif Şahmarov, şəhidin qardaşı Bilal Ağayev, kənd ağsaqqalı Əlirza Abışov bildirdilər ki, 44 gün çəkən Vətən müharibəsində Prezident, Ali Baş Komandan İlham Əliyevin rəhbərliyi altında müzəffər Azərbaycan Ordusu şanlı qələbə qazandı. İgid oğullarımız Azərbaycanın hərb tarixinə qəhrəmanlıq salnaməsini yazaraq, işğal altında olan müqəddəs Qarabağ torpaqlarını azad etdilər. Ölkəmizin ərazi bütövlüyü uğrunda gedən döyüşlərdə şəhid olmuş qəhrəman Vətən övladlarının xatirəsi həmişə xalq tərəfindən uca tutulur. Həm Birinci, həm də İkinci Qarabağ müharibəsində Lerik rayonundan olan qəhrəman oğullarımız da hərbi əməliyyatlarda misilsiz rəşadət göstəriblər. Züvücün Şahin oğlu da Vətənin yaşaması üçün canını ona qurban verib. İndi bütün leriklilər onun qəhrəmanlığı ilə fəxr edir, qürur hissi duyurlar.
Sonra məktəblilərin ifasında səslənən şəhidlərə və qələbəmizə həsr olunmuş şerlər tədbirə xüsusi bir ahəng qatdı.
Şəhidin atası Afat Tahirli isə bütün bu diqqət və qayğıya görə Prezident İlham Əliyevə və Birinci vitse-prezident Mehriban Əliyevaya minnətdarlığını bildirdi.
Zəfər ORUCOĞLU Azərbaycan Jurnalistlər Birliyinin üzvü
